Dinsdag, 13 Oktober 2015

BIENENSTICH KUCHEN (GERMAN BEE STING CAKE)

Kyk na die tekstuur, dit is meer broodagtig as koekerig
Op Universiteit het ek hierdie wonderlike Duitse vriendin ontmoet en haar Ouma het hierdie resep vir my gegee. Elke jaar vir Kersfees bak ek hierdie heerlike en ryk koek. Dit is ongelooflik hoe die soet brooderige deeg in ‘n koek gevorm word en die vla lae dit komplimenteer.

Hierdie is ‘n tradisionele Duits gebakte koek.  Die verskil kom daarby in dat die rysmiddel in die koek suurdeeg is en nie soos ons gewoond is, koeksoda of bakpoeier nie. Die amandels en heuning wat op die koeklae gebruik word komplimenteer die smaak van die suurdeeg ongelooflik goed. 

As jy baie van brood bak weet sal jy verstaan as ek sê dat die deeg in die kategorie van Brioche val of te wel verrykte deeg. Die koek is kenmerkend met sy 2 - 3 lae waarvan die onderste twee met ‘n roomvla basis gevul is en die boonste laag met karamelagtige amandels.

Die vla word ‘n dag voor die tyd gemaak. Daarna word die koek deeg aangemaak en staan vir ‘n rukkie om te verdubbel in volume. Die toffie en amandel deel word gemaak wat bo op die koek gaan, voordat dit gebak word. Sodra die koek afgekoel het word die vla vulsel ingesit. Dit is die proses in ‘n neute dop.


Niemand is seker wat die oorsprong van die Bienenstich is nie maar,by oorlewering is daar twee stories. Nommer een was dit ‘n bakker wat  besig was om die brioche deeg met heuning te maak toe ‘n by hom kom pla en dit toe vernoem. Die tweede storie vertel van ‘n groep mense wat aan geval was en het toe bye korwe na die vyand gegooi om hul uit hul dorpie te hou. Om hul oorwinning te vier het hul die Bienenstich gebak en so ook elke jaar om dit te herdenk.


VLA VULSEL - MAAK DIT EERSTE OM OORNAG GOED KOUD TE WORD
250 ml Melk
3 e Wit suiker
3 e Vla poeier
1 e Mielieblom (maizena / cornstarch)
1 t Vanielje geursel
200 ml Room

METODE
1. Neem ¾ kop van die melk en die suiker en verhit dit oor stadige hitte terwyl jy die heeltyd met ‘n ballon klitser klits. Los die vlapoeier in die ¼ kop melk op en voeg by die kokende melk. Roer aanhoudend sodat die mengsel eweredig kan verdik en nie aanbrand nie.

2. Verwyder van hitte en laat afkoel.Terwyl die mengsel afkoel klop die heeltyd met die ballon klitser sodat die mengsel egalig in tekstuur afkoel en nie klonterig word of ‘n velletjie vorm nie.Sodra die mengsel goed afgekoel het plaas ‘n stukkie kleefplastiek wat met botter gesmeer is op die vla en draai toe en verkoel tot benodig.

3. Sodra dit tyd is om die koek te vul, klop die room net tot sagte punt. Voeg dan die mielieblom by en klits tot die room styf is, oppas dat jy nie te veel klits en dalk botter maak nie.

4. Klits gou weer die vla goed deur om net dit weer smeerbaar te maak. Vou nou die room versigtig daarby in. As jy bang is die vulsel is te pap, sit terug in yskas om fermer te word voordat jy dit op die koek sit.

KOEK
1/2 k Melk
100 g Botter - kamertemperatuur
2 1/4 kop Koekmeel
100 ml Suiker
1 Eier
¾ t Sout
1¼ t Kitsgis

METODE
1. Smelt die melk en botter saam en laat afkoel tot kamertemperatuur. Voeg dan die eier by, onthou as die melk te warm is gaan die eier gaar word!

2. Meng nou die melk mengsel met die res van die bestanddele en knie die deeg totdat dit los kom van die kante van die bak.

3. Laat die deeg rus vir ongeveer 1½ uur in die winter en in die somer ongeveer 2 ure. Die deeg sal nie soveel soos gewone brood deeg rys nie maar jy sal wel sien as jy met jou vinger op die deeg druk dit ‘n gat maak dan weet jy dit is reg.

4. Knie die deeg weer af en plaas in ‘n brood of koekpan (23 cm) wat goed met bakpapier uitgevoer is. Dit is baie belangrik om hierdie uitvoer te doen omdat die karamel geneig is om vas te brand aan die kante van die panne en dan sukkel jy om die koek te ontvorm.

5. Plaas sie deeg in die gesmeerde pan van jou keuse en laat dit weer rys vir ongeveer 30 - 45 minute. Toets die deeg deur daarop te druk en jy sal die instulping sien wat daar sal bly en effens herstel. By hierdie stap begin om die bo laag van die koek voor te berei.

AMANDEL LAAG
100 g Botter
⅔ k Suiker
4 e Heuning
1 e Vanielje geursel
1½ k Gevlokte amandels

METODE
1. Smelt die botter, suiker en heuning oor medium hitte in ‘n klein kastrolletjie. Hou aan roer totdat die mengsel begin borrel. Laat dit vir 3 minute kook of totdat die mengsel ‘n romerige kleur word.

2. Voeg die vanielje geursel en amandels by en roer baie goed sodat al die amandels bedek is.

3. Verwyder van hitte en laat effens afkoel totdat dit dik is.

4. Versprei nou hierdie neute mengsel oor die bo kant van die klaar gerysde koek en maak seker die hele oppervlakte is bedek. As dit gebeur dat die mengsel dalk geneig is om te dik te word hou die kastrol in ‘n dubbelkoker warm sodat die karamel nie te taai word nie.

5. Bak by 180 ˚ C vir 25 - 30 minute totdat die bolaag goudbruin en vol borrels is. Laat die koek binne in die pan afkoel voordat jy dit ontvorm. Maak dan die kante versigtig los en lig die koem met die stukkies waspapier wat bo uitsteek uit. Laat die koek op ‘n draadrakkie afkoel.

6. Sodra die koek koud is sny dit in 3 ewe dik lae. Sprei op die eerste twee sirkels al die vla en pak die lae op mekaar. Verkoel eers goed voor opdiening. Sprinkel met versiersuiker voor bediening vir ekstra mooi.

HOEVEELHEID: 6 - 8 porsies.

BRON: Simone Schneider, 1990.  www.bosenbergguestfarm.co.za


Geen opmerkings nie:

Plaas 'n opmerking