Dinsdag, 31 Mei 2016

Skeerpoort Ouetehuis en Ouma Kitty Smit

Soms kry mens net ‘n “trigger” om jou gedagtes so ver terug te neem dat jy gedink het als is vergete. Mens is so verbaas dat, na jy amper die helfte van jou verwagte leeftyd op aarde geleef het, nog so ver terug kan onthou! ‘n Klein dingetjie soos Stampmielies wat met skaap en boontjies gekook word, het die hele terug tog in tyd aan die gang gesit.

Ons het in die laat 70’s op Skeerpoort kom vestig. Ek was toe op laerskool. My oupa wou nie by ons woon nie (seker omdat ek so vrek stout was), maar het by ouma Kitty Smit se Skeerpoort Ouetehuis gaan loseer. Oupa het vreeslik gerook en my pa het dit gehaat. Hy het geweier om vir oupa sigarette te koop, pa het altyd gesê hy is nie ‘n moordenaar nie. Oupa het toe maar self moes loop om sy eie twakkies te kry.

Daar het in die tyd wat oupa by ouma Kitty geloseer het, ‘n hegte band tussen haar en my ma gevorm. Die ouetehuis was so 500m van die draai waar die poskantoor was. My ma was werksaam by die sentrale, daardie dae was dit nog die slingertjie draai en “nommer asb?” stories. Ma het elke middag sommer na die ouetehuis geloop en vir oupa loop kuier en sommer lekker saam geëet. So het sy telkemale tuis gekom met die lekkerste appelkoos blokkies, Jodetert, Vleispasteie en tuisgemaakte botter en vele meer lekkernye.

In die vakansies het ons dan met ons fietse met die lang grondpad na ma toe gery om uit die kwaad te bly. Daarna het ons by Amien, die Indiër winkel gestop en vir 5c ‘n sak vol “chappies” gekoop. Dan al kouende met kake wat pyn van ‘n oorvol mond, by oupa gaan kuier. Dit was seker so 10km heen en weer. Daar gekom het ouma Kit vir ons lekker kossies en lemonade gegee. Liesbet moes ons afgevee en dan kon ons weer met oupa kuier. Ek was nie lief vir oupa nie, want hy het altyd met my geraas want ek vra te veel vrae as hy wou rus. As ek nou daaraan dink, ek was spierwit blond, met lang ponie sterte en sproete...met ‘n lekker wille kroontjie....soos Denis the Menice! Ek het myself gou uit die voete gemaak voordat oupa my met die belt bygekom het.

Die losieshuis was deel van die ouetehuis en jy moes deur die groot kombuis van die een kant na die ander loop. Ek kon my altyd verkyk aan ouma Kitty as sy besig was om botter te maak. Sy was ‘n kort klein vroutjie, hare was onversorg en al die rigtings gestaan. Ek het haar Katchekube gedoop, sy was willer as wild, geraas soos ‘n man, gevloek soos ‘n matroos met ‘n hart van goud. Sy was ‘n weduwee wat haar man op die plaas verloor het en toe daar as verpleegkundige haar kinders groot gemaak het en vir ekstra geld die Ouetehuis begin het. Maar soos ons almal weet, moenie ‘n man op sy baadjie takseer nie...

Ons het die slingertjie van die botter karring gedraai dat ons arms gebrand het en sodra die soliede stukke vorm van die room wat skei, moes ons stop. Sy het die botter goed gewas met kouer water en ons het die botter soos stukke klei gebrei. Daarna het sy dit gesout. Ek het my verkyk aan hoe vinnig haar hande die botter papierjies uit die water gehaal het en binne ‘n oogwink was die botter vormpie op en die botter word dan ritmies in die vormpie ingedruk. Daarna het sy die houtspatel met sy riwwe oorgetrek om al die water goed uit te werk. Die vormpie se yster gespe was dan los gehaak en daar staan die perfekte blok! In ‘n kits is die papiertjie gevou en rye goud het gevolg!

Party dae as oupa weer kwaai was, dan het ek op ouma Kitty se bed gaan sit en kyk hoe sy by haar naaimasjien besig was om gesmokte rokkies aanmekaar te sit. As ek vaak geword het, het ek op die naat van my rug gaan lê en as ek op kyk teen die dak, was die patroontjies van die plafonne vir my hipnotiserend. Ek het elke patroontjie uit my kop geken...een keer selfs probeer om dit oor te teken vir ‘n deken wat ek wou quilt! Ek sou seker vir die res van my lewe gewerk het. Die naaimasjien het saggies gewerk, ‘n swart singer met so ‘n lang bonnin, nie soos die kort vettetjies wat ons vandag ken nie. Die masjien het so geting-ting soos sy die trappie getrap het as sy werk. Later jare het my pa vir haar ‘n motortjie op die naaimasjien gesit en sy was net so dankbaar. Sy het my later geleer hoe om die bobbins  vol te maak en dit was my werk om dit vol te hou en die gare te ruil. As ek nou daaraan terug dink, was haar oë seker nie meer goed nie! Op ‘n dag as jong student, gaan kuier ons weer by ouma Kitty en sy gee vir my, my eerste smok masjientjie. Haar persent aan my, omdat ek so “mooi leer” by die Universiteit. Haar masjien was ‘n Reed pleater en myne ‘n Sally Stanley. Ek onhou hoe ek gesukkel het om die naalde wat gekartel is te kry, maar Solomons in Johannesburg het jou wrintie waar dit invoorraad gehad. Ek het een van my finale jaar kleding projekte met Sally gemaak en met ‘n groot prys weg gestap, my heel eerste Bernina!

Ouma Kitty se deur was vir almal oop. Van siekes wat sy moes versorg tot sielkundige vir die afvlerke in die omgewing wie se mans en vroue hul moeilikheid gee. As ek aan daardie ou kombuis met sy houtvloere en ou kombuis kaste dink, sou dit seker soos ‘n Opera geklink het van al die lag, huil en liefde wat daar gedeel is. Gepraat van die kaste. Dit was nog van daardie wat sulke geboogde glas gehad het. Haar mooiste koppies daarin weg gepak. Ek het dit geniet om vir die tannies tee te bedien. Dan het ek na die tyd saam Liesbet die koppies gewas en weg gepak. Ek het seker gemaak die koppies, teepot en melk bekertjies se oortjies kyk in dieselfde ringting. Selfs die suiker lepel moes daardie kant toe kyk. In die lang brëe gang op was daar rye kaste wat tot bo teen die dak gegaan het. Jy kon binne in die diep kaste klim, ons het so baie daar wegkruipertjie gespeel. Op ‘n keer het ek in die meelblik getrap en wat ‘n gemors. Ouma Kitty het hard geraas en ek moes skoonmaak! Vandag is die meelblikke my bedkassies in een van die kamers in my gastehuis!

Ouma Kitty het ook ‘n groen hand gehad. Sy het die mooiste tuin gehad. Ek sien nou nog die swart hekkie by die pad met die bordjie Skeerpoort Ouetehuis teken. Voor langs die pad het die vuurpyle en aggepantise gepryk. Daar was ‘n tamaai hoë palmboom, en oral waar die takke afgesny was het sy heuningblommetjies geplant. Voor op die stoep het die Hen-met-kuiken gehang en Lit-rosies. Sy het altyd steggies uitgedeel aan al wat ‘n mens was. Hoeveel karre het nie voor daardie hek gestop vir ‘n kuier en ‘n lafenis nie. Vandag leef ouma Kitty nog, maar is al so oud soos die berge. Ek dink haar lewe waar sy self alles gedoen het, sonder ‘n man op die plaas, het haar vandag so oud laat word. Ouma Kitty en Nelson Mandela is op dieselfde dag gebore en ewe oud. Sy is tans nog so helder soos gister en huil altyd as ons praat oor my ma en my sus.

Maar deesdae kan sy nie meer so mooi hoor oor die foon nie, en ek het die wonder van skryf ontdek. Soveel wat uit mens se hart vloei as jy ‘n brief skryf. Dan laat dit my dink...wanneer laas het jy ‘n hand geskrewe brief ontvang? Ja, daardie hand geskrewe koevert met jou naam op en die sender se adres agterop? Ek kry gereeld as ek haar briefies in die pos kry sommer sulke lekker vlinders in die maag. Ek gaan sit sommer daar by die poskantoor op die trappie en lees. Ek kan nie wag tot by die veiligheid van die kar nie. Onlangs was ek deur ‘n straatverkoper gemaan dat ek “gevaarlike” dinge doen deur net so my handsak langs op die grond te sit en te lees.


Ek gee nie om nie. Dit is iets net vir my, ‘n laaste kontak met my ma, die ou dae en ‘n dierbare tannie wat ‘n aanneem ouma geword het en my goed geleer het wat geld nie kan koop! Mis jou ouma Kit! xxx Annelien 

Maandag, 23 Mei 2016

Florentyntjies

Ons het groot geword met my ma se fyn gebak en een van die happies wat sy so keurig en presies kon maak was Florentyntjies. Dit laat my dink aan ‘n kruising tussen ‘n brandy snap en ‘n crunchie...maar lekker bly dit lekker. Soms kap ek die koekies fyn en gebruik dit as ‘n krummel laag op roomys of selfs muffins...die gebruike is legio. 

Resep
125g Botter, moet botter wees asb
150g Wit suiker
50ml Goue stroop
70g Koekmeel
110g Gemengde sitrus skil
150g Amandel vlokkies
110g Gekapte glans kersies, baie fyn
5ml Vanielje
150g Donker sjokolade

Metode:
1. Smelt die botter, suiker en stroop saam en laat dit op kook. Verwyder van die hitte en voeg die koekmeel, geursel, vrugte en neute by en roer goed deur.

2. Skep 5ml hopies ongeveeer 5cm uit mekaar op ‘n gesmeerde bakplat. Onthou hierdie koekie versprei en loop letterlik die wêreld vol as jy nie versigtig is nie. 

3. Bak dan 10-15 minute by 160℃. By die tien minute merk moet jy asb by die oond deur staan en soos ‘n broeis hen oppas. Die kanse vir brand op hierdie tydstip is amper 100% gewaarborg. Hou dop!!!!

4. Koekies wat taai is en nie bros het nie lank genoeg gebak nie, sit dit terug en bak weer. Jy kandie koekies plat druk as daar neute en dele is wat opstaan en nie mooi lyk. 

5. Smelt die sjokolade en drup op die koekies. Stoor die koekies in die yskas of vrieskas in lugdigte houer.

Bron: Annelien Pienaar, 2015, Bak en kook klasse: epos adres: boerekostwist@gmail.com

Hoeveelheid: 40-50 5ml scoops

Saterdag, 21 Mei 2016

Koekbak probleme met antwoorde!

Jip, dit gebeur met ons almal! Jy maak gereed soos 'n akrobaat om hierdie koek te bak en dit is ‘n balanseer toertjie om al die stappe reg te doen, en om nie eens te praat van die bestanddele uit te laat nie! Nou bak jy die koek en jy is soos ‘n kind wat nie kan wag om die persent oop te maak. Die oomblik wat jy daardie oond deur oop maak krimp jou hart in een, die koek is ‘n flop! Wat nou? Hoekom?

Kom ons kyk na ‘n paar goedjies wat jy altyd ingedagte moet hou om die perfekte koek te bak.

a.   Wanneer jy met ‘n waaier oond bak maak seker dat die temperatuur met ten minste 10 minder gebak moet word. Moet nooit ‘n koek onder 140 bak as jy die temperature moet verlaag nie...

b.   Om te voorkom dat daar te vinnig ‘n korsie op die koek se bokant vorm voordat die koek geset het: Plaas ‘n staalbakkie met water onder in die oond sodat dit stoom kan produseer en die korsie voorkom. ‘n Halwe koppie water is genoeg. Ek doen dit altyd, en nog nooit weer ‘n probleem gehad nie.

c.    Sommige koekpanne se wande is regtig te dun en dan kry jy dat die koek met ‘n punt rys en na die tyd in die middel insak. Die koek word baie gou aan die kante gaar en stoot dan die beslag na die middel om die toring effek te vorm. Sodra dit uit die oond kom, val die storie plat. Om die probleem op te los, bind lagies koerant of bruinpapier om die koek sodat dit ‘n buffer teen direkte hitte kan vorm.

d.     ‘n Koek wat met ‘n toring rys kan ook te wyte wees aan die oond se element wat nie egalig bak nie of te warm is, draai die temperatuur volgende keer laer. Nog ‘n rede is die koek is te veel gemeng, te veel rysmiddel, te min vog, te veel botter wat die gluten raamwerk swak maak en nie die koek se raamwerk kan onder steun nie. Verder as jy eiers moet skei in ‘n resep en dit vra dat jy die eierwitte moet styf klits, wel sit altyd vir elke eierwit ‘n 1/8ste teelepel kremetart by en klits die eierwitte tot stywe punt stadium. Die kremetart verseker dat die eierwitte stabiel sal bly. As jy die eierwitte tot droog klits gaan jy ‘n koek kry wat bars bo-op en ‘n los velletjie veroorsaak.

e.    Koeke rys onegalig in die oond: Dit gebeur as die panne te na aan mekaar of die oond se wande staan. Dit rys na mekaar of na die kante toe. Dus maak seker dat daar genoeg spasie van ongeveer 5cm tussen die panne is asook die wande van die oond.

f.     Die koek se bo-laag maak ‘n los velletjie: Die eierwitte was te veel geklits en dit veroorsaak krakies en die velletjie om los te gaan. Dit is aaklig om so ‘n koek te versier. Verder het die room proses waar die eiers en suiker of botter en suiker geklits was te kort gewees. Die suiker het nie genoegsaam opgelos nie en omdat suiker higroskopies is, kompeteer dit vir water om homself op te los. Dit het tot gevolg dat die stysel korrels nie kan gelatiniseer nie en maak dan die los velletjie. Dit is geneig om maklik by die bak van rolkoeke te gebeur. Vir ‘n kompetisie is dit jou grootste nagmerrie!

g.    Die koek het groot rysgate: Die koek is oor meng en het te veel lug ingewerk. Dit is belangrik om die koek asook kolwyntjies eers liggies te kap sodat die borrels kan uitkom voordat dit gebak word. Weereens kan die groot gate te wyte wees aan te hoë temperatuur.

h.    Die koek is kluitjierig en plat: Die koek het nie genoeg gebak nie, die rysmiddel is nie aktief nie. Die olie of botter en suiker is te veel vir die resep en het ‘n taai tekstuur tot gevolg. Gooi die resep weg. Die persoon wat die resep vir jou gegee het, wou jou seker ‘n poets bak! Selfs al kan jy toor sal dit nie werk nie. Die pan waarin jy gebak het is te groot vir die hoeveelheid beslag, daarom dat die koek plat is.

i.      Koek is droog: Die pan is te groot waarin jy gebak het en die baktyd te lank en warm. Dus het jy sponsvingers vir Tiramisu!

j.      Die koek het plat geval: jy het die oond deur te gou oopgemaak, die koek is te veel gemeng of die oond is gestamp in die kritiese fases van stolling! In groot kombuise kan dit so maklik gebeur!


k.   Die koek het vreeslik gekrimp: Jy het te veel gemeng en te lank gebak!

l. Alles bestanddele moet by kamer temperatuur gebruik word. Koue meel kan 'n koek ook laat platval en 'n "dense" tekstuur laat.

Bron: Annelien Pienaar, 2015, Bak en Kook klasse: boerekostwist@gmail.com

Woensdag, 18 Mei 2016

Ma se Cream Cracker Vlaskywe

Ja, ek maak ook die vinnige Cream Cracker Vlaskywe wat in ‘n kits gereed is. Ek is dol oor die soet suur van die versiersel saam met die sout van die koekie. Verder het ek vir julle die mikrogolf oond metode en die plaat metode in die resep ingewerk, kyk uit vir variasie. Genade hoe water my mond nou!!!

Resep
200g Cream Crakers
1 liter Melk
100 g Suiker
50 g Botter of Bak margarien
70 g Koekmeel
50 g Maizena, mielieblom
15 ml Vla poeier
100 ml Water
3 Eiers, Jumbo, geskei
knippie sout
10 ml Vanielje geursel
260 g Versiersuiker
50 ml Kookwater
5 ml Suurlemoensap

Metode

1. Pak solank die beskuitjies uit in ‘n langwerpige bak van ongeveer 30 cm by 25 cm en ongeveer 7 cm hoog. Ek spuit as ‘n reel nie die bak met die kleef werende sproei nie, jy is welkom om te spuit as jy wil. Pak al sie beskuitjies met die lyntjies in dieselgde rigting. Maak ook seker dat die lyne kruis en dwars ooreenkom.

2. Voeg die melk, suiker, botter by mekaar en smelt die botter. Verwyder van stoof en plaas eenkant.


3. Gebruik nou die water en los die sout, eiergeel, meel, vlapoeier en mielieblom in die water op. Ek vind vir hierdie resep jou ballonklitser of whisk die beste werk om die mengsel glad en egalig te kry.


4. Meng die eiermengsel met die afgekoelde melk mengsel. Met jou ballon klitser meng alles deeglik deur.


5. Verhit die mengsel oor matige hitte totdat dit verdik het vir ongeveer 6 - 8 minute. Proe aan die mengsel om seker te maak dat jy geen rou stysel proe nie. 


Mikrogolf Variasie: Plaas die goed gemengde eiermengsel in mikrogolfoond en mikrogolf vir 1minuut, stop, roer goed deur, en doen vir nog 4 keer. Proe aan die mengsel of dit gaar is.

6. Klits die eierwitte met ‘n knippie kremetart tot stywe punt stadium en vou dit by die vla mengsel in, tesame met die vanielje, met die hulp van jou draad klitser. Gebuik ‘n figuur 8 beweging en draai die bak in die rondte die heel tyd. 


7. Skep die vla mengsel in die voorbereide tertbak en pak die koekies weer eweredig op die bokant. Laat eenkant om heeltemal af te koel voordat die versiersel oorgesit word.


8. Vir die glans laag: Meng die versiersuiker, kookwater en suurlemoensap saam, versprei met slaplem mes oor oppervlakte en laat stol verder in die yaskas vir 12 ure om goed te set.


9. Versier met klapper en kersies indien verkies.


Bron: Annelien Pienaar, 2016, vir klasse epos adres: boerekostwist@gmail.com


Hoeveelheid: 24 blokkies afhangend soos jy sny

Dinsdag, 17 Mei 2016

Olyf Tapenade met 'n Twist

Hierdie tapenade (iets tussen ‘n sousie en ‘n smeer) kan vir baie doeleindes aangewend word. Ek maak gevulde hoender borsies met die olyf weergawe. Die borsies word plat gekap en gevlinder, die tapenade oorgesmeer en opgerol. Vou styf toe met kleefplastiek en verkoel. Ek posjeer dan die rolletjie in water tot gaar. Daarna word dit bruin gemaak op ‘n riffel pan en dan mooi geplate! As jy dit mooi sny kan dit regop staan en die swart spirale van die rolletjie vertoon dan baie mooi.

Verder vir ‘n Brushetta of brood bord kan die verskillende kleure van groen tot swart olywe ook ‘n mooi maar smaaklike smeer of doopsousie wees. Ek is natuurlik gek na die tapenade saam met my pasta, veral so skoon sonder enige ander souse by tuisgemaakte tagliatelle. Op die foto het ek lewekoekies gemaak en toe bedien met 'n lagie tapenade en 'n geposjeerde eier! Hummus is ook heerlike met die tapenade. Dus, die lys is nimmer eindigend...dink Foccacia met tapenade of pizza met tapenade basis ipv die gewone tamatiebasis!

Resep
150 g Swart olywe, ontpit
2 Anchovy vis filette
15 ml Suurlemoensap
3 Knoffel toontjies
5 ml Vars roosmaryn, fyn gekap
10 ml Vars tiemie, fyn gekap
6 Salie blare
5 ml Kappertjie saad (Capers)
100 ml Olyf olie (nie extra virgin olyf olie nie)

Metode:
1. Plaas al die bestaddele in ‘n voedselverwerker en maak tot ‘n gladde pasta. 

2. Kan vir 4 weke in die yskas gehou word.

Bron: Annelien Pienaar, 2016, epos adres vir klasse: boerekostwist@gmail.com

Hoeveelheid: 250 ml ongeveer

Maandag, 16 Mei 2016

Platteland Tydskrif en Sourdough klas saam met Annelien Pienaar

Dit borrel en bruis al van Januarie maand dat ek kan vertel van my Sourdough klas wat beplan word met Platteland Tydskrif. Maar nou is die kat uit die mou! 

Wat maak ons?
Ons maak 'n Sourdough deeg wat dan omskep word in 'n Baugette, gevlegde brode en verskeie vorme soos Epi, Fougasse, Pain de Campagne ens. My fokus gaan wees op Intenstinale gesondheid deur mikrobiese groei van bakterie in die sourdough. Hoe fermentasie prosesse gebruik kan word om bakteriele groei aan te moedig sodat ons goeie probiotika's kan vervaardig wat die liggaam herken en verteer. Al die brode wat jy in die klas maak neem jy huistoe. 

Wat ontvang jy in die klas?
Platteland bederf die kursusgangers met: 'n Elektroniese intekening tot Platteland se tydskrif, 'n Platteland voorskoot en mengbak onder andere. Verder is al die bestanddele, verversings, twee gang maal, resepte en nota's ingelsuit. Eureka Mills is ook ons meel borg en ons werk dus met die heel beste bestanddele vir die perfekte brood. Ek gee ook 'n plantjie vir elkeen om tuis te versorg en te voer. Sy is al 80 jaar oud en baie aktief! Dan ook 'n Bos en Berg Kook skool broodslopie en lappie vir die rys van jou deeg of te wel Bakers Couche.

Wanneer: Saterdag, 3 September 2016
Waar: Van Gaalen Kaasmakerij, Hartbeespoortdam (my venue is te klein), ons maan egter dat daar net plek is vir 25 persone vir die klas. So, hoe gouer jy bespreek hoe beter!
Vir verdere details kontak: boerekostwist@gmail.com wat jou sal kanaliseer na Platteland se kantore vir die direkte besprekings en betalings aan Media 24.

Ingemaakte Olywe

Olywe is een van daardie vruggies wat oor die eeue heen maar net nie uitsterf nie. Kalamata is by uitstek my gunsteling olyf om te verwerk omdat dit so groot is, dit bly ferm tydens die verwerkings proses en verloor gou sy bitterheid tydens die uitvars periode. Dit is ook ‘n kenmerk van Kalamata dat dit nie vir die olie mark geskik is nie omdat die olie inhoud so laag is. 

Ek het groot geword in Skeerpoort met ‘n area so ryk aan alle vrugte en groente wat jy aan kan dink. Ons het letterlik alles preserveer: bevries, berook, droog en gebottel. Saam met dit het ek leer olywe inmaak. Later het ek meer gespesialiseerd begin raak oor die varieteite van Olywe wat geskik is vir eet en watter geskik is vir olie onttrekking. Maak dus seker as die gogga jou byt om olyf boompies te koop, jy seker maak vir watter doel jy aanskaf.

Hierdie resep wat ek gee kan van toepassing wees op groen en swart olywe. Onthou tog dat ‘n swart olyf eintlik die ryp vrug is en die groen een...wel is baie jonk gepluk nog voor dit ryp kon word. Dus een boom kan vir jou ‘n verskeidenheid van olywe produseer. Ek wonder soms of die mense in die ou dae nie kon voorbly met die preservering en al vroeg in die seisoen begin bewerk het, en soos die tyd hul inhaal het die olywe van groen na swart gegaan. Mens wonder! Deesdae meng die mense so in met ontwikkelling van varieteite dat jy nou bome kry wat net groen en swart vir die spesefieke markte kweek.

Indien jy oor Olyf varieteite verder wil lees in SA, volg die onderstaande skakel. http://olive-central.co.za/south-africa-home-to-a-variety-of-olive-cultivars/

Olywe kan in ‘n pekel, olie of gedroog gestoor word. Vandag kyk ek na pekeling en marinering vir die doel van preservering. Nota: Jy kan wit of bruin asyn gebruik. Kenmerkend word swart olywe in bruin asyn geplaas en groen olywe in wit asyn.

Resep
5 kg Olywe

Metode:
1. Vars eers die olywe uit. Maak ‘n snit in elke olyf. Ek maak ‘n snit aan weerskante van die olyf. Die ou resepte dui net een snit aan...maar die onttrekking van die bitter gedeelte vind vir my net baie vinniger plaas.

2. Vir die hele verwerkingsproses gebruik erdeware of glas om ‘n reaksie tussen metaal te vermy.

3. Plaas die gesnyde olywe in die houers, bedek met water en plaas ‘n omgekeerde bord op die olye om dit onder die water te hou. Spoel die olywe elke dag en bedek dit weer met water vir 21 dae lank.

Eerste Pekel oplossing
5 liter water
500 g Sout

Metode:
1. Verhit die water met die sout en roer tot opgelos. Laat goed afkoel.

2. Plaas die afgespoelde olywe in die pekel oplosing en laat dit staan vir 10 dae.

3. Gooi die ou pekeloplossing af en berei die tweede en finale oplossing.

Tweede Pekel oplossing
2 liter Water
200 g Sout
2 liter Asyn van keuse
50 g Suiker wit of bruin
1.5 liter Olyfolie

Variasies van geure vir tweede Pekel oplossing vir olywe
Gegewe jy werk op 5kg olywe dan kan jy die volgende byvoeg of in kombinasie:

10 Knoffel toontjies, skoon gemaak en grof gekap en 
of
6e Mosterd saad, kan ook gemeng geel en swart wees...maar minder swart (bitter) 
of
6 e Dill tippies, gedroog
of 
6e Roosmaryn, gedroog
of
6e Seldery saad
of
1 Lemoen, vars, geskil en dun repe gesny

Metode:
1. Verhit sout, asyn, suiker, water saam en laat goed oplos. Laat heeltemal afkoel voordat dit gebruik word.

2. Meng nou die geurmiddels by.

3. Skep olywe in gesteriliseerde bottels en vul driekwart op met pekel oplossing en eindig af met olyf olie. 

4. Gebruik eers na 14 dae. Maar die beste is om 8 weke te wag vir die geure om goed te ontwikkel. Stoor in weg van lig.

Bron: Annelien Pienaar, 2016, epos adres vir klasse: boerekostwist@gmail.com

Hoeveelheid: 5 kg Olywe

Woensdag, 11 Mei 2016

Van Koeistal tot Kookskool!

Sussie en haar gansies! 
Sjoe, waar begin mens hierdie wonderlike storie van my lewe as Kook instuktriese by my alteljee? Onlangs het ek besef na ‘n reeks praatjies wat ek gedoen het, dat ek nooit die storie van my Koeistal tot Kookskool vertel het nie. Mens raak so besig met jou lewe dat jy vergeet waar jy vandaan kom en die pad wat jy gestoei het om jou drome stukkie vir stukkie waar te maak. Die dag toe ek uit tree as formele dosent het ek gedink my wêreld gaan staan stil en was die dam onder my uit!
 
Hierdie skrywe rig ek aan almal wat kan droom...Ek het as kind vir almal: my sussies, diere, niggies, nefies, bome, klippe, bosse en die veld skool gehou. Ek het vir alles en almal koekies gebak en al was die deeg soms vuil, het my ma dit geproe en seker skelmpies uitgespoeg! My ouers was mense wat geglo het om ‘n kind te laat groei, sonder om hulle te vorm in iets wat hulle wou hê. Ek was nie ‘n kind wat gedruk was om te presteer oor goed wat die ouers self nie bereik het, of om in tel te wees met die rykmense van die gemeenskap nie. Ons was kinders van die veld en die wind! My ma het geglo ons leer deur speel, boom klim, stof strepe in die sand trek, jou fiets versier met goete en dinge, die honde goete leer...dit was hoe ek groot geword het!

En toe word ek groot...

Die begin van 'n droom
Die droom vervolg....











As getroudes het ons van Kanada terug gekom en permanent op ons familie plaas kom woon. Oupa en Ouma het beide nog gewerk en ons was dus nie in mekaar se pad nie. Let wel die oupa en ouma was al in hul 70’s en skool hou was maar in ma se bloed en oupa het besighede elders gehad. Elkeen het sy lewe gehad. My man en ek het gependel van Skeerpoort na ons onderskeie werke. My man het die verste gewerk en ons het mekaar maar min gesien. Bitter vroeg oggend uit en saans donker weer terug. Ek het gesukkel met die afstand tussen die oudste se speel groepie en toe ook nog swanger met die middelste kind. Ons het gesukkel om swanger te raak en die middelste kind was ‘n wonderwerk dat hy die swangerskap oorleef het. Ons het toe die besluit geneem dat ek vir eers moet tuis bly en die seuns groot kry voordat ek weer begin met klas gee.

Die droom leef voort!
Die huisie op die plaas waar ons ingetrek het was eers die koei- en melkstal gewees. My skoonpa het die plekkie pragtig in gerig in ‘n kothuis gevoel met die Hartbeeshuis-Jonkheer  effek gekombineer. Die plafonne was nog die oorspronklike balke, die stal deure en venstertjies was ook in ‘n mate behoue gewees. Voor ons ingetrek het, het pa die huis uitverhuur as ‘n gemeenskaps kliniek en ook dokters spreek kamers. Menige jong dokter van ons omgewing se praktyk het hier afgeskop! Met die groeiende Pienaar gesinnetjie, het ons toe die huisie vergroot en ekstra kamers aangebou.

Die droom voltooi!
Ek is van nature ‘n besige mens en het nie lank stil gesit voordat ek weer vanaf die plaas uit my kombuis en eetkamer klasse begin gee het. My vriendinne van my ou werk en mede dosente het my aangemoedig om met die kook klasse en naaldwerk te begin. Eers was dit net demonstrasies soos wat ek vir groot handelsmerke gedoen het. Maar later het die mense meer betrokke geraak by die demonstrasies en so het die kook klasse gestalte gekry. Dit was aanvanklik moeilik om die klasse uit te werk vanuit die vertrekpunt dat die kliente mense is wat nie Voedsel en Kleding akedemiese agtergrond het nie. Ek moes hard skaaf en skuur maar die suksesse het ingestroom en die klasse het uit hul nate begin bars. Aanvanklik toe ek met die familie vergader en my plan om klas te gee uit die huis uit, het almal dit afgeskiet want: “Wie gaan so ver ry vir klas?”. Wel ek is ‘n under cover rooikop en ek het geveg, self my droom laat werk. Geen ekstra befondsing gehad vir my droom, net die genade van Bo het my gelei. As ek nou terug kyk weet ek by tye was ek nie bewus daarvan, maar dan het Hy my deur die dinge gedra, want selfs my man sê hy kan nie glo die goed wat ek gedoen het om die droom waar te maak. Dankie Abba Vader dat U my nooit los al is ek soms hard horend! Elke klas se geld ingeploeg vir die volgende klas se toerusting. So veel jare se opbou tot die dag wat my man voet neersit en wal gooi. Ek sal nooit my man se woorde vergeet : “My woonhuis is nie meer privaat nie, ek kry nie eens parkering voor my eie plek!”. Daar het ons toe besluit om die koeistal te verruil vir die groot ou plaashuis wat in die 1930’s gebou is. Die seuns het aanvanklik vreeslik na die koeistal verlang, maar namate hul die groothuis gewoond geraak het, het hul aangepas.

Wag-'n-Bietjie kamer...boom name!
Die Koeistal moes groot transformasie ondergaan en dit het 12 maande geneem om die plekkie in ‘n opleidingsfasiliteit en gastehuis te omskep. Die tafels en toonbank is gemaak uit ou stal deure wat op gesny is en verwerk is. Die ateljee het nie gordyne nie, ek het die afval hout van die stal ook verwerk in "shutters" en dit werk wonderlik vir fotografie...dit dien as goeie reflektors van lig as ek die disse met natuurlike lig fotografeer. Die kamers is gerieflik, netjies en prakties. Vir die twee dag klasse werk die oornag fasiliteit goed en die mense geniet die plaas atmosfeer en lang wandelings in die boorde, die kuiertjies op die plaasdam se wal en die diere op die plaas. Dit is niks opgesmuk nie, jy voel tuis en jou huis weg van die huis atmosfeer. 

Op die plaas verwerk ons in die koeistal vars groente en vrugte vir die doel van Plaas konfyte en blatjangs. Plaaswerkers se vroue kry opgelei in higiene, verwerking, groente  tuin bestuur en ook bietjie lees en skryf werk. Hierdie mense besef ook dat kennis mag is. Hulle ploeg hul kennis in die area’s waar hul woon in en maak ook so dan ‘n ekstra inkomste. Wintertyd gebruik ek die vroue om ook met die pekan gradering en verwerking te help. Dit is ‘n oes wat net een maal per jaar inkom en die produk moet ons 12 maand hou vir kontrakte met groot konsessies.  Dus, dop ons die neute vir binnelandse produk en die res van die neute word indop uitgevoer.


So, op die plaas en die koeistal is daar nooit ‘n vervelige oomblik nie! 2003-op hede!

Dinsdag, 10 Mei 2016

Dadel en Vrugte blokkies

Hierdie was ons vakansie blokkies gewees. Wanneer mammie dit gemaak het was daar altyd genoeg handjies om te help. Teen die tyd wat ons “klaar” gehelp het, was die Marie koekies klaar! So moeder het geweet om meer as een pakkie uit te haal vir die honger handjies. Verder was ek verslaaf aan die suurlemoen versiersel oor die koekie. Ek het die bak altyd uitgelek en kon nie genog kry nie!

Resep
250g Dadels, fyn gekap
250ml Gemengde koekvrugte (ja die soort wat jy in vrugtekoek sou gebruik)
300g Sagte Botter of Bak soort margarien
500g Versiersuiker
40ml Kakao, deesdae gebruik ek die swart kakao
250ml Klapper
3 Eiers, geklits
2t Vanielje geursel
2 druppel geel voedsel kleursel
200g Marie Koekies, grof gebreek
100g Enige soort neut

Metode:
1. In ‘n groot kastrol smelt die botter en versiersuiker, voeg die dadels, koekvrugte, kakao en klapper by en kook vir 5 minute oor medium hitte. Verwyder van hitte en laat net 5 minute afkoel.

2. Meng die eiers en vanielje met mekaar en voeg by die warm mengsel. Moenie bang wees dat die eiers sal skif nie, jy moet net baie vinnig roer. Voeg nou die koekies en neute by. 

3. Druk die mengsel in ‘n bak en laat goed afkoel voordat jy die glanslaag oorgooi.

Glanslaag
260g Versiersuiker, gesif
25ml Suurlemoensap
5ml Vanielje geursel
5ml Suurlemoenskil, vars gerasper indien verkies

Metode:
1. Voeg die suurlemoensap, vanielje by die versiersuiker en roer totdat dit goed opgelos is.

2. Gooi dadelik uit op koekies. Laat goed set voordat die koekies gesny word.

Bron: Annelien Pienaar, 2016, epos adres: boerekostwist@gmail.com

Hoeveelheid: Swissroll pan of langwerpige pyrex bak.

Tamatiesop

Dit is nou een sop wat ek regtig lief is om te maak. Dit is pikant en bedien met room op die kant, maak dit ‘n heerlike reis! Wanneer jy met tamaties werk in Suid Afrika is dit geneig om sy rooi te verloor as dit verpulp word. Daarom is ek soms geneig as die sop neig om oranje uit te kom, om so 'n eetlepel tamatie puree by te voeg om die kleur na 'n intense rooi terug te neem. So speel met die resep.

Resep
15 ml Olyf olie
25 g Botter
1 Wortel, geskil, gerasper
1 Medium ui, geskil en fyn gekap
1 Soetrissie, rooi verkieslik, fyn gekap
1 Seldery stingel van 30 cm lank, fyn wiggies
600 g Tamaties, ontvel of blikkie
500 ml Groente aftreksel (Ina Paarman sin is die lekkerste)
Knippie Neut muskaat
Knippie Gemmer
Sout en peper na smaak
250 ml Room vir garnering

Metode:
1. Verhit olie en botter in kastrol. Voeg die wortel, ui, soetrissie en seldery by en roerbraai met toe deksel vir ongeveer 10 minute tot sag.

2. Voeg die tamaties en aftreksel by en kook vir 15 minute tot sag.

3. Puree die mengsel tot baie glad. Ek gaan nog een stappie verder en dreineer deur sif vir ekstra gladheid. Geur met gemmer en neutmuskaat, sout en peper na smaak. Ek sit soms frummels van feta oor vir die garnering.

4. Bedien die sop warm met room en skyfies geroosterde brood of apart.

Bron: Annelien Pienaar, 2016, epos adres vir klasse: boerekostwist@gmail.com

Hoeveelheid: 4 porsies

Sondag, 01 Mei 2016

Wil jy beter foto’s neem? Wil jy meer as net mik en druk?



Kom ek verduidelik eers hoe die kamera dink. Dit maak nie saak of dit jou foon, tablet of regte kamera is nie. Dink eers aan jou oog, dink aan hoe jy kyk. Jou oog is so uniek in die sin dat dit kan fokus op iets in die verte en goed wat naby is buite fokus maak. Of anders om ook, vanself verdof die oog die agtergrond en die naby fokus punt kom in skerp fokus. Goed, kry die prentjie? Jou brein kan self besluit wat en hoe die beeld gaan wees wat die oog gaan sien. Dink net as jou kamera soos jou brein kon wees! Dan het fotograwe nie werk gehad nie!

Goed, hierdie inligting is vir selfs kinders om maklik te interpreteer. Dit is nie ‘n formele fotografie les nie. Dit maak jou net bewus van die funksies van jou fotoneem aparatuur wat tot jou beskikking is.

Kom ons kyk na die icon wat lyk soos ‘n persoon se kop
Kyk na die foto van die cupcake. Jy sal sien dat die voorwerp links in skerp fokus is en die agtergrond geblur is. Hoe kry hulle dit reg? Daar is ‘n vreeslike lelike woord genaamd DOF of Depth of Field. Jy het nie nou te kommer om oor die woord te huil. Dit beteken net met hoeveel die agtergrond uit fokus gaan wees tov die voorwerp. Soms wil ons iets meer skerp in fokus hê sodat dit die kyker se aandag kan vang. Die sukses van enige goeie ontwerp is die beweeg van die oog in ‘n logiese volgorde van die middelpunt en dan van links na regs en op en af...dit is goeie fokus. Nou, wat die gesiggie vir ons doen, dit besluit self wat die DOF gaan wees of hoe "dof", uit fokus die agtergrond gaan wees.

Kom ons doen ‘n eksperiment. Neem ‘n voorwerp en plaas dit voor ‘n baie besige agtergrond. Die agtergrond moet ongeveer 50cm tot 2m weg van die voorwerp wees. Neem nou ‘n foto van naby met die kamera op die gesiggie stelling, jy mag glad nie zoom nie. Die voorwerp moet ‘n derde van die skerm vul. Wat sien jy? Die agtergrond is nog redelik in fokus ne? Goed kom ons doen die volgende oefening weer. Staan nou een groot tree agter toe, zoom nou in sodat die voorwerp weer een derde van die skermpie vul, neem die foto. Wat sien jy nou? Ja, die agtergrond is meer geblur ne? Geluk jy het so pas jou eerste les geslaag! Hou aan om te speel met hoe ver die agtergrond van die voorwerp is en jou afstand vanaf die komposisie(die voorwerp en agtergrond). Maak seker dat wanneer jy die foto neem, jou fokus punt die kruisie of sirkeltjie perfek is op die voorwerp of daar waar jy die fokus wil hê.

Kom ons kyk na die bergie setting of landscape soos dit genoem word
Hierdie stelling werk soos volg. Dit is eintlik ‘n wye hoek lens soort van ingebou in die funksie, in kort dit kyk 180 grade. Dus as jy goed soos berge of ‘n groep mense wil afneem en sorg dat alles in die raampie moet wees...is hierdie stelling ‘n moet. As jy ‘n groep mense net wil afneem op auto gaan jy dalkies nie almal in kry nie. Dus, skakel oor na die landscape setting en voila...almal pas in oor die 180 grade hoekie wat vir ons ingebou is!

Hiermee volstaan ek...jy kan baie speel en die mooiste foto’s so neem! Volgende speel met natuurlike lig van die kant van jou komposisie, dan bring ‘n ding soos ‘n reflektor in soos foelie om die lig te weerkaats om skadus te vermy, ook 'n wit karton vir refleksie, swart dien weer as 'n diffuser of lig absorbeerder, dan is daar light boxes...maar dit is iets vir eendag.

Hoop dit help effens vir jou spog foto’s vir die Boerekos met ‘n Twist blad met al my resepte wat jy maak!

Groete Annelien