Donderdag, 31 Maart 2016

Heuningkoek

My moedertjie het my geleer lekkergoed maak. Dit was die dae waar daar nie goeters soos suiker termometers beskikbaar was. Ek onthou die lang glaswater en dan die drup van die kokende suiker in die glas om die hardheid van die balletjie wat vorm te bepaal. Tegnologiese vooruitgang het my die kans gegee om my ma se resep bietjie af te stof en te restoureer!

Ja, ons praat van Crunchies soos in die binnekant van ‘n Crunchie sjokolade. Daar is baie resepte wat vra dat jy koeksoda in die kokende stroop sit en as jy nie jou storie ken nie, wel dan sit jy met seep! So het ek ander alternatiewe geraadpleeg en op ‘n dag op my ma se resep afgekom en ek het dit gemaak met ‘n breë glimlag in my hart! Ja, dit kry koeksoda in, maar dit proe nie soos seep nie!

Resep
¼ t Gelatien
10ml Water
300g Wit suiker
125ml Glukose- of Goue stroop
125ml Water
12.5ml Koeksoda (sif asb deeglik om klontjies te verwyder)

Metode:
1. Ek is maar lui vir die smeer van panne, so ek span maar waspapier in vir die takie. Gebruik ‘n bak van ongeveer 15cmx15cm. Net glas of metaal is geskik vir hierdie projek.

2. Sprinkel die gelatien oor 10ml water en laat dit staan sodat die gelatien kan hidreer.

3. In ‘n vlekvrye staal kastrol wat redelik diep is, meng die suiker, glukose stroop en water saam. Verhit die mengsel oor medium hitte en roer totdat al die suiker opgelos het. Was die kante versigtig met ‘n kwassie wat in water gedoop is af. Sodra al die suiker opgelos het, kook die mengsel sonder om te roer totdat jou suiker termometer 153℃ lees.

4. Verwyder die stroop van die hitte en laat dit vir 2 minute afkoel of totdat die borrel opgehou het. Voeg nou die gelatien by die mengsel, wees versigtig die mengsel gaan op kook en jy kan lelik brand. Werk vinnig met die ballon klitser en werk die gelatien deur. 

5. Nou vir die deel waar jy gaan skuim maak, jy kan hier ook brand. Sprinkel die koeksoda eweredig oor die oppervlakte van die suiker stroop. Moenie die koeksoda in een hoop gooi nie!!! Klits die mengsel so vinnig as wat jy kan met die ballon klitser en plaas die kastrol terug op die hitte en klop weer vir halwe minuut. Die storie gaan woes skuim...moenie skrik, dit moet so wees.

6. So gou as moontlik keer die inhoud van die kastrol uit in die uitgevoerde bak. Jy sal sien dat die hele suiker besigheid in een blob uit die pot sal val. Jy het nie nodig om dit uit te skep nie. Moet ook nie poog om die mengsel eweredig te versprei nie. Laat dit net so anders druk jy die lug uit. Laat die mengel staan vir 2 ure of langer voordat jy dit uit die pan haal.

7. Nou vir die breek en sny slag. Dit is ‘n storie der stories om hierdie outjie in netjiese stukkies te sny! Ek het op ‘n keer my man se vleis saag ingespan om die blokkies mooi eweredig te sny. Dus, gebruik ‘n mes met tandjies om die besigheid te sny. Maak eers ‘n snytjie om die lyntjies in te trek. Jy hou aan om so te “score” totdat jy onder uit kom. Of as jy lui en belustig is...wel dan laat jy die bak val op die toonbank sodat dit kan kraak!

8. Plaas in ‘n lugdigte houer. Ek sprinkel rysmeel onder in die bak want dit absorbeer baie van die vog wat in die lug mag wees en voorkom dat die gedoente aan mekaar vasplak of smelt.

9. Jy kan ook die stukke in sjokolade doop!!! Sprinkels opsit! Aaag dit is sommer net ‘n heerlike projek waar jy die kinders kan betrek.

Bron: Annelien Pienaar, www.bosenbergguestfarm.co.za, 2016 
Hoeveelheid: 750ml bottel vol.

Maandag, 28 Maart 2016

Piesang en Pynappel tert

Ek weet ek tree nou teen my goed denke op maar ek het ‘n jaar gelede hierdie reseppie vir die “Banana split salad” by ‘n vriendin gekry. Ek het geskaaf en skuur en my eie stempel afgedruk op die resep. Die resep gebruik ietsie uit ‘n dosie en ek haat geriefsvoedsels. Maar hierdie sondetjie sal ek so een keer per jaar aandurf! Julle gaan hierdie enetjie sommer baie geniet!

Resep
1 Dosie Kits Piesang poeding
1 Blikkie kondensmelk
125ml Suurlemoensap
250ml Room, styf geklits
1 Blikkie fyn Pynappelstukkies
250ml Malvalekkers gesnipper of mini malvalekkers
2 Piesangs, in ringetjies gesny (kan met bessies ook vervang word)
½ k Kersies, indien jy dit kan bekostig, marachino cherries!
½ k Neute van keuse

Metode:
1. Maak die Kits poeding aan deur die sap van die pynappels met die poeier te meng. Meng dan die stukkies by.

2. Meng die kondensmelk en suurlemoensap saam en laat eenkant om dik te word.

3. Vou die styf geklitste room in by die kitspoeding mengsel asook die kondensmelk mengsel.

4. Vou die malvalekkers, piesangs, neute en kersies in by die res van die mengsel. Skep in bak en laat om te set.

5. Indien jy kreatief wil wees kan die mengsel in ‘n tertpan geskep word en met ander vrugte versier word en neute. Jy kan ook suiker bakkies neem en die vulsel daarin bedien. So speel met die aanbieding van hierdie lekkerny!

Bron: Anke Pienaar, 2016 

Hoeveelheid: 6 porsies.

Saterdag, 26 Maart 2016

Boere Samoosa’s

Ek is baie bevoorreg om toegelaat te word om deel te wees van my Moslem vriendin se gesin. Sy bel gereeld en dan moet ek kom kuier as hulle besig is om vir spesiale geleenthede te kook. In haar nederige kombuisie op die plaas het ek al soveel ure wat ek eintlik in jare al kom omsit, beleef. Vir hierdie wonderlike gesin is dit heerlik om my boerekos te eet en die gevoel is wederkerig. Naceema is veral trots op my fyn oog en hoe vinnig ek tegnieke optel. Ek dink die eending wat ek altyd gevrees het was die eie filodeeg maak. Naceema het lekker gelag oor hierdie reseppie wat ek nou vir julle gaan gee, en dit Boere Samoosa’s gedoop. Eendag as ek moed het sal ek vir julle probeer leer om die regte ding te maak. Maar vir nou...sal hierdie een moet doen! Die verskil met die deeg is dat dit blasies maak en dit dra by tot 'n meer growwer voorkoms as die gladde filodeeg of Puri wat Naceema hulle maak.

Mens is geneig om te dink dat Samoosa vulsels veronderstel is om “nat” te wees. Maar nee, die samoosa vulsel moet droog wees. Wanneer die samoosa gebak word en daar is te veel vog in die vulsel, sal dit in stoom omgesit word en die deeg sal oop bars en die vulsel sal uitloop. Daarom word samoosa’s altyd met ‘n pikante sousie bedien vir indoop om die droëe vulsel aan te vul. 

Ek het ‘n goedkoop pasta masjientjie en ek gebruik dit om die deeg mooi egalig en dun uit te rol. Hoe dunner die deeg hoe krakerigier kom die deeg uit. Ek stel voor jy speel met die deeg en vind uit watter dikte vir jou geskik gaan wees. Ek gebruik die deeg nie net om samoosa’s te maak nie. Ek voeg by die meel 2t Komyn of Vinkel saad en rol dit dan dun uit en vlak vet braai die deeg en bedien dit soos “chips en dip”. Moet asb nie ontmoedig wees om die deeg te maak nie. Die hoeveelheid van die deeg is van so ‘n aard dat maklik gerol kan word met ‘n koekroller.

Resep
Deeg
250g Koekmeel
30ml Olyf olie
130g Water, ja jy lees reg, ek weeg my water! Meeste maatbekers is verkeerd gekalibreer!

Metode:
1. Meng die deeg en knie tot glad en egalig. Laat die deeg vir 2 ure rus voordat jy dit begin rol.

Vulsel
250g Hoender of Bees maalvleis
15ml Olie
1 Ui, klein, fyn gekap
¼ t Kerrie poeier
¼ t Gerookte Paprika
¼ t Fenegriek
Sout en peper na smaak

Metode:
Braai al die bestanddele saam totdat al die vog uit is. Laat eenkant om af te koel.

Tamatie Raita
1k Yoghurt
100g Tamaties, pitte en sap verwyder, vleis fyn gekap
30ml Ui, fyn gekap
15ml Vars koljander (Cilantro), fyn gekap (indien nie invoorraad enige groen kruie blaar)
¼ t Komyn, fyn

Metode:
1. Meng al die bestanddele saam en verkoel tot voorbediening.

Die Samoosa vou
1. Rol die deeg dun genoeg uit dat jy amper daar

deur koerant kan lees...ongeveer 1mm dik. 

2. Sny die deeg dan in repe van 6cm by 20cm. Die deeg wat oorbly word weer saam geknie en uitgerol.

3. Skep ongeveer 2e vulsel op die punt van die samoosa en vou dan in driehoekies. Seel die punte met eierwit. Verkoel die klaar gerolde deeg voordat jy dit gaarmaak. 

4. Voor verhit olie in ‘n pan, diep genoeg sodat die samoosa bedek sal wees. Braai die deeg vinnig tot goudbruin en bros. Bedien warm.

Bron: Annelien Pienaar, www.bosenbergguestfarm.co.za, 2013 
Hoeveelheid: 10-12 Samoomsa’s

Donderdag, 24 Maart 2016

Fyn tee tafel broodjies!

"Al die foto's wat op hierdie werk gebruik is, is sommiges nie my eie nie. My doel is nie om geld met dit te maak nie, maar vir navorsing en inspirasie..." Groete Annelien


Hierdie is vir my 'n pragtige idee met die olyf. Maak 'n salsa van soetrissies en bind met bietjie gelatien. Onder maak jy 'n ricotta en feta lagie. Hou alles bymekaar met 'n stokkie en pragtige gevulde olywe. 

Om toebroodjies altyd klam te hou vind ek dit goed om vars blare tussen die broodjies in te sit om klamheid te behou. Verder het ek 'n spuitkannetjie met water en olie gemeng wat ek goed skud voordat ek spuit. Spuit met 'n ekstra fyn mis net een spuit oor die broodjies voor opdiening.

Hierdie broodjies het avokadopeer vulsel, eiergeel vulsel met mayonnaise gemeng. 

Vars bruinbrood broodjies. Gebruik enige van die bruinbrood resepte op die blog om hierdie uiters vullende broodjies mee te maak. Avokadopeer, mozzarella en blaarslaai afgerond met vars suurlemoensap, sout en peper.


Hierdie verpakking help ook om  te voorkom dat broodjies uitdroog. Hier het ons van onder na bo: tamatie pesto, salami, mozzarella, baba spinasie.
Wens ek kon nou hierdie broodjie gryp en in my piekniekmandjie gooi en hol vir die dam se wal waar die son sopas begin sak het. Parma ham, avokadopeer en slaaitjie.
Volgraan broodjie reseppie van die blog met vars groen kruie, heerlike vars gemaakte ricotta (resep is ook op die blog)...die res laat ek aan die verbeelding oor.
Hierdie styl Ciabata is my gaste se gunsteling waarvan hulle nie genoeg kan kry nie...Ek sny skywe brood, smeer met olyfolie en dan met 'n knoffeltoontjie oor gevee. Daarna pak ek gerookte hoender, groen goeters in die tuin, spek, uie en tuisgemaakte mosterd (resep op die blog).
Nog 'n idee van broodjies wat in bruin papier toe gedraai is om te voorkom dat dit te vinnig uitdroog. Die lae vertel self die storie.

Halwe pannekoek met salm opgerol


Ek het onlangs van hierdie vurkies by Woollies gekry. Tuis gegroeide alfafa sade, maaskaas en komkommer lagies...
Ek dink hierdie kan nogal heerlik afgaan met so 'n stukkie spekkie tussen in...spek en heuning werk baie goed saam.
Koekie drukkers is 'n goeie idee om spesiale tee partytjies se temas mee uit te beeld soos 'n baba tee of ietsie fyn vir 'n verjaardag..
Die foto sê alles!


 Soet maaskaas vulsel, ietsie soortgelyk aan 'n bloubessie kaaskoek! Dekadent en keurig.
 Pragtige oop broodjies.
 Maaskaas is en bly altyd 'n goeie neutrale basis om brood lagies aan mekaar te hou. Maaskaas kleur ook maklik met kruie en speserye soos borrie, saffraan, bessie sap ens.
 Hierdie is wel nou nie broodjies nie maar Skilferkors deeg wat in klein vierkantjies gesny is met kouevleis en kaas vulsel. Verder aan mekaar gehou met 'n tande stokie. Hierdie happie kan ook gevul word met 'n tuna mousse om te voorkom dat die degie droog is en in die keel vas steek...
Hierdie broodjie skree "hap my asb!" Eenvoudige vulsels, maar die kontrasterende oranje wat afgerond word met die tikseltjie groen van die blaartjies maak dit net sprokies mooi.
 Hierdie brood neem ek is vooraf gekleur tydens die knie proses en dan so in lagies gensy. Perfek vir 'n ooievaars tee.

Onlangs het die broodbakker in my dorp my baie skuins aangekyk toe ek vra dat hy die brood vir my deur sy snymasien moet sit...Daai ene by die deur waar jy die brood self kan laat sny. Die brood moes nie soos gewoon ingaan nie, dit moes in baie lang skywe gesny word. Dus het ek uit een brood ongeveer 8 snye gekry, Met dit kon ek lang repe kry wat mooi spirale kon vou om broodjies soos hierdie te maak sonder dat die bene soos die van sleg vroue oopspring!
 Ham, kaas en tamatie broodjies met sout en peper bly my gunsteling. Maar ek HAAT dit as brood pap word van die sap van tamatie. Dus maak ek seker ek sny die tamatie en laat dit vooraf op kombuispapier droog word voordat dit op die broodjie gaan. Sit liefs die kaas en ham eerste en laate die tamatie...
 Verskeie spesialiteitsbrode met ham, komkommer en gekookte pasta toegedraai.


As jy van lyne hou is hierdie die perfekte "canape" vir jou...kyk hoe mooi kan eenvoudig bestanddele rangskik word. 
 Moenie bang wees om met Canapes te speel nie...kyk hoe mooi vertoon die broodjies.
Kyk hoe slim! 
 Wees versigtig as jy vulsels maak soos met die beet een dat dit nie te nat is en in die broodjie bloei. Onthou, mens eet eers met die oog, dus is netheid en goeie afronding van uiterste belang.


Kinder speletjies!!! Aarbei konfyt en room? 

Woensdag, 23 Maart 2016

Bief Stroganov (ja die spelling is reg!)

Die resep is van Russiese afkoms. As voedsel student was hierdie gereg een van die disse wat van jou as student verwag was om te maak sonder om na ‘n resep te kyk. Eintlik is dit ‘n tegniese dis om te maak. Nommer een moet jy die vleis goed seel deur klein hopies vleis oor hoë hitte te braai sodat die vleis sappe behoue bly. Daarna word die vleis in meel gerol en dan verder met ‘n aftreksel, uie en sampioene gekook tot murg sag. Die dis word dan later met room afgerond voor opdiening. Na jare se resepte toets het ek soveel weergawes van die resep gesien, sommiges verdik hul souse ander doen dit glad nie. Die resep wat ek vir julle gee is iets wat van my studente jare kom en so aangepas totdat ek van die smaak hou. Dus het ek die oud met nuut gekombineer. Deesdae as ons bees slag gebruik ek die taaier snitte soos bolo om die dis mee te maak. Ek gebruik ook dan die hutspot sodat die vleis heerlik sag kan word. Geniet!

Resep
15 ml Olyf olie
15 ml Botter
1 Ui, fyn gesny
250 g Knopies sampioene, fyn gesny
5 Stingels seldery, fyn gesny
500 g Beesvleis blokkies of repies
30 ml Koekmeel
90 ml Brandewyn
250 ml Vleis aftreksel
2 Lourier blare
15 ml Geel mosterd sade
250 ml Suur room
5 Stingels seldery, fyn gesny

Metode:
1. Voor verhit ‘n pan oor hoë hitte. Sny die vleis in blokkies of repies en braai in klein hopies (handjies vol) tot gaar. As jy te veel vleis op ‘n slag in gooi gaan die pan se hitte val en die vleis sappe gaan uitvloei. Dus werk vinnig en klein. Plaas die gebraaide vleis in ‘n kastrol waarin die res van die bestanddele later gevoeg gaan word. Sodra al die vleis gebraai is voeg die koekmeel oor die blokkies vleis en meng deeglik deur. Hierdie meel dien as die verdikker van die sousie.

2. Braai die uie, sampioene en seldery in die vleis pan. Verwyder van hitte en voeg by die vleis. Plaas die pan terug oor hitte en voeg die brandewyn by en steek aan die brand. Die brandewyn dien as geurmiddel, maar indien jy kinders gaan voed, flambe eerder die alkohol sodat dit kan verdamp. Voeg die aftreksel by die pan en kook sodat die vleis en groente kan oplos. Voeg dan die sous by die vleis en groente in die groot kastrol. Voeg die lourier blaar en mosterd sade by.

3. Kook oor medium hitte en roer van tyd tot tyd. Hou die deksel op vir hierdie tyd. Indien jy die hutspot gebruik sal dit 6-8 ure duur. 

4. Net voor opdiening roer die suurroom by die gereg en sout en peper na smaak.

5. Bedien met rys, pasta, aartappels of cous-cous.

Bron: Annelien Pienaar, www.bosenbergguestfarm.co.za,2016 

Hoeveelheid: 4 porsies

Baklava

Hierdie is een van my stoutste bederfies aan myself. 

Resep
500 g Fillo deeg
1 k Amandels gemaal
4 - 5 k Amandels of Pekans grof gekap
1 k Pistasio neute gekap
300 g Strooisuiker
1 t Kardamom, gemaal
345 g Botter

Stroop
400 g Suiker
500 ml Water
125 ml Goue stroop of heuning
30 ml Suurlemoensap
15 ml Rooswater

Metode:
1. Meng die neute en die suiker met die kardamom saam. 

2. Smeer ‘n 36 x 27 x m bak met gesmelte botter uit.

3. Sny die deeg in die grootte van die pan. Hou die deeg sag deur dit op ‘n koekroller te rol en dan met ‘n klam doek toe te maak.

4. Pak nou eers ‘n laag filodeeg teen die kante van die bak asook die basis. Gebruik die afval stukkies vir hierdie deel. Pak dit in twee lae. Sprinkel nou die neute mengsel eweredig oor en plaas weer twee velle filo deeg op die neute, hou so aan totdat die lagies voltooi is met ‘n laaste dubbellaag filo.

5. Sny nou die filo met ‘n skerp mes direk in die bak in die vormpies wat jy wil hê, dit kan in diamantvorm, vierkantig of reghoekig gesny word.


OF 

Sny die deeg in lang repies van ongeveer 4 - 5 cm breed en 25 cm lank. Skep van die vulsel oor en rol op. Gaan aan met stap 6.

6. In ‘n dun straaltjie laat die gesmelte botter oor die deeg loop. Bak die deeg by 160 ℃ vir 60 minte tot 90 minute. Die deeg moet goudbruin wees voordat dit uitgehaal word.

7. Maak dan die stroop terwyl jy die laaste 10 minute wag. Kook die water en die suiker saam, totdat dit ‘n stoop word oor hoë hitte. Voeg die stroop of heuning by asook die suurlemoensap. Laat weer opkook en haal van hitte af. Sodra die mengsel afgekoel het tot lou, voeg die rooswater by. Laat goed afkoel. Voeg die koue stroop oor die warm deeg en laat dit vir ‘n dag staan om goed in te trek.

Bron: Annelien Pienaar, www.bosenbergguestfarm.co.za, 2016

Hoeveelheid: Ongeveer 50 stukkies as jy mooi sny.

Maandag, 21 Maart 2016

Geurige Hoender gereg

Soms is mens lus vir iets wat maklik en eenvoudig is sonder veel fieterjasies. Ek is baie lief vir die gebruik van my Hutspot of alom bekend as die Slow cooker. Hierdie heerlike gereg kan dan met verskeie soorte rys, stampmielies of verdik word om as pasteivulsel te geniet.

Resep
30ml Botter
4 Hoender borsies, ontvel en ontbeen
Sout en peper na smaak
250g Sampioene, gesnipper
1 Ui, klein, opgekap
2 Knoffel toontjies, gekap
15ml Dill of Tiemie, gedroog
15ml Borrie
5ml Paprika, gerook verkieslik
100ml Wit wyn
125ml Hoender aftreksel
125ml Room
15ml Growwe Dijon mosterd, sade kan ook werk as jy nie mosterd in voorraad het
15ml Gladde Dijon mosterd of enige ander
30ml Heuning

Metode:
1. Braai die hoenderborsies met botter tot goudbruin aan die buite kant, maar nie gaar. Die vleis sappe moet net ingeseel word. Verwyder uit pan en sit in Hutspot. Voeg die sampioene en uie by en braai verder tot die sap van die sampioene uitgekook is. Plaas alles in hutspot.

2. Meng die res van die bestanddele by behalwe die room. Laat die vleis kook vir ongeveer 6-8 ure. Indien jy verkies om groente by te voeg, kan jy teen ongeveer 3 ure bysit.

3. Sodra die vleis baie sag en gaar is voeg die room by en roer goed deur. 

4. Bedien dadelik met ‘n bed van gegeurde rys, soetrissies en skyfies suurlemoen.

Bron: Annelien Pienaar, 2015, www.bosenbergguestfarm.co.za
Hoeveelheid: 4 porsies

Vrydag, 18 Maart 2016

Koekepanne smeer

So kuier ons vandag en ek soek al vir weke na my ma se resep vir “Tin glide”. Ja, diegene wat nie baie bak sal wonder waarvoor die goete gebruik word. Ek het as kind asma ontwikkel en selfs nou as volwassene moet ek uiters versigtig wees vir kleefwerende kos sproei. My ma het hierdie reseppie altyd gebruik in die plek van Spray ‘n Cook. Dit werk op die ou einde baie goedkoper uit. Ek het self vir my tuisnywerheid gebak en het hierdie stukkie papier soos goud opgepas. Ek waarsku egter om nie botter te gebruik in die plek van die smeer nie. Die produk word by kamertemperatuur gestoor en die botter gaan baie gou af. Die margarien hou baie lank. Indien jy die mengsel in die yskas wil stoor haal dit net lank genoeg voor die tyd uit om weer loperig te word. Anders kan jy net 'n stukkie waspapier neem en smeer soos jy met botter sou doen in die ou dae.

Resep
115g Rama of Stork bake, sag by kamertemperatuur (1/2k)
125g Sonneblom olie (1/2k)
70g Koekmeel (1/2k)

Metode:
1.      Plaas al die bestanddele in ‘n mengbak of voedselverwerker, en meng die mengsel totdat dit goed deur gewerk is en eenvormig lyk.

2.      Stoor die produk lugdig by kamertemperatuur om smeerbaar te bly.

3.      Gebruik ‘n kwassie en wend die mengsel mildelik op alle baktoerusting aan.

Bron: Hantie Bezuidenhout, 1975, www.bosenbergguestfarm.co.za
Hoeveelheid: 310g ongeveer





Donderdag, 17 Maart 2016

Romerige Botterskorsie sop

Sop is en bly feesmaal....veral as jy die slowcooker inspan om die werk vir jou te doen!

1. Wanneer ons van sop praat dan moet ons eers terug kyk na die ontstaan van soppe...my idee van sop toe ek klein was...dit is vir mense wat baie siek en swak was. Maar hoekom sop? Wel die Franse het die antwoord...al hulle soppe en souse se basisse is 'n goeie aftreksel wat as basis vir elke sop gebruik word.

2. Aftreksel kan van bees, vark, skaap, hoender en selfs groente gemaak word. Meeste van die tyd word bene opgesny, gerooster om effens te verbruin en dan eers in koue water gesit om al die "goeie goed" uit die bene te onttrek. Hierdie proses neem so 2-3 ure...wat ek met my bees skenkels doen is om dit die aand voor die tyd in die slowcooker te sit met koue water...cooker nie aan nie...en dan voeg ek die volgende dag die res van die bestaddele by en vanaand het ons heerlike sop. Julle sal merk as jy die bene in die koue water sit vir die onttrekking van die nutriente dat na 3 ure jy sal sien hoe die water om die bene en vleis 'n rooi sirkeltjie vorm...dit is waar die krag vir die siekes vandaan kom.

3. Die resepte is geskryf sonder die aftreksel...ons gebruik hier kits aftreksel...wat ek wel tuis doen is om vir beide resepte se water 'n paar bene voor die tyd in te sit en dan punt 2 toe te pas... al die heilsaamheid van die bene is in die water wat ons gaan gebruik. 

4. Die Maleiers en Indiers is baie lief om suurlemoen wiggies saam met alle soppe te bedien...ek het eers gedink dit is nie lekker...maar prober dit...die suur komplementeer die kruie en speserye ongelooflik.

5. Vir 'n bykos bedien ek dyn repe butternut wat met olie gespuit is en in die oond gebak is...ek skep sommer my soppe met dit...soos jy crutons of brood sou gebruik...

Botterskorsie sop (Butternut)
6 k Botterskorsie blokkies (3 medium pampoene)
750 ml Water
1 Strooitjie van Ina Paarman se Vegetable stock
500 ml Melk
2 ml Neutmuskaat
1 ml Gemmer
1 ml Kaneel
Sout en peper na smaak
250 ml Room (opsioneel, net vir garnering)

Metode:
1. Plaas al die bestanddele behalwe die room in ‘n slowcooker en skakel op “high” en laat vir 8 ure of oornag gaar word.

2. Puree die bestanddele en vryf die mengsel deur ‘n sif om dit sysag te laat.

3. Roer die room by net voor opdiening. Plaas ekstra room op die tafel vir diegene wat hou van daar die ekstra skeutjie room.

Lewer ongeveer: 2 liter sop

Opgestel deur: A Pienaar, Bos en Berg guestfarm, 2009

Woensdag, 16 Maart 2016

Kort vierkantige "cupcake" papiertjies?

Die foto reeks is nav 'n navraag vir vierkantige "cupcake" papiertjies. Ek het self ook 'n stel van die pannetjies en in die handel is daar glad nie vierkantige papiertjies beskikbaar. Daar is wel vierkantige versierde bakkies waarin jy kan bak. Maar ek weet nie of dit so gesond is as dit verhit word. Ek bly maar weg daarvan. Ek bedien wel die cupcakes binne in die bakkie.

Maar vir nou het ek vir julle 'n fotoskyfie reeks saam gesit om te verduidelik hoe dit werk. Jy kan die mooiste waspapier by bakkerswinkels vind. Hierdie was die Kerskoeke se waspapier...Klik asb op die foto om dit groter te maak. 

Die foto's moet van links na onder en van onder na regs en dan weer regs op gelees word.

Foto 1
Dit is nou die middelste foto en 'n voorbeeld van hoe 'n netjies gevoude papiertjie moet lyk. Sny solank 'n stukkie papier perfek vierkantig.

Foto 2
Begin deur 'n harde stukkie karton te meet en te sny nav die basis van die pannetjie se grootte.

Foto 3
Vou en plak nou die hoekies aan mekaar.

Foto 4
Pas die templaat in die pannetjie en maak seker dit pas maklik in.

Foto 5
Vou eers die papiertjie van hoek tot hoek. Hierdie diagonale lyne gaan jou help as ons nou die papiertjie op die templaat pas. Maak seker die skuinslyne pas perfek oor die hoeke. Vryf nou die kante van die templaat sodat dit duidelik as voulyne kan wys. Haal die papiertjie af en vou nou die lyne wat jy gemaak het weer oor sodat dit duidelik sigbaar is.

Foto 6
Soos jy op die foto kan sien het ek net vir hierdie demonstrasie doeleindes die lyne ingetrek. In die regte opset gaan dit nie nodig wees nie want jy sal die lyne wel met die blote oog kan sien.

Foto 7
Hier verduidelik ek dat die hoekies na mekaar gevou moet word sodat dit perfek kan invou in die vierkantige holte van die pannetjie. As jy dit nie so doen nie en die papier inforseer, gaan die gebakte koekie soms diep kreukels maak en die papier kan selfs afskeur en daar binne bly.

Foto 8
Voorbeeld van hoe die reguit lyne op die diagonale lyne gaan pas, vou al die voulyne wees goed in.

Foto 9
Kyk hoe perfek pas die hoek in die pannetjie in. Dit laat ook die haasoortjies perfek regop staan.

Bron: Annlien Pienaar, www.bosenbergguestfarm.co.za, 2016

Maandag, 14 Maart 2016

Brandewyn en Karamel Botter

Goed, as jy regtig die bederf van jou lewe wil hê dan is dit hierdie botter saam met enige soet muffin, brioche, piesang- of dadelbrood, mosbolletjie broodjie wat in skywe gesny word, gerooster, franse roosterbrood, plaatkoekies, croissants en vele meer! Jy kan selfs klein koekies soos koffie koekies aan mekaar plak met hierdie dekadente botter. Spuit die klaar botter in 'n mooi glasflessie en plaas in yskas om te set. Haal uit net voor opdiening om sag te word en dink net hoe mooi kan jy met die kleure speel om 'n fyn tafel op te tower!

Ons het met die botter groot geword en vir een of ander rede het dit uit gebruik geraak. Op ‘n stadium blaai ek deur my ma se verflenterde resepte boekie wat sy so gereeld gebruik het en kom op die eenvoudige reseppie af. Dit hou regtig lank in die yskas en kan ook gevries word. Maar voor dit by vries uit kom...wel dan is dit op!

Resep
250g Botter, kamertemperatuur (moet botter wees)
250ml Versiersuiker
65ml Brandewyn (1/4k) of heuning of amarula...speel met die smake!
1t Suurlemoensap
1t Karamel geursel
*variasies: gerasperde wit sjokolade, stukkies sjokolade, chaiseeds, fyn nuete in die beslag, kaneel, karamel...

Metode
1. Room die botter tot sag en romerig. Geen klonte mag sigbaar wees nie. Voeg dan die versiersuiker by en klits tot lig en donsig vir ongeveer 5 minute.

2. Voeg die brandewyn by en klits weer vir 2 minute deur, voeg laaste suurlemoensap by en klits weer 2 minute!

3. Spuit in houertjies of individuele porsies, groot genoeg vir een smeerseltjie. Ek het al van hulle so perfek gespuit dat dit soos 'n macaron uitgekom het! Rose spuit ook mooi met hierdie mengsel, maar maak seker die konsistensie van die botter is spuitbaar. Laat effens warm word in so indien nodig.

Bron: Annelien Pienaar, 2016, www.bosenbergguestfarm.co.za
Hoeveelheid: 500g smeersel


English Version
Recipe
250 g butter, room temperature (must be butter)
250 ml Icing
65 ml Brandy ( ¼ cup) or honey or amarula ... play with the flavors!
1 t Lemon juice
1 t caramel flavoring

* VARIATION: grated white chocolate, chocolate pieces chai seeds, fine nuete in the batter, cinnamon, caramel ...

Method:
1. Cream the butter until soft and creamy. No lumps may be visible. Add the icing sugar and beat until light and fluffy for about 5 minutes.

2. Add the brandy and whisk again for 2 minutes, add lemon juice and whisk again for 2 minutes!

3. Pour into containers or individual servings, enough for one serving. I piped them so perfectly that it came out like a macaroon!
Roses can also be piped nicely with this mixture, but make sure the consistency of butter is sprayable. Leave to warm a little if necessary.

SOURCE: Annelien Pienaar, 2016 www.bosenbergguestfarm.co.za


QUANTITY: 500 g spread.

Pekeling van vleis, maak jou eie Gammon

 Ek is baie lief vir “gammon”, stukkie gesoute “silverside” skyfies en enige soutvleisie. Daarom het ek dit goed gedink om julle te leer hoe om groot stukke vleis te pekel en gaar te maak. Ek het op hierdie resep afgekom wat ek op ‘n keer vir studente geskryf het tydens ‘n Charcuterie les. Lees asb eers baie goed deur die werk om jouself te vergewis van die alles.

Hierdie tegnieke wat ek beskryf kan vir vark, bees, skaap en selfs wildsvleis gebruik word. Lekker leer! Kyk op www.boerekostwist.blogspot.com vir die artikel oor die Rook van vleis op die stoof wat aansluit by die pekeling les.

Les
1. Ons gaan die natpekel metode toepas omdat dit die vleis baie minder laat krimp as met droogpekeling en ek gaan 'n soetham resep gee.

2. Die water moet eers gekook word om dit suiwer te maak.

3. Voeg dan die sout, suiker en koeksoda (salpeter kan ook gebruik word) en roer goed totdat alles opgelos is. Giet die mengsel deur 'n gaasdoek om onsuiwerhede te verwyder. Laat die oplossing heel te mal afkoel.

4. Vir 'n boud van 5-15kg gaan jy 'n sout oplossing maak van:
10l Water
90-120g Salpeter of Koeksoda
120g Suiker
1.9kg Sout

5. In 'n bondeltjie bind jy met gaasdoek die volgende korrels vas wat in die pekel saam met die vleis gaan...
30g Swartpeper korrels
30g Wonderpeper korrels
45g Koljander korrles, geskroei
30g Foelie (dit is 'n krui nie die metaal) (Mace is die engelse naam)

6. Onthou 'n ontbeende boud neem vinniger om te pekel as een wat nog been aan het.

7. Wanneer die boud wel ontbeen word moet jy gelatien in die holte strooi, rol die boud op met die velkant na buite. Waar die velgedeeltes bymekaar kom, werk vas met tou en bind die boud verder vas met 'n tou netwerk om alles mooi bymekaar te hou en ook vorm aan die vleis te gee.

8. Vir 'n 6kg varkboud aan die been is die pekeltyd 4-6 dae, as dit ontbeen is: 3-4 dae. Onthou die pekel se indrining is 25mm in 2 dae...onthou ook dat ontbeende vleis vinniger pekel.

9. Jy kan ook van die pekel met 'n beesspuitnaald in die vleis spuit om die pekel tyd te bespoedig. Maak seker die spuit word met seep en water skoon gemaak en los van mekaar gestoor sodat bakteriee nie kan groei. Ek kook my instrumente in sterk sout water vir 5 minute.

10. Plaas die vleis in die afgekoelde pekel en stoor dit in 'n PLASTIEK en geen metaal houer in die yskas vir die verlangde tyd. Draai die boud elke dag en roer die water goed sodat die sout weer eweredig versprei kan word.

Gaarmaak van gepekelde vleis
Ek sny die vark se velle 'n diamant patroon en bak dit vir 1 1/2 uur in die oond sonder die sousie en geur middels. Vir die laaste 30-60min voeg ek die volgende taai sous wat ek eers effens verhit om alles te laat smelt by die vleis...verf met intervalle met kwassie oor.

1/2k Melasse
1/2k Sagte bruinsuiker
1/2k Fyngemaakte pynappels
1/2k Heuning
1/2k Appelsap
1/2k Woestersous
Sout en peper na smaak

Trussing/Bind werk van vleis Video
https://www.youtube.com/watch?v=rFIwbUBiRSE


Resep: Mev. A Pienaar. Food Prep, 2004, Tshwane North FET

Saterdag, 12 Maart 2016

Tuisgemaakte Pektien

Wat is Pektien?
Dit is die jellievromende bestanddeel wat in vrugte voorkom. Party vrugtesoorte is ryk en ander minder ryk aan pektien. Die hoeveelheid en gehalte varieer na gelang van die soort vrug en die rypheid en gehalte varieer na gelang van die soort vrug en die rypheid en varsheid daarvan.

In groen vrugte kom die pektien nie so sterk voor nie...dit is wel teenwoordig...maar namate die vrug ryp word verhoog die pektien status. Wanneer die vrug pas ryp is, is die pektien inhoud op sy piek. Sodra die vrug verlep of ouer word breek die pektien van nature af.

Pektien kom in die selwande van die skil en die klokhuis (pitgedeelte) voor. Daarom word die hele vrug gebruik as ons self pektien maak.

Suur is ‘n baie belanrike faktor in die vorming van ‘n goeie gehalte jellie...dit is die basis vir baie konfyte...daarom moet ons die pektien en suur balans regkry.

1. Kommersiële Pektien
Kom in poeier en vloeistof vorm. Beide moet in die vrieskas gehou word. Poeier pektien word by die vrugtesap gevoeg voor dat dit tot kookpunt verhit word.  Wanneer die sap dan die rolkookstadium bereik, word die suiker eers bygevoeg. Die mengsel word weer tot die rolkook stadium gebring en 1 minuut lank gekook.

Vloeibare pektien word by die sap en suiker gevoeg nadat die mengsel tot kookpunt bereik het. Roer dit by die mengsel en bring weer tot rolkook stadium en kook 1 minuut lank. (Rolkook...as die kooksel sulke wolkies maak en opkook...) 

Kommersiële pektien is nie my persoonlike voorkeur nie want elke verskaffer se dosering is verskillend, dus is jou resultate nie gewaarborg nie. 

2. Tuisgemaakte Pektien
Kan met appels of sitrus gemaak word. Appels gee ‘n neutrale en dilikate geur...waar sitrus neig om ‘n bitter smaak te gee. Toets die vrugte sap om die pektien inhoud te bepaal. Sien pektien toets onder aan... Voeg van die pektien aftreksel  by die vrugte sap as die pektieninhoud nie voldoende is nie. Die hoeveelheid wissel van 15-250ml aftreksel per 500ml sap.Toets die sap weer en bereken die hoeveelheid suiker volgens die pektien inhoud.

Kook van Tuisgemaakte Pektien
Appel Pektien
1kg Suur appels (Granny Smit)
1liter Water

Metode:
1. Was en sny die appel met al sy dele in stukke. Bedek met water en kook in kastrol met ‘n toe deksel totdat die appel sag is. Nie pappery nie, anders gaan die jellie of marmelade wat jy kook nie helder wees nie.

2. Syg die appel deur ‘n gaasdoek of jellie sak...moenie die sak druk om meer vog uit te kry nie...die vloeistof gaan wolkerig word en jou jellie of konfyt gaan nie helder en deurskynend wees.

3. Kook dan die vloeistof baie vinnig tot dat dit met die helfte weg gekook het.

4. Kan in gesteriliseerde flesse baie warm gebottel word vir latere gebruik...ek stoor myne in die yskas en gebruik soos nodig. Dit kan bevries word.

Pektien Toets
(Jy gaan die monster weg gooi na die tyd, moenie in kooksel terug sit nie)
1. Voeg 10ml van die afgekoelde sap by 20ml brandspiritus in ‘n deurskynende glas. Moenie roer nie, maar draai die glas in die reondte om die twee vloeistowwe te meng. 

2. Laat staan ongeveer 1 minuut lank en gooi dan versigtig in ‘n pieringkie uit.

3. Let op die styfheid van die klont wat vorm, dit is hoeveel suiker dan vir die resep benodig sal word:

a. Een stewige klont: 200g suiker per 250ml sap
b. Twee klonte: 160g suiker per 250ml sap
c. As ‘n klomp klein klontjies vorm moet jy nog pektien byvoeg en weer die toets doen totdat jy a of b bereik.

Pektien- en Suurinhoud van Vrugte
Vrugte wat ryk is aan pektien en suur is, is die beste om te gebruik as ons vrugte jellie kook. Vrugte wat vroeg in die seisoen gekook word se pektien inhoud is beter en kan met pasryp en groen vrugte gemeng word. Vrugte wat te min suur bevat maar hoë pektien inhoud het moet daar altyd ‘n suur bygevoeg word...MOENIE van vrugte wat arm is aan suur en pektien probeer jellie maak nie...jy gaan jou tyd en bestanddele mors.

Die funksie van suur in jellie en konfyt oor die algemeen:
In jellie help die suur die pektien om te set of om te verstewig. Wanneer ons konfyt kook verhoed dit dat die eindproduk sandsuiker word...Nou hier is ‘n geheimpie wat ek deur die jare geleer het oor konfyt kook en sandsuiker...Wanneer suur bygevoeg word in die kook proses word dit eers teen die einde bygevoeg. Ek weet nie hoekom nie maar vandat ek dit doen het ek nog nooit weer probleme met sandsuiker gekry nie...So maak maar daardie knoop in die oor. Die suur wat gewoonlik gebruik word is VARS suurlemoensap (die soort wat jy in botteltjies koop...’n poep teen ‘n donderweer...dit is water!!), ek gebruik NET sitroen suur (citric acid) of wynsteensuur. Onthou jy moet nogsteeds die kante van jou kastrol met ‘n kwassie water afwas om die suiker kristalle op te los voordat die stroop begin kook...anders kweek jy ‘n teelaarde vir die suiker kristalle om te wil kristaliseer.

Vrugte wat ryk is aan suur en pektien: appelliefies, kei-appels, koejawels, kwepers, logan bessies, lukwarte, maroelas, pitlemoene, pomelo, pruime, rose hip, suurappels, suurlemoene.

Vrugte wat ryk is aan suur maar min pektien: aarbeie, oorryp appelkose, granate, pynappels, rubab.

Vrugte wat ryk is aan pektien maar min suur:  appels met lae suur, ryp kwepers

Vrugte wat te min pektien en suur bevat: frambose, ryp pere, perskes, oor ryp vrugte, ryp vye.

Bron: Annelien Pienaar, FB, my groep Boerekos met ‘n Twist vir resepte met ‘n les

Donderdag, 10 Maart 2016

Binnelandse sake en die Simbaskyfie fabriek

Een ding wat die voedsel industrie my geleer het is “time management”. Geen sekonde van my dag word gemors nie. Ek het elle lange lysies wat ek weekliks opstel om my drywende breinselle bymekaar te hou om choas te vermy. Ek kan nie lewe sonder om te beplan. Nee, ek “freek” nie uit as iets buite die beplanning gebeur nie, want ons is geleer dat niks ‘n “train smash” is en as ‘n “blessing in disguise” gesien moet word. Dus word jou kreatiewe denke gereeld uit die boksie waarin jy leef getrek en jy word tot die uiterste getoets...tot vandag!

Kom ons begin by die begin. Ek het ‘n Trust en goedjies moet daar verander na die afsterwe van my ma en sus. ‘n Paar weke gelede kom ek by die bank en word vertel die geboorte sertifikate van die oudste twee kinders word as "onwettig" beskou. Ek was na 6 weke met die bank in ‘n stryd gewikkel oor die nonsens! Verder het die oudste kind 16 geword hierdie jaar en is nou tekenmagtig! Bid jou dit aan en in moed verloor se vlakte sit ek net en kners op my tande. Sussie se geboorte sertifikaat is niks mee fout. Dit beteken na 4 weke se uitstel weens kook klasse wat tot barstens toe vol is, dat ek die hele dag opsy sit vir die tog na Binnelandse sake vir die “wettige dokumente”.

Nou goed, ek staan in ‘n tou van voor 08h00 vanoggend. Kom by die deur en die man vra elke liewe siel wat hul saak is. Goed, sommiges word weg gewys en ek begin al kriewelriger raak want ek het nie ‘n minuut om te mors. Kom by die man en hoor my storie aan en ek mag oor die drumpel stap in Binnelandse sake in. Dit voel kompleet of jy ‘n heilige plek betree! Daar voor my blom ons liewe staatspresident in al sy onbevoegdheid en as my oë vuur kon spoeg, was hy toast! Langs sy foto hang Nelson Mandela sin en ek dink by myslef, dat dit ‘n klap in Mandela se gesig is om langs so ‘n pierewaaier te hang...wens in my stilligheid Zuma val van die muur af! Mandela draai in sy graf om as hy moet weet wat vang die knaap aan!

Ek gaan weer in ‘n lang tou staan. Soos ons staan probeer ek by mense wat soos personeel lyk wat verby kom uitvind of die geboorte sertifikate onwettig is. Elke keer hoor ek net “please wait your turn”, ek staan vir 2 ure op die een been en dan die ander, net om te hoor of dit ‘n ja of nee moet wees. Ek het vir my leesstof ingepak, ‘n lekker broodboek van oorsee wat ek van ‘n vriendin in Amerika gekry het. So in die staan lees ek die storie en resepte van Lionel Poilane en ek dink sy seun het oorgeneem Max. Baie lekker lees stof, so lekker dat almal voor my indruk. Op ‘n stadium tik ‘n swart vroutjie met ‘n pragtige vet baba seuntjie op die rug my op die skouer en wys ek moet vorentoe beweeg. Ek het my verkyk aan die vette dingetjie. Vreeslik vriendelik. Ons raak toe aan die gesêls en sy is baie verbaas dat ek vlot Sotho praat. Ek verduidelik dat my ouers van ons dit verwag het en omdat ons op die plaas groot geword het was dit maklik. So kuier ons tot voor. Ek pak die boek weg en begin weer my hele relaas oor die onwettige geboorte sertifikate!

Nee, kom dit van die uiters “onbehulpsame” dame, ek moet R40 per sertifikaat betaal en dit moet in kontant wees. Ek wou ‘n aar bars van woede, kan hulle nie ‘n bordjie op sit wat sê geen kaarte slegs kontant? Wonder in my stilligheid wat word van die kontant! In my heel vriendelikste en mooiste stem vra ek of ek my plek in die tou gaan verloor as ek gou uitgaan om die geld te trek. Nee, sal nie ‘n probleem wees. So stap ek met die pakke dokumente wat ek moet invul deur toe. Word toe voor gekeer deur die wag en ek word gesê ek mag nie die dokumente uit neem nie. Ek gee hom die papiere en sê hy moet vashou ek kom. Gaan na ‘n winkeltjie langsaan en vra of ek my kaart kan gebruik om geld te trek sonder om iets te koop. Die man is behulpsaam en binne 5 minute staan ek weer voor die tronk. Verduidelik weer en skree toe deur die hek vir die binneste wag om vir die buitenste wag te verduidelik ek mag “regmatiglik” weer in kom. Die toue mense staan 1 blok ver. Ek kan sien hulle lyk bedonderd dat ek sommer so mag ingaan. Ek voel skuldig maar ek het reeds 2 ure se staan agter die blad. Stap in en hulle verduidelik ek moet na toonbank 4 gaan.

Ek sit die vorms en invul en dink so in my enigheid, hoekom kan hulle nie as jy by die deur inkom vir jou die prosesdures verduidelik dat jy nie vir ure staan om weer terug gestuur te word. Hoekom kan ek nie sommer net gou ‘n vragie vra, hoekom moet ek 2 ure wag om te hoor of ek moet of nie moet her registreer? Ek sien dat daar 7 werkstasies is en net 2 word beman. Die een deur ‘n man en die ander deur ‘n simba chip fabriek dame...sy sit die groot simba chips pak langs haar neer en elke keer skree sy oor die mikrofoon, “Number 23 to cube 2”! Dan sit sy met daardie vieslike vuil hande op die sleutelbord en tik. Daarna vat sy met daardie einste vuil vingers aan die mense se hande om die vinger afdrukke op die elketroniese vinger afdruk masjien te doen. Ek is sommer naar en voel alles draai om my, sy vat nie aan my nie. Die beste kom nog, die grote man staan op, vat ‘n handvol van die chips en skeur die gedrukte geboorte sertifikaat vir die volgende slagoffer af. Jip, daar sit die vetkolle, ek kan dit van 20m ver sien! Ek krimp in een en my binneste hakkel soos n kat en ek vra die Vader om groot asb my hand te vat, my binneste wat soos ‘n bol gloeiende kole voel net te blus. Ek kyk op en die Vader maak my stil.

Ek haal diep asem en dink by my sigselwers. Hou bietjie die mense dop, ek sit vir 5 minute en daar sien ek die moeilikheid. Die dame wat by ontvangs sit het nie vir my gesê ek moet eers na die kassiere en dan na hokkie 4. Nee, ek sien hoe baie mense van alle rasse deur loop en weer agter in die ry moet staan. Ek vra ‘n ou man wat voor my staan, in sy beste kispak wat na mot bolle ruik of hy my plek sal hou. Ek vra die persoon agter my of dit reg is. Ek verduidelik vir die twee wat ek gaan doen en ek sal weer vir hulle plek hou as hulle gaan betaal. Beide stem in en ons hou by ons woord. Kan jy glo, net deur vriendelik te wees met my medemens en te onderhandel deur goed logies te verduidelik, het die woord soos veldbrand versprei en daar vlot die stroom vinniger en die tou word van ure na minute korter. Hel, wat gaan aan met die mense? Hoekom ons tyd mors, almal van ons moes ‘n dag verlof insit om ons papier werk te kom doen, besef hulle nie ons verloor geld? Ek vul beide kinders se vorms in, gaan na die kassiere en vertel hom my storie, hy reken die dokumente is nie onwettig nie. Maar stel voor ek doen die verandering want die nuwe geboorte sertifikate lyk baie anders. Betaal met knersende kake die R80.

Goed ek gaan staan-sit weer in ‘n lang tou. Die swart vroutjie van te vore met die oulike kleinding,  kom na my toe, en ek kan sien sy is erg verleë. Ek staan op en vra wat fout is, eerste ding wat ek dink, sy het nie geld nie. Nee, sy kan nie lees nie! So sit ek en vul haar papiere in. O, het ek vergeet om te sê dit moet swart pen wees? Nee, die bliksems spraak gin sprook oor niks. Ek blou pen beide van ons dokumente te lekker. Kom voor en ek kry raas oor die bloupen. Ek verduidelik toe maar die “ander vrou” en ek roep die dame wat ek gehelp het nader en sê hare is ook in blou. Noem niks dat ek dit ingevul het. Hy kyk my kwaai aan...”Ok don’t do it again, Mam”. My binneste antwoord terug op sy wipperigste: “Oh you can be sure I will not come back for bad service very soon my dear!”. Toe kan ek nie help nie, haal die wetwipes uit en vra dat hy sy hande sal afvee voordat hy aan my papier vat want ek het gesien hy eet en praat op sy foon in werkstyd. Wit in die gesig staan hy op gryp die lappie en doen soos juffrou sê. Want ek dink hy weet ek gaan kla oor die onprofessionele diens tydens werkstyd.

Stap uit en dink vir myself: Wat het geword van diens? Ons is geleer as ‘n klient voor jou staan dat jy vriendelik groet en ‘n diens lewer. Hier het ek gevoel ek word ‘n hengse guns gedoen om gehelp te word. Dit is my reg om gehelp te word want ek betaal belasting, meer as wat nodig is. Ek gee elke maand my kerklike bydrae, en raai wat, ek mag sê hoe die geld aangewend moet word. Ek stuur geld na die teologiesestudente kas, die bejaarde sorg, Helpende hand fonds...en hoekom kan ek dit nie ook met my belasting geld doen nie? Hoekom kan die belasting betalers nie uitsluitlik stem nie? Die res dra nie by nie? Ons moet alles en almal pêpa! Hoekom nie my geld vir basiese sorg soos kos en opvoeding allokeer? Hoeveel kinders sit op die skoolbanke honger elke dag? Hoeveel kry net 1 keer per dag kos van die skool se voedingskemas? Dit geld ook vir bejaardes en spesiale sorg soos gestremdes? En nou praat ek nie van wit en swart nie, ek praat van kinders, jongmense en bejaardes. Ek sien almal deur een bril. Nee, ek skaam my vir die toestand van diens in my wonderlike SA.

Ek is in murg en been ‘n Afrikaner, trots daarop, trots op my mooi land se natuurskoon en die diversiteit daarvan, my mooi unieke taal. Maar deesdae voel dit of niemand omgee, niemand luister, alles net vervalle raak en ek staan op die peron waar ‘n skip weg vaar met wuiwende passasiers en jou geskree word nie bo die toeter van die skip gehoor...alles mis voor die son!


Vandag het ek geleer om geduldig te wees, nugter na ‘n situasie te kyk en besef dat mens kan saam werk, ongeag ras of kleur. Mens moet net probeer. Ek het hoop vir alles!