Woensdag, 16 September 2015

SCHNITZEL

Ek het eendag in ‘n Kanadese restaurant die wonderlikste, sappigste hoender schnitzel geëet, die geheim, natuurlik die krummel laag maar die mielieblom wat by die koekmeel gevoeg word is die deurslag gewende faktor. Die chef was Chinees en met hakkel en sukkel het ek agter sy geheim gekom.

Dit is baie belangrik dat die twee mele goed gesif word tesame met die hoender speserye, sodat dit eweredig versprei kan word. Geen direkte sout op die vleis want dit maak die vleis droog omdat dit vog onttrek.

Die schnitzel MOET vir ten minste 6 ure verkoel word voordat dit gaar gemaak gaan word. Ek maak dit ‘n dag voor die tyd of sommer baie wat ek vries en gebruik soos ek nodig kry. Die rede hiervoor, die krummels kry tyd om te set en gee nie af as jy dalk wil diepvet braai nie.

RESEP
300 g Droë witbrood krummels (jy kan Kellogs Cornflakes fyn maak vir ekstra kraak), jy kan selfs 100 g Parmesaan kaas byvoeg
250 g Koekmeel
250 g Mielieblom (maizena)
15 ml Hoender speserye of spesery van jou keuse
2 Eiers - liggies geklits
100 ml Melk
Hoender borsies - bees - vark - vis - sampioene net wat jou hart begeer!

METODE
 1. Kry 3 groot plat borde gereed.

 2. Vul bord no.1 met die broodkrummels.

 3. Vul bord no.2 met gesifde koekmeel, mielieblom en hoenderspeserye.

 4. Vul bord no.3 met eier en melk mengsel.

 5. Indien die hoender fillet nog heel is kan dit in die helfte gesny word. Kap dit dan plat met ‘n vleis mallet of groot paplepel se agterkant, sodat die borsie ‘n ewerdige dikte is. Dit help tydens die gaarmaak proses dat al die dele ewerdig gaar word en daar nie droë dele is nie.

 6. Onthou jy gooi nie al die hoender karplaks in die mengsels nie, elke borsie word met liefde een vir een deur die borde gesit.

 7. Doop die borsie in die melkmengsel en maak seker beide kante is met die eier bedek. Laat effens afdrup terwyl dit in die lug hang, ek vind dat ‘n vurk nie merke maak met die hele proses nie en dit help mooi vashou dat die gladde borsie nie rond gly nie.

 8. Plaas die borsie in die middel van die bord en bedek met meel van die kante af. Druk met jou hele handpalm die meel vas sodat dit goed vas sit. Lig uit meel met vurk, skud effens om oortollige meel te verwyder en laat eers eenkant, voltooi al die hoender borsies op die manier.

 9. Sodra jy klaar is doop weer elke borsie in die eiermengsel, drup af en plaas in broodkrummels. Sprinkel met nog krummels en volg soos in stap 8 om die krummels vas te druk.

 10. Plaas op bakplaat en laat set vir 6 ure, of 24 uur of bevries onmiddellik in lugdigte houer.

 11. Die schnitzel kan gediepvet braai word, vlakvet of vet vry gaar gemaak word (ek doen laas genoemde omdat ek ‘n kaas sous gaan maak).

VARIASIES
Hierdie schnitzel kan ‘n vulsels soos bloukaas en parmassan of kaas en ham binne kry. Dit wil sê jy sit tussen 2 schnitzels die vulsel en steek dit dan vas met tande stokkies, gaan deur die krummel proses en dan gewoon weg gaar gemaak word. Die stokkies word net na die tyd verwyder.

Bedien met suurlemoenskywe!!!

Genoeg vir 4 heel hoender borsies wat dan 8 schnitzels word as gehalveer word. Jy kan enige vleis, vark, vis, bees met die resep gebruik.

KAAS SOUS - sien Witsous Bere mengsel in files.

BRON: Annelien Pienaar,2015.

Geen opmerkings nie:

Plaas 'n opmerking