Saterdag, 30 Mei 2015

SJOKOLADE EN PYNAPPEL KAASKOEK GENOT


Hierdie is een van die maklikste en mooiste terte om vir ‘n spesiale kuiergas voor te sit.
Al vangplekkie wat daar kan wees is die werkery met die gelatien.
Maar moenie kommer nie.
Volg die instruksies in die les oor gelatien en jy sal verseker weet die gelatien sal nie rubberagtige klonte oplewer in die gestolde tert nie.

LES
1. Gelatien is ‘n dierlike produk wat van die velle, huide en kraakbeen gemaak word. Dit word hoofsaaklik gebruik om disse te stol


2. Gelatien word onstabiel die oomblik wat sure by die resep gevoeg word. Daarom moet rou pynappel, kiwi vrug, gemmer en papaja liefs eers geblansjeer word voordat dit bygevoeg word. Papaja bevat ‘n ensiem papien en pynappel bevat Bromelien wat die gelatien verhoed om sy werk te doen.

3. Gelatien kan in korrel, poeier of vel vorm gekoop word. Velle- vs korrels gelatien: 1 vel = 5 ml korrels of 3 velle = 15ml korrels / koevertjie. Hierdie omskakelings is net vir Suid Afrikaanse gelatien van toepassing. Daar mag kwaliteit verskille wees. Kyk asb op die pakkie wat jy koop wat die sterkte is wat gewoonlik aangedui word as silwer, gold en platinum.

Wanneer poeier of korrels gebruik word moet dit eers in bietjie water gespons word.
Dit beteken net eenvoudig dat die gelatien oor die water in ‘n glas bakkie gesprinkel word, die gelatien absorbeer die water en swel maksimaal uit.

Sodra dit al die vog absorbeer het word dit vir die kortste tyd verhit en dan by die mengsel gevoeg. Maak seker dat die gesmelte produk soos dik stroop lyk en GEEN klonte sigbaar is nie, glad en egalig!

Wanneer daar met velle gewerk word moet dit in koue water geplaas word om dan sag te word.
Sodra dit genoeg water geabsorbeer het moet die water uit die velle gedruk word en dan in ‘n warm vloeistof soos room of melk verder gesmelt word.

Maak seker met die velle dat alles gesmelt het.

4. Wanneer gelatien geregte ontvorm word maak die buite kante eers warm met ‘n warm klam lap sodat die koek maklik van die kante los kom en nie breek nie.

Breek ook die seel wat op die bokant van die gestolde koek vorm deur ‘n mes punt rondom in te steek net so 3 mm in en lig effens.


PYNAPPEL KAASKOEK

KORS
80 g botter - gesmelt
200 g gemmer koekies - fyn gedruk
50 g klapper - gerooster

METODE
1. Plaas die koekies en klapper in voedsel
verwerker en kap baie fyn.
Voeg die gesmelt botter by en druk in die koekpan.

BESLAG
425 g pynappel stukke - goed gedreineer - fyn gekap
5 gelatien velle
100 g strooisuiker
250 g mascarpone
500 g suurroom
160 g klappermelk
30 ml suurlemoen skil gerasper

METODE
1. Week die gelatien velle in koue water vir 20 minute.

2. Verhit die klapper melk en strooisuiker saam. Druk al die water uit die gelatien velle. Smelt dit in die klapper melk totdat al die velle gesmelt is.

3. Meng die res van die bestanddele saam en klits goed. Sodra die klappermelk gereed is voeg dit by die room mengsel.

4. Skep in voorbereide panne. Ek kry met hierdie mengsel 2 groot kaaskoeke uit as ek die 2 kleure doen. Dus berei 2 x 23 cm ringkoekpanne voor.

SJOKOLADE EN LEMOEN KAASKOEK 
225 g strooisuiker
200 g donker sjokolade - fyn opgekap
60 ml donker kakao
5 ml gelatien - gespons in 30 ml water
400 ml room
400 g roomkaas
5 ml vanielje geursel
5 ml lemoen skil - gerasper

METODE
1. Smelt die sjokolade in ‘n dubbelkoker en laat effens afkoel, moet nog loperig wees.

2. Meng die kakao met 60 ml kookwater en laat eers eenkant om af te koel.

3. Smelt die gelatien in die mikrogolf oond totdat dit soos stroop lyk

4. Klop die room tot styf en voeg die res van die bestanddele by en vou liggies in.

5. Skep in ringkoek panne en laat set oornag.

PORSIES: 2 groot terte.

BRON: Annelien Pienaar.

Foto van koek - vergunning van The Master cake baker, Pinterest.

Woensdag, 27 Mei 2015

SPEEL KLEI VIR DIE JONGSPAN


LES
Die kremetart preserveer die klei vir ongeveer 6 maande as dit lugdig gehou word.
Die kookolie of aroma olie keer dat die sout nie kleingoed se handjies en velletjies uitdroog nie.


WENK
Ek rol die deeg uit en stempel in die deeg teksture en druk dan vormpies uit, ek maak gaatjies met ‘n strootjie vir ‘n plekkie om ‘n toutjie deur te sit.
Dit word dan saam met my geskenk pakkies as versiering gesit.
Wie het gesê klei is nie vir grootmense nie?





RESEP
280 g  koekmeel - ek verkies Snowflake, gee fyner tekstuur
500 ml water
140 g tafelsout
15 ml  kremetart
15 ml kookolie
4 ml voedsel kleuresel
2 ml aromaterapie olie - opsioneel

METODE
1. Hou vloeistowwe eenkant.
Meng al die droë bestanddele saam.

2. In ‘n swaarboom kastrol verhit water en olie tot kookpunt en voeg die meelmengsel by.
Roer vinnig en aanhoudend totdat die deeg ‘n bol vorm en los kom van die kante.

3. Laat afkoel en knie goed vir 5 minute tot glad en sag.
Nou kan jy die reuk olie en kleursel byvoeg.
Stoor in lugdigte houers.

LEWER: 500 g klei.

BRON: Hantie Bezuidenhout saamgestel (alle eer aan my Moeder).

Dinsdag, 26 Mei 2015

OUMA SE VLEISPASTEI ROLLETJIES



LES
1. Alle deeg moet so koud as moontlik voorberei word sodat die botter nie kan smelt nie.  As die deeg te warm word dan gaan die olie uitbak en die deeg taai en olierig wees.   Dus hou alle bestanddele so koud as moontlik.

2. Om die botter makliker in die koekmeel in te vryf rasper die koue botter by die koekmeel in, dit maak die invryf tyd aansienlik korter.


3. Moenie die eierwitte weg gooi nie. 
Ek gebruik dit om skuimpies mee te maak, sien die resep in files oor meringues.

4. Gedurende die rustyd van die deeg in die yskas deel ek die deeg in 4 dele en plaas dit in A4 grootte sakkies en rol dit in die sakkie mooi plat, dit maak die uitrol later net baie makliker. 
Soms gebruik ek nie al die deeg nie en vries dit dan net so.

5. Vorm jou maalvleis vooraf deur dit op kleefplastiek in lang rytjies te skep en dan op te rol in worsies. Laat dit in die vrieskas styf word voordat jy dit gebruik, moenie vries nie. Die rol moet ongeveer 4 - 5 cm in deursnit wees.

6. GOM EN GLANSLAAG
1 eiergeel gemeng met 100 ml melk.

DEEG
8 kop koekmeel
5 ml sout
500 g botter - Rama of Stork bake - koud en gerasper
4 eiergele
4 el asyn
2 kop yswater

METODE
1. Vryf die botter in die meel en sout mengsel, totdat dit soos broodkrummels lyk.

2. Voeg die eier, asyn en water saam en klits goed deur.

3. Meng al die eiermengsel met die meelmengsel. 
Druk liggies aanmekaar en knie liggies. Plaas in yskas om te rus terwyl die maalvleis gemaak word.

MAALVLEIS VULSEL
1 kg maer maalvleis
500 g kapok aartappels
1 tl knoffel
sout en peper na smaak

METODE
1. Maak die maalvleis goed gaar met die knoffel in. Voeg die kapok aartappels by en meng deeglik deur.

2. Laat die maalvleis afkoel voordat dit gebruik word in die deeg, onthou al die bestanddele moet koud bly.

3. Vorm die maalvleis rolletjies en plaas in vrieskas om te set.

MAAK VAN PASTEIE
1. Rol die deeg ongeveer 3 mm dik uit in ‘n reghoek. Strooi die oppervlak waarop jy rol goed met koekmeel.

2. Plaas die worsie op die deeg en smeer die randjies met melk en eiergeel mengsel, dit is jou gom en ook jou glanslaag, rol toe en druk vas.

3. Net voordat jy die worsrolletjies bak, smeer met eiergeel mengsel en sprinkel sesamesaad, papawersaad, paprika of kaas bo oor, jou keuse.

4. Hierdie worsrolle kan dan bevries word of gebak word.

5. Bak by 180 ˚ C vir 20 - 25 minute.











BRON: Hantie Bezuidenhout se resep.

LES: Annelien Pienaar, www.bosenbergguestfarm.co.za











Saterdag, 23 Mei 2015

ROOSMARYN LAMSKENKEL EENSKOTTEL GEREG


Ons het groot geword met skaapvleis.
Elke winter het my ouers 6 skape, 2 varke, 2 beeste en 50 hoenders geslag, dit was omtrent ‘n slag der slagting!
My tannie hulle het saam met ons die vleis gedeel en ons kinders het maar so om die slagtery en verwerking rond gespeel.
Ons het so 2 weke lank die vleis verwerk omdat die skaap en die bees moes hang om ryp te word.
Ek onthou hoe my oom die skape in die donker stoor toegemaak het sodat hulle ontspanne was voor die slag proses, hulle het nog steeds toegang tot kos en water gehad.
Laat ek vir julle vertel, ek het tot op hede nog nie weer sulke sagte skaap geproe soos daardie van my kleintyd nie.
Ons was dan bederf met ‘n skenkel potjie wat my pa gemaak het, vandag nog is hy die Potjie koning in Skeerpoort, sy potte is legendaries!
Hier is my weergawe van my pa se potjie maar in die hutspot (slow cooker).


RESEP
1 kg lamskenkels of kombinasie van nek en skenkel
1 ui -  so groot soos vuis
3 groot wortels - in dik wiele gesny
2 seldery stingels - sny in klein wieletjies
5 ml sout
5 ml roosmaryn, gedroog
5 ml tiemie
5 ml swart peper - grof gemaal
125 g botter
500 g baba aartappels - afgespoel
250 g sampioene
100 g ertjies
250 ml gedroogde appelkose
250 ml gedroogde pruimedante
250 ml appelkoos sap
60 ml bisto poeier - aangemaak in appelkoos sap

METODE
1. Voorverhit swaarboom pan en gooi die botter in.
Braai die vleis tot bruin en die vleissappe alles ingeseël is, verwyder uit pan en sit solank in hutspot.

2.  Braai die uie en die seldery in die sous van die vleis tot glansend en deurskynend.
Sprinkel oor die vleis in die hutspot.

3. Plaas al die groente en vrugte in die hutspot met 1 kop water en bedek.
Laat prut op hoog vir 6 - 8 ure of totdat die vleis van die been los kom.

4. Maak die bisto aan met die appelkoos sap en voeg by die vleis.
Laat vir 10 minute deur kook en bedien warm met stampmielies.

PORSIES: 4 - 6.

BRON: Gert Bezuidenhout.

Donderdag, 21 Mei 2015

KARAMEL PEKANNEUT TERT


Hierdie tert het sy eie storie.
Aan die einde van my 4de jaar trou ek met die man van my drome, jonk en brandarm gaan werk ek in my af periodes by my tannie hulle se tuisnywerheid. Polfyntjie in die Brooklyn omgewing in Pretoria, het my kos kennis en ook mense kennis help verbreed.
Ek het wonderlike mense leer ken, vrouens wat se mans hul los vir ‘n mooi sekretaresse terwyl sy spook met die kinders.

Sy verloor alles en dan begin die merkwaardige vroue bak vir ‘n inkomste. Onder andere was daar een vrou, sy het hierdie ongelooflike Pekan Karamel tert gebak. Ek het 2 jaar by Polfyntjie gewerk en die dag toe ek graad vang en ons, ons eerste woonstelletjie koop, gee sy as “house warming” vir my die vars gebakte tert met die handgeskrewe reseppie by.


Vir my was dit die grooste geskenk ooit want ek het geweet hierdie vuisvoos vrou vertrou my met haar resep, haar inkomste! Sy het my geken en geweet ek sal dit nooit gebruik om by ander tuisnywerhede te verkoop nie. Sy het die styd teen borskanker verloor 'n paar jaar gelede. Hierdie merkwaardige vrou was Este Bherens!


Deur die jare het ek geskaaf en skuur aan die tert, ek wou nog ‘n dikker karamelagtige jellie laag onder in die tert hê.



VULSEL
250 ml goue stroop
½ kop sagte bruinsuiker - styf ingeruk
2 ml sout
5 ml vanilla geursel
15 ml suurlemoensap
3 groot eiers - geklits
1½ kop pekanneute - gebreek en heel
500 ml room - styfgeklop met 2 el strooisuiker

METODE
1.Voer ‘n 23 cm tertpan uit met die deeg, prik die basis en sprinkel ‘n mengsel van mielieblom en strooisuiker op die basis. Bak blind vir 10 minute.

2. Meng al die bestanddele saam en plaas in die gebakte kors. Draai die groot neute mooi regop sodat die ruggies na bo wys, jy kan regtig mooi patroontjies pak.

3. Bak die tert vir 10 minute by 200 ˚ C en daarna vir 40 minute by 160 ˚ C totdat die middel
geset het.

KORS
1½ kop koekmeel - gesif
2 ml sout
15 ml strooisuiker
½ kop botter
4 - 5 el water

METODE
1. Sif die koekmeel, sout en suiker saam.

2. In ‘n voedsel verwerker sny die botter in die meel in, of vryf met vingerpunte in die meel in.

3. Voeg die water by en druk aan mekaar.

4. Verkoel vir 30 minute, gebruik soos nodig.

PORSIES: 6.

BRON: Este Behrens.

Woensdag, 20 Mei 2015

SOETSUUR VARK EN PASTA GEREG


Hierdie wonderlike en vinnige dis kan met enige vleis gemaak word.
Die gereg het sy oorsprong van die Lo mein disse.
Ek gebuik graag gesonde olies soos klapper, druiwepit of olyfolie.
Die groente wat gebruik word is vars groente en heilsaam en gesond vir die hele gesin.

LES
Wanneer vleis in 'n pan gebraai word, maak eers die pan warm en voeg laaste die olie by.
Die kanse dat die olie kan oorverhit is baie goed en dit is ook nie gesond omdat die rook wat jy sien, akroloien is, wat karsinogenes (kankervormende) dele bevat.





RESEP
500 g vark repies vleis - geen vet OF hoender OF volstruis
500 g spaghetti
2 el kookolie OF klapperolie OF druiwepitolie
1 el knoffel - fyn gekap
1 tl vars gemmer - fyn gerasper
2 wortels - in julienne repies
500 g sampioene - skyfies gesny - vee net af, moenie in water spoel nie ander trek dit water
2 soetrissies - baie dun gesny, -verskillende kleure lyk mooi
1 tl sout
400 g boontjiespruite
4el sprietuie - fyn gekap

MARINADE
2 el soya sous - anders sal woestersous ook reg wees
1 el olie van jou keuse
2 el heuning
2 el bruinsuiker
2 el suurlemoensap
sout en peper na smaak

METODE
1. Meng al die bestanddele van die marinade saam en marineer die vleis daarin vir 1 uur.

2. Kook die pasta tot al dente, sag maar ferm as jy dit byt, in ligte gesoute water met bietjie olie by.

3. Indien jy ‘n wok het, haal hom uit en laat waai!

4. Maak die pan eers goed warm.
Sit dan eers 2 el olie by en braai die vark tot gaar.
Haal van die hitte af.
Was pan.

5. Verhit die wok weer en voeg 2 el olie by.
Braai die knoffel en gemmer totdat die geure ontwikkel.
Voeg die wortel by en braai vir 2 minute.
Dan volg die sampioene vir 2 minute en dan die soetrissie.

6. Meng dan die vleis by die groente in en laaste die pasta.

7. Verwyder van die hitte en roer die boontjiespruite en sprietuie by,
Bedien warm

PORSIES: 4 - 6 mense.

BRON: Annelien Pienaar - Bos en Berg gasteplaas.

Maandag, 18 Mei 2015

AÏOLI SOUS

Hierdie heerlike sous word soos mayonnaise gemaak.


RESEP
1 ekstra groot eiergeel - by kamer temperatuur
2 knoffel toontjies - fyn gemaak
5 el ekstra virgin olyfolie
5 el sonneblom olie
2 el suurlemoensap of witasyn




METODE
1. Klits die eiergele tot lig en donsig.

2. Klits dan die knoffel en sout by, proe aan die sout en peper.

3. Klits nou die olie een eetlepel suur en een eetlepel olie op ‘n keer by, klits baie lank en deeglik vir die olie om in suspensie te bly (die olie moenie weer kan skei nie).

4. Bedek en hou eenkant.

VARIASIE
1. Voeg by die klaar voorbereide sous 1 el Dijon mosterd, glad of heel korrels, 1 el witsuiker en gerasperde peper wortel.

2. Bedien as doopsous, mayonnaise vir ander geregte soos aartappel slaai, gebakte geregte soos vis, en gebraaide groente..

PORSIES: 4 persone.

BRON: Annelien Pienaar, Food and Clothing technology, 1999.


VISBALLETJIES MET AÏOLI SOUS

Visballetjies op Aioli sous bedien
Dit klink nou na ‘n vreeslike imponerende gereg, maar raai wat?
Dit is visballetjies bedien met ‘n spesiale mayonnaise.
Om die Aïoli te maak is regtig baie maklik, dit is geurig en ryk en bring die smaak van die 
vis uit.
Die balletjies kan in oormaat gemaak word en dan bevries word. 
Laat by kamertemperatuur ontdooi en bak soos gewoonlik. 
Ek het altyd in voorraad.

RESEP
700 g aartappels - geskil en in blokkies gesny
700 g haddock of stokvis of tuna
1 eiergeel - liggies geklits
2 knoffeltoontjies
2 e pietersielie - vars gekap
2 e vars dill tippies - gekap
½ tl neutmuskaat
sout en peper na smaak
suurlemoen wiggies

METODE
1. Kook die aartappel blokkies in liggies gesoute water tot gaar.Dreineer die water.

2. Terwyl die aartappels afkoel, posjeer die vis in melk vir 5 - 8 minute tot gaar, die vis moet ferm
en wit wees.Haal uit die melk en vlok met ‘n vurk.


3. Maak die aartappel fyn en voeg die eier en knoffel by terwyl jy dit doen.

4. Roer dan die kruie en sout by.Meng die growwe stukkies vis by.

5. Sit koekmeel aan jou hande om die balletjies te vorm, dit voorkom dat die balletjies vas sit aan
jou hande en gee ook ‘n mooi bruik krakerige tekstuur aan die balletjies as dit diepvet gebraai word.

6. Verhit olie in diep kastrol tot 180 ˚ C of totdat ‘n broodblokkie wat in gegooi word in die warm olie binne 30 sekondes verbruin.
Diepvet braai die balletjies in hopies van 5 op ‘n slag.

7. Onthou as jy te veel balletjies in die olie sit, die olie se temperatuur drasties gaan val en die balletjies dan olierig gaan wees...

8. Plaas op dreinerings papier en sit dadelik in voorverhitte oond om die krakerige tekstuur te behou.

Aioli sous
AÏOLI SOUS
1 ekstragroot eiergeel - by kamer temperatuur
2 knoffel toontjies - fyn gemaak
5 e ekstra virgin olyfolie
5 e sonneblom olie
2 e suurlemoensap of witasyn

METODE
1. Klop die eiergele tot lig en donsig.

2. Klop dan die knoffel en sout by...proe aan die sout en peper

3. Klop nou die olie een eetlepel suur en een eetlepel olie op ‘n keer by...klits baie lank en deeglik vir die olie om in suspensie te bly (die olie moenie weer kan skei nie).

4. Bedek en hou eenkant.

VARIASIE
1. Druk die balletjies plat om 'n viskoekie te maak.


PORSIES: 4 persone.

BRON: Annelien Pienaar, Food and Clothing technology, 1999.

ROSTI OMELET (AARTAPPELKOEKIE OMELET)

Hierdie aartappel omelet is wonderlik om vir vegetariër gaste voor te sit.
Ek bedien dit as ontbyt, ligte middagete en ook as bykos met hoofetes.
Jy kan proteine byvoeg of weg neem, vis, hoender, spek, gerookte salm, worsies en vele meer. Bedien met ‘n songedroogde tamatie pesto of soetrissie sous.


RESEP
250 g rou aartappel - gerasper of in baie dun skyfies van 3 mm gesny
1 middelslag ui - gerasper
2 knoffeltoontjies - fyn gedruk
1 wortel - gerasper
2 e olyfolie
1 soetrissie - kleur van jou keuse - julienne snitte
1 murgpampoentjie - gerasper met skil
2 groot eiers
3 eierwitte
2 el spriet uie - gekap
½  kop mature cheddarkaas -  gerasper
rocket blare vir garnering










METODE
1. Plaas die gerasperde aartappel in koue water vir 10 minute vir die ekstra stysel om af te kom en om te help dat die aartappel sy vorm behou as dit gesny word.
Dreineer die water, en druk droog met kombuispapier.

2. Meng die uie, knoffel en wortel by die aartappel.

3. In ‘n voorverhitte kleefvrye pan, braai die bogenoemde  mengsel vir 5 minute by medium hitte.

4. Voeg die res van die soetrissie en murgpampoentjie by en bedek met deksel en roer so 2 keer in 5 minute.

5. Klop die kaas, heel eiers, eierwitte, sprietuie, sout en peper en gooi oor die aartappel mengsel.
Roer liggies sodat alles kan deur werk en laat met deksel op by lae hitte gaar word en set vir ongeveer 5 minute.


VARIASIE
1. By stap 5 kan enige ander protein bygevoeg word.

Porsies: 4.

BRON: Annelien Pienaar, Bos en Berg guestfarm, 2006.


RYK DEMI-GLAZE SOUS VIR KWALITEIT VLEIS SNITTE

Bees fillet met Demi-glaze sous
Demi-glaze word gebuik by baie duur, sagte vleis snitte om geur by te sit. Dit is eintlik 'n bruinsous wat 2 dae neem om te maak. Propvol geur en effense alkohol geurtjie, die moeite werd om te maak, daarom dat dit duur is.

ESPAGNOLE SOUS AS BASIS VIR DEMI-GLAZE 
45 ml Olie
60 g Gerookte ham - fyn opgekap
½ Ui - opgekap
½ Wortel - opgekap
30 g Koekmeel
1 liter Bruin "veal" (kalfsvleis) aftreksel, ek kook maar self my aftreksels, koop dit nooit.
1 Tamatie - in kwarte
2 e Tamatie puree
Sout en peper
Bouquet garni

METODE
1. Verhit olie en voeg spek by en braai tot bruin. Voeg dan die ui en wortel by en braai tot sag.

2. Voeg die koekmeel by en kook stadig om 'n ryk bruin roux te vorm, dit neem so 5 minute.
Verwyder van hitte

3. Bring die aftreksel tot kookpunt en voeg so 'n ⅓de van die aftreksel by die roux en meng met whisk goed. Laat kook om te verdik.

4. Voeg dan die aftreksel by en kook weer. Voeg die res van die bestanddele by, die sous met vir 3 - 4 ure matig vinnig kook totdat dit met die helfte gereduseer is. Halfpad deur, gooi laaste van aftreksel by en skep die heeltyd die skuim af om die sous te verhelder.

5. Filtreer sous, moenie dit deur forseer anders maak jy die sous wolkerig en dit verloor sy glans.

VIR DEMI-GLAZE MOET JY DIE VOLGENDE BYVOEG BY DIE BASIS SOUS VAN ESPAGNOLE 


250 ml Espagnole sous
2 e Fyn gekapte sampioene
1 e Tamatie puree
2 en Bruin veal aftreksel
2 e Madeira wyn
15 g Vleis glansuursel (wanneer jy veal aftreksel kook totdat dit 'n taai besigheid word, dit kan vir maande gevries word, uiters gekonsentreerd
15 g Botter

METODE
1. Kook alles saam behalwe die vleis glansuursel en botter. Die vloeistof moet weer 250 ml word, so 30 minute se kook. Dreineer en voeg dan by die vloeistof die glansuursel en botter, klop tot glasig.

BRON: Annelien Pienaar, Bos en Berg gasteplaas, 2011.

Saterdag, 16 Mei 2015

SJOKOLADE SOUS

Hierdie wonderlike sous het soveel gebruike maar die beste van alles is dit hou vir maande in die yskas! Ek gebruik dit om my eie melkskommels te maak, as sjokolade sous oor nageregte, saam met my warm sjokolade drankie in plaas van suiker, meng dit met neute om jou cassata nog ryker te maak, man selfs saam met ‘n stukkie wildsboudjie en port sous!


RESEP
200 ml witsuiker
200 ml kakao poeier
200 ml water
200 ml botter - dit MOET ongelukkig botter wees
200 ml goue stroop of kondensmelk
200 ml room - kom laaste by
5 ml vanielje geursel - opsioneel of enige sjerrie of room likeur

METODE
1. Mikrogolf al die bestanddele behalwe die room vir 7 minute in ‘n groot oop glasbak by 100% krag.

2. Stop elke minuut en roer met draadklitser goed deur.

3. Laat die mengsel afkoel tot kamer temperatuur en roer die room by, die sous gaan ‘n pragtige glans kry.

VARIASIE
1. Meng 200 g van enige soort sjokoldae by - Belgies - Cadbury - Bak sjokolade..

2. Meng 200 g Tennis beskuitjies, 100 g neute, 100 g rice krispies, 500 g versiersuiker en 100 g marshmallows by. Druk in pan en laat set. Sny in blokkies.

BRON: Hantie Bezuidenhout, 1979.

PLAATKOEKIE GENOT

Hierdie plaatkoekies het elke kinderhandjie in my famielie deurstaan, as jy 6 jaar oud was, het jy jou eie plaatkoekies gebak! My ma het maar altyd handjie bygesit, maar ons het elke plaatkoekie gebak en versier soos ons wou.


RESEP
1 k Bruismeel
5 ml Bakpoeier
1 ml Sout
2 e Wit suiker
200 ml Melk
15 ml Olie
1 eier


METODE

1. Sif die bruismeel, bakpoeier en sout saam.

2. Roer die suiker by die gesifte meel mengesel.

3. Klits eier, melk en olie saam en meng met die droëe bestanddele.

4. Klits die mengsel tot glad en laat rus vir 30 - 40 minute sodat die stysel korrels kan uitswel en jou beslag nog dikker kan word.

5. Voorverhit ‘n kleefwerende pan en drup lepels vol deeg op die warm pan. Sodra daar borreltjies op die bokant verskyn en die koekie se kante verdubbel het in volume, kan jy die koekie draai.

6. Vir variasie spuit ek koekie drukkers met kleefwerende kos sproei en skep dan van die beslag in die drukkers wat in die warm pan geplaas word. Sodra die bokant effens droog gebak en borreltjies op het, lig die koekie drukker versigtig op om dit te verwyder en draai die koekie om. Hier is die koekie drukker dan nie meer nodig want die koekie sal nou sy vorm behou.

7. Bedien warm.

VARIASIE
1. Ek maak mooi ronde vormpies en dan bedien ek dit soos ‘n English muffin: spek, eier en kaas lagies of roer eier en spek lagie met tamatie skywe tussen in.

2. Nog 'n sout variasie is stukkies spek wat sommer so in die bakkende koekie gegooi word, as jy dit omdraai dan bak dit perfek, gooi dan maple stroop op, dit komplimenteer die spek wonderlik.

3. Jy kan stukkies vrugte soos granaat pitte in die beslag sit om 'n mooi kleurtjie te gee, enige soort bessie werk heerlik

4. Hier kan jy roomys tussen die 2 plaatkoekies bedien met ekstra sjokolade sous.

BRON: Annelien Pienaar, Food prep 3, 2003.

Vrydag, 15 Mei 2015

PEKANNEUT KOFFIE KOEK


Hierdie Pekanneut tert resep kom al vir jare saam met my familie.
Ek kon net nie anders as om hierdie kosbare stukkie koerant uitknipsel met julle te deel nie.
Lees ook die klein artikeltjie wat saam met die resep gaan.
Ek vermoed die resep kom van my moeder se vriendin van Amerika en die ander resepte se datums wys 1986.
Ons plaas is 'n Pekan produserende eenheid en jaarliks is hierdie koek 'n instelling vir my om te bak met die eerste pluksel neute.
Graag deel ek met julle hierdie juweel!
Ek versier die koek met die gewone roomkaas versiersel wat vir wortelkoek gebruik word, soms is ek lui en sprinkel net versiersuiker oor en bedien met 'n skeutjie room.
Die koek is heerlik klam.
Voeg 'n ½ tl kaneel ook by die koekbeslag, dit komplimenteer pekans ongelooflik!
BRON: Bertha Walker.



AARTAPPEL POFFERTJIES (POMME DAUPHINE)

Hierdie aartappel poffertjies is so oud soos die berge en mense vergeet soms van hulle.
Die basis is Kapok aartappels en Choux deeg (poffertjie deeg) wat gekombineer word.
Die balletjies kan gevul word met spek, kaas en groente.
Dit kan as vingerkos of bygereg bedien word.
Die worsies is heerlik om soos ‘n skyfie in sousies te doop.
Geniet!
Ronde bolletjies
RESEP
150 g koekmeel
110 g botter
knippie sout
150 ml melk
150 ml water
4 medium eiers - geklits
1 kg kapok aartappels - klaar gegeur
2.5 ml neutmuskaat

METODE 
1. Sif die koekmeel en sout saam.

2. Verhit die botter, melk en water tot kookpunt.

3. Voeg die koekmeel by die kokende water, verwyder die kastrol van die hitte.
Roer die inhoud baie vinnig totdat dit los kom van die kante van die kastrol en ‘n bal vorm.

4. Laat die mengsel afkoel totdat dit koud genoeg is om die eiers een vir een by te klop met ‘n houtlepel.
Hierdie is nogal moeilik, die deeg wil aanvanklik nie met die eier meng nie maar hou aan roer, houtlepel se kind werk nogal goed vir die werkie.
Elke eier moet so ingewerk word, nie alles op eenslag nie.
As die mengsel te warm is gaan die eiers gaarword!

Tradisionele Pomme Dauphines.
5. Die kapok aartappels moet geen vog inkry nie.
Kook die aartappel in sy skil tot gaar, moenie dit vooraf skil nie want dan het ons te veel vog in die deeg later en die bolletjies of worsies wat gespuit word gaan dan oop bars!
Druk letterlik net die aartappel fyn, dit is al, sout, peper en neut muskaat.

6. Meng die aartappel goed deur met die Choux mengsel.

7. Vul ‘n spuitsak met die mengsel,
Hier kan jy nou lekker speel.
Jy kan ‘n ster neus vat, die grootste gat wat jy het 48 en groter en spuit dan die mengsel in warm olie, sny elke repie af sodat almal regte lengte is.

8. As jy die balletjies wil maak spuit dan R5 grootte bolletjies met stomp neus punt en rol dit dan in bolletjies.
Diepvet braai.

VARIASIE
1. Jy kan spek, kaas (mozzarella, feta, haloumi) in die balletjies sit en bak.

2. Die balletjies kan ook in eier en broodkrummels gedoop word vir ‘n krakerige bruin voorkoms.

BEDIENING
As bykos by hoofgereg, vingerhappies op ‘n stokkie met heerlike doopsouse.
Kosblik happies vir die kleingoed...


BRON: Annelien Pienaar, Bos en Berg gasteplaas, 2006.

Woensdag, 13 Mei 2015

TUISGEMAAKTE MALVALEKKERS

Hierdie twee resepte wat ek met julle deel is al vir paar generasies deel van ons gesin.
Die eerste resep het nie eier witte in nie, dus vir mense met eier allergieë is dit heerlik lig en sponsig!

Die tweede een is die oudste van die 2 resepte en bevat wel eierwitte.

Hoop julle gaan berge van hierdie soet en sagte soentjies maak.

LES
1. Wanneer mens malvalekkers maak dan het dit baie dieselfde beginsel as met nougat maak.
Jy het ‘n suiker termometer nodig om regtig akkuraat te werk. 
En jy gaan klits dat dit my jou ore uitloop.
‘n Elektriese menger is van kardinale belang, jy gaan nie met die hand soveel lug in kan werk nie.

2. SPONS
Wanneer gelatien oor koue water gesprinkel word sodat dit kan hidreer, water kan absorbeer en dit maklik kan oplos wanneer dit verhit word.

3. SMELT VAN GELATIEN
Nooit in die mikrogolf oond nie.
Ek sit net die bakkie waarin ek die gelatien gespons het in ‘n ander houertjie met kookwater om die gelatien te help smelt.
Roer om op te los.
Vervang die water weer totdat al die gelatien gesmelt is en die mengsel soos dik stroop is.

4. Sodra die mengsel gereed is om in die pan geskep te word om te stol moet jy baie vinnig werk, die mengsel gaan stol, jy kan nie wag nie.
Maak dus seker dat al jou panne en bestanddele gereed is.

5. WAT IS DIE VERSKIL TUSSEN GLUKOSE STROOP EN MIELIESTROOP?
Glukose bevat 15 - 19% water en is ‘n inverte suiker.
Dit word gemaak in ‘n verskeidenheid konsentrasies, vir bak doeleindes is die konsentrasie dikker as mieliestroop.

Mieliestroop bevat 24% water en is gemaak van glukose en bygevoegde fruktose om kristallisering te voorkom.

Dus is die verskil net die vog inhoud wat verskil, maar eintlik dieselfde!
As jy versigtig is en die kokende suiker mooi oppas, kan gewone goue stroop gebruik word maar dan moet jy besef dat dit maklik kan brand en ‘n bitter nasmaak kan kry.

MALVALEKKER STOF
½ kop mielieblom (maizena)
½ kop versiersuiker

Sif alles 3 keer saam.
Hierdie stof word gebruik om te verhoed dat die malvalekker vas sit.

RESEP 1
2½ el gelatien
½ kop water om gelatien in te spons
½ kop water
⅓ kop glukose stroop
2 kop wit suiker
¼ tl sout
2 tl geursel -  rooswater / mint / vanielje / karamel / amandel
½ tl gel kleursel

1. Spons die gelatien in die water.

2. Plaas die suiker in ‘n hopie in die middel van die kastrol, ’n piramide!!!

3. Voeg die water by rondom die suiker om ‘n dammetjie te maak.
Draai die kastol in ‘n sirkel om die water en die suiker te meng, geen lepel in die suiker nie en geen roer!
Draai die kastrol net in die rondte.

4. Voeg dan ook die glukose by.
Was die kante van die kastrol af as daar suiker kristalle vas sit.
Doen dit deur ‘n kwassie in water te doop en dan die kristalle af te was.

5. Kook die stroop tot dit 115 ˚ C bereik of sagtebal stadium.

6. Smelt die gelatien voordat die stroop by 115 ˚ C kom.

7. Plaas die gelatien in ‘n mengbak, voeg die stroop by sodra dit op die regte temperatuur kom.

8. Klop die warm mengsel eers op stadig, jy kan hier lekker brand, die sous kan spat.

9. Sodra die mengsel skuimerig word verhoog die spoed en klits vir 10 - 12minute tot lig en donsig.

10. Voeg die kleursel en geursel by, klits die heeltyd soos jy byvoeg.

11. Skep die mengsel in ‘n voorbereide pan uitgevoer met waspapier wat gespuit is en dan met ‘n diklaag mielieblom mengsel gepoeier is.
Die bakpapier moet oor die kante van die pan gaan.

12. Maak gebruik van 2 panne wat dieselfde grootte is, die rede is, die een pan word bo op die ander pan geplaas met ‘n liter water as gewig om die mengsel mooi plat te maak.
Sprinkel ook die bokant van die malvalekker deeg met die mielieblom mengsel en sit weer gespuite bakpapier op voordat die pan met gewig op gesit word.
Onthou, doen ook so met nougat maak.

13. Los vir 3 - 4 ure om te stol, nie in die yskas nie!
Jy kan blokkies sny, vormpies druk, afval stukkies kan vir miljoenêrs tert gebêre word.
Elke gesnyde deel moet weer in die mielieblom mengsel gaan om die taaiheid weg te kry.
Die sny toerusting wat gebruik word kan met kleefwerende sproei gespuit word sodat die taai degie nie vas sit nie.

RESEP 2
2 el gelatien
¼ kop kraanwater  om gelatien in te spons
¾ kop kookwater
2 kop witsuiker
3 el goue stroop
2 eierwitte
1 tl vanielje geursel

1. Volg die stappe van nommer 1 - 10 van resep 1.

2. Klop dan apart terwyl die mengsel nog besig is, die eierwitte styf.
Vou dit dan in by die mengsel, werk hier baie vinnig en skep in pan.
Volg dan weer die res van die stappe in resep no.1

HOEVEELHEID: 1 groot oondpan.

BRON: Annelien Pienaar, 2001.




AARTAPPEL EN PARMESAAN VINGER HAPPIES



RESEP
3 el botter
3 el olyfolie of druiwepit olie is ook heerlik
2 el vars parmesaan kaas - gerasper
2 tl dill tippies - verkieslik gedroog - geur net meer intens
growwe sout
grof gemaalde swart peper
8 aartappels

METODE
1. Ek verkies om ronde aartappels eerder te gebruik as die langes.
Omdat jy toringkies wil maak gaan die ronde aartappels makliker die vorm aan neem.

2. Was en skrop die aartappels deeglik.
Sny die aartappels presies in die helfte oor die breedtste gedeelte van die magie.

3. Met behulp van ‘n mandaryn of skerp mes, sny die aartappel in dun skyfies van nie dikker as 3 mm.
Ek hou elke pakkie op mekaar.
Voordat ek die pakkies stapel en vorm spoel ek elkeen in sterk sout water af om die ergste stysel te verwyder.
Dit sal ook help dat die aartappel heerlik bros bak en nie taai bly nie, die stysel het suikers in wat karameliseer en dan bak die aartappel nie mooi nie.
Hou die pakkies mooi elke hopie bymekaar.

4. Sprinkel met dill, sout, peper en parmesaan kaas.
Strooi dan die gesmelte botter en olyfolie mengsel oor.


5. Pak elke pakkie op ‘n vooraf gesmeerde bakplaat en sprinkel weer met sout en peper na smaak.

6. Bak by 180 ˚ C vir 35 - 45 minute tot goudbruin.
Laat 5 minute afkoel voorbediening.

GEBRUIKE
1. Bedien as vingerhappies saam met ‘n heerlike kaasbord.

2. Bedien as stysel gereg saam met ander disse.

3. Bedien met souse!

BRON: Annelien Pienaar, 1998.

ROMERIGE AARTAPPEL EN PREI SOP

Hierdie heerlike sop kan met oorskiet kapok aartappels gemaak word.
Dit neem letterlik  minute as jy hierdie sop met die klaar gemaakte kappok aartappels maak.
Ek geniet dit om Panini te maak saam met hierdie ryk sop, die gaatjies in die panini se tekstuur slurp die sop op en ag, dit is net heerlik!


RESEP
1 medium ui - grof gekap
1 knoffel toontjie - fyn gedruk
15 ml olyfolie
2 seldery stokkies
3 preie (leeks)
5 medium aartappels - geskil
1 knippie neut muskaat
15 ml gedroogde origanum
2 liter water
1 blokkie groente aftreksel
sout en peper na smaak

METODE
1. Soteer ui en knoffel in olyfolie tot deurskynend.

2. Voeg die res van die bestanddele behalwe die water by en braai vir nog 'n minuut.

3. Voeg water by en prut vir 30 minute of totdat die aartappel sag is.

4. Verpulp die sop en voeg 250 ml room by.

5. Bedien warm of koud.

VARIASIE
1. Ek sit Bloukaas of Brie in my sop vir ekstra smaak, so ¼ wiggie is genoeg, te veel en die sop smaak seperig.

2. Fyn gekapte spek kan in die plek van crutons gebruik word.

3. Garneer met fyngekapte spriet uie en skyfies parmasaan kaas.

4. Suikermielies ingevou is ook heerlik.

5. Bedien met panini!!!

BRON: Annelien Pienaar.

Maandag, 11 Mei 2015

OUMA HANTIE SE KNOFFELROOM SOUS

Kyk geen huis kan sonder hierdie heerlike sous wees nie, my Ma het dit baie vir ons gemaak.
Sy was baie lief vir haar klei potte om die sous in te stoor, dit het koel gebly daarin en nog verder aangesuur.
Dus het sy die sous nooit in die yskas gesit nie.
Ons het dit op ons eierbrood geëet, as 'n groente bord se doopsous, gebraaide botterskorsie skywe, slaaisous, saam met gebakte groente as 'n sousie, saam met fillet en steaks, schnitzels, aartappel in sy jassie was natuurlik die gunsteling, gesmeer oor ons toebies saam met ham en kaas, kyk daar was nie 'n ding wat nie onder hierdie ekstra geurige sousie deur geloop het nie.


RESEP
250 ml vars room
250 ml suurroom
500 ml mayonnaise - Cross & Blackwell of Miracle whip maak dit heerlik
1 el knoffel - hoogvol
1 knippie neut muskaat
sout en peper na smaak



METODE
1. Klop die room tot styf, oppas, nie te veel klits nie want dan kry jy botter!
Sodra die klitser merke in die room maak en dit hou hul vorm is die room gereed vir die volgende stap.

2. Vou die suurroom en mayonnaise in by die geklopte room asook die res van die bestanddele.

3. Laat die mengsel vir 24 uur buite staan om dik te word.

4. Stoor in yskas vir tot 3 maande, hoe langer dit staan hoe lekkerder word dit.

BRON: Hantie Bezuidenhout, 1980.

AARTAPPEL PAKKIES


Dit gebeur gereeld dat mens oorskiet kapok aartappels na ‘n aandete het.
Deesdae vind ek myself aspris meer kapok aartappels maak as wat nodig is, ’n verskoning om môre oggend te eksperimenteer!
Ek weet vir die diabete kan julle met New Baby aartappels julle eie kapok aartappels maak, juis omdat die GI van hierdie aartappels laag is en ook verder verlaag as dit dan afgekoel word.
Dus maak ek vir my diabete die kapok aartappel klaar met bietjie laevet margarien, sout en peper na smaak, dan doen ek die aartappel pakkies.


RESEP
2  eiers
⅓ kop suur room of karringmelk of gewone yoghurt
1 kop gerasperde cheddar kaas -opsioneel -
50 ml parmesaan kaas vir diabete
100 ml parmesaan kaas of enige skerp kaas soos Brie of Cammenbert - kan uitgelaat word, dit is net vir smaak
3 kop kapok aartappels - reeds fyn gemaak
¼ kop spriet uie
¼ kop spek - opsioneel vir diabete
sout en peper na smaak

METODE
1. Voorverhit die oond na 180 ˚ C.

2. Smeer kolwyntjie pannetjies, ek het vierkantige cupcake wrappers gebruik vir die doel.

3. Klop die eiers en suurroom saam.

4. Meng die eiermengsel met kaas en spriet uie.

5. Proe die fyn aartappel vir sout en pas dit aan voordat dit by die mengsel gevoeg word.

6. Meng al die bestanddele saam en skep in voorbereide pannetjies.

7. Bak 25 - 35 minute totdat dit weg trek van die kante van die pannetjies.

8. Laat 3 minute afkoel in die pan voordat dit bedien word.
Bedien met suurroom of knoffel sousie.
Sien resepte vir knoffel sousie.

BRON:  Annelien Pienaar, 2012.

Sondag, 10 Mei 2015

CASSATA MET 'N TWIST

Ek het jare gelede by ‘n vriendin, Magteld Arnold se verjaardag die idee gekry om te kroek vir 'n asemrowende nagereg.
Dit neem net 10 minute om te maak en jy vergeet daarvan totdat jy dit môre nodig kry.
Bessie Cassata.

LES
1. Koop 2 liter vanielje roomys en laat dit vir so 10 minute by kamertemperatuur staan.
Neem 'n broodpannetjie en voer dit met kleefplastiek uit, dit moet oor die kante van die pannetjie gaan sodat dit later oor die roomys gevou kan word en dit help ook met die uitlig van die roomys na die tyd.
Hou dan die pannetjie in die vrieskas totdat dit tyd is om dit te vul met die roomys.

2. Sodra die kante van die roomys begin sag word, sny dit met 'n mes in skywe.

Sjokolade, neute en fudge cassata!
3. Plaas die roomys in 'n mengbak en klits dit met 'n elektriese klitser sodat dit begin sag word, amper soos margarien met 'n smeerbare konsistensie.

4. Nou begin die lekkerrrrrr gedeelte,  jy kan nou jou keuse van neute, kersies, vrugte, nougat, fudge of sjokolade splinters bysit, hoe meer jy by gooi hoe lekkerder...

5. Smeer die roomys so 4 cm dik op die boom van die pan.
Skep klonte gekookte kondensmelk hier en daar en smeer weer roomys, hou so aan tot al die roomys klaar is.

6. Sit onmiddellik terug in vrieskas en laat oornag styf word.

7. Net voor opdiening versier jy dit met bessies en eetbare blommetjies van jou keuse.
Jy kan ook sjokolade dip sous of karamel sous opsit.

8. Julle sal op die foto sien dat die kante van die roomys nog die kleefplastiek se vou merke het, dit lyk vir my mooi.

Ek het al honderde variasies van hierdie resep gedoen, eksprimenteer, dit het nog nooit geflop nie, werk net baie vinnig sodra die roomys smeerbaar is.

BRON: Annelien Pienaar, 2009.

Saterdag, 09 Mei 2015

GEKLEURDE YSTERVARKIES

Dit is die beste om die koek 'n dag voor die tyd te bak en dan te laat afkoel.
Stoor dit dan in die vrieskas om goed styf te word. Hierdie koek sny makliker sonder baie krummels, en absorbeer ook die stroop beter, die koek val ook nie uitmekaar as dit gedoop word nie, dus is die hantering van elke blokkie baie maklik.
Ek het altyd so 2 gevriesde koeke gereed vir nood gevalle.
Die klapper word nie vir die 3 kleure gekleur nie, net die verskillende strope.

Maak jou eie gekleurde Ystervarkies.
KOEK
250 g botter of Rama of Stork bak margarien
2 kop suiker
4 eiers
125 ml melk
3 kop koekmeel
15 ml bakpoeier
5 ml vanielje geursel
½ tl sout

METODE
1. Voorverhit oond tot 180 ˚ C. Smeer 'n oondpan goed.

2. Klits die botter en suiker tot lig en romerig.

3. Voeg dan die eiers een vir een by, klits eers baie goed voordat die volgende eier bygevoeg word. Die mengsel moet weer lig en donsig word.

4. Voeg die melk by en meng deeglik.

5. Sif die koekmeel, sout en bakpoeier saam en vou met 'n metaal lepel in by die eiermengsel.

6. Gooi die beslag in die gesmeerde oondpan en bak vir 50 - 60 minute of totdat 'n toetspen skoon uit die middel van die koek kom.

7. Laat koek afkoel en vries tot die volgende dag.

SJOKOLADE STROOP
3 kop suiker
¾ kop kakao
1½ kop water
15 ml botter of margarien


METODE
1. Voeg al die bestanddele behalwe die botter in 'n kastrol en verhit sodat die suiker stadig kan smelt.

2. Sodra suiker gesmelt is, verhoog hitte en bring tot kookpunt.

3. Terwyl die stroop kook voeg die botter by en roer goed deur.

4. Hierdie stroop moet vars berei word en warm gebruik word.

WIT STROOP
2 kop witsuiker
1 kop water
3 eierwitte
5 ml vanielje geursel

METODE
1. Verhit die suiker en water tot kookpunt en kook vir 5 minute.

2. Klits die eierwitte styf.

3. Voeg die stroop geleidelik by die styf geklitsde eierwitte.

4. Voeg die vanielje geursel laaste by.

5. Die rede vir die eierwitte is om koek stewig te hou en die klapper ook mooi te help klou.

PIENK STROOP
Die stroop word presies soos die wit stroop gemaak, daar word net kleursel en 5 ml rooswater by
stap 4 van die mengsel gevoeg.
Jy kan met paar druppels gel kleursel begin en self besluit hoe lig of donker jy dit wil hê.


Klein handjies kan ook help!
DOOP VAN DIE BLOKKE
1. Ek sny my blokke in 4 x 4 cm blokke.

2. Ek maak eers een kleur klaar voordat ek met die ander kleur aangaan.
Die klapper word maklik vuil dus doen ek die bruines laaste.

3. Ek gebruik ongeveer 500 g klapper op 'n baksel.

4. Om mee te begin, stroop in een diepbord en klapper in 'n ander, Doop die koek eers op die maag en die rug, draai en doen die kante, as jou vingers taai word lek dit af, grappie, vat 2 vurke vir die werk.

5. Plaas die blokke in die klapper en bedek al die kante.
6. Laat afkoel op drup rakkie.

Lewer 40 blokke.

BRON: Annelien Pienaar en Hantie Bezuidenhout, 1999.

ROLKOEK

Oprol van koek..

LES
1. Sommige van die Europese land noem dit Roulade of dit nou soet of sout is.

2. Die swissroll se beslag moet 'n dik romerige amper meringue dikte konsistensie hê.

3. Die koek bak baie vinnig omdat dit in 'n lang plat reghoekige pan gebak word en nie baie hoog rys nie.
As jy dit te lank bak word dit hard en bros soos 'n koekie en sal breek as dit gerol word.

4. Terwyl die koek bak, maak 'n vadoek nat en draai al die water uit.
Sprinkel 'n dik laag strooisuiker op die vadoek 1 minuut voordat die koek uit die oond kom.
Dit help die suiker om eweredig op die rolkoek vas klou.
Verder voorkom die nat lappie dat die koek nie bars nie.

5. Keer die koek op die vadoek uit, trek die waspapier af en sny bros kante af anders gaan dit die rol laat bars en nie mooi oprol nie.

6. Ek het die wonderlikste kleef vrye velle by Spar ontdek en gebruik dit in plaas van bakpapier wat alewig vasklou.
Hier haal ek nie die vel af nie.
Ek sny die kante van die rolkoek af en rol dan op met die vel en laat vir 4 ure afkoel voordat ek die vulsel insit.

6. Die doel van die invou metode met meel in mengsels is om die lug wat tydens die klitsproses vasgevang is nie uit te werk nie omdat lug as 'n rysmiddel dien.
Dus, moenie dit klits nie, vou in.

RESEP
120 g koekmeel
1 tl bakpoeier
knippie sout
4 eiers
1 el suurlemoensap
160 g strooisuiker - plus ekstra vir sprinkel


METODE
1. Voorverhit oond tot 200 ˚ C.

2.Smeer 'n bakplaat van 260 x 380 mm goed.

3. Sif koekmeel, sout en bakpoeier saam.

4. Klits eiers tot lig en skuimerig en klits dan suurlemoensap by.


5. Voeg die suiker geleidelik by en klits baie goed sodat die suiker kan oplos, die mengsel moet liggeel en donsig wees.

6. Vou een helfte van die meelmengsel in deur dit eers oor die eiermengsel te sif.
Herhaal met die ander helfte.

7. Gooi die beslag in die voorbereide bakplaat en bak vir 10 - 12 minute.

8. Doen voorbereiding van vadoek met suiker besprinkel

9. Keer die rolkoek op die vadoek uit en sny die kante af.

10. Rol op en laat 4 ure lank koud word terwyl dit opgerol is. Verwyder na 30min die klam doek en rol weer op. Bedek weer liggies.

11. Sit enige mengsel in bv. aarbei charlotte mousse, kaaskoek vulsels, versoete room, karamel kondensmelk, vlavulsels, roomys, die lys is nimmer eindigend.

VARIASIE

SJOKOLADE ROL
Vervang 50 ml van die koekmeel met kakao en maak die kakao met 25 ml warm water aan.
Swart sterk koffie kan ook gebruik word saam met kakao.
Vir 'n vulsel sal 'n heerlike bakkersvla of roomkaas vulsel goed werk.

KRULLETJIES OP BUITEKANT VAN ROLKOEK 
Ek haal so 50ml van die wit beslag uit en kleur dit sommer met bruin of swart kleursel.
Met 'n dun spuit neusie no. 0 kan jy dan patroontjies trek op die bakpapier, bak vir 3 minute om te
set en sit dan die wit beslag oor.
Sien prentjies

BRON: Aangepas vanaf Kos en Kookkuns vir VKIII, 2003, A Pienaar.

FOTO: Vergunning van Pinterest.

Vrydag, 08 Mei 2015

Warm Sjokolade drankie / Hot chocolate!

Warm sjokolade met tuisgemakte malva lekkers!
Hierdie reseppie kom nog van my Ma af. Toe ons almal uit die huis gegaan en gaan studeer het, het sy ons bederf met ‘n flessie van haar eie warm sjokolade, die lekkerste ooit. Met regte sjokolade splinters in hoe kan mens nie verslaaf raak aan hierdie konkoksie nie? Dan het sy nog ‘n stappie verder gegaan en tuisgemaakte malva lekkers bygesit. Sy het soms al die bestanddele in lagies vir ons in ‘n glas flessie gesit of soms klaar aangemaak met ‘n mooi doilie en ‘n “vry briefie” by. Ek mis my Ma ongelooflik en die soet van die sjokolade is altyd ‘n effense pleister op ‘n seer gemoed as ek verlang! Mag hierdie reseppie vir die een wat dit gebruik ook soete herinneringe gee. Geniet!

LES
1. Jy kan al die bestanddele in lagies in ‘n deursigtige glas flessie pak en laaste die malva lekkers.

2. Ek is lief om die kakao te deel in helfte donker kakao en helfte gewone kakao, dit is maar net vir mooi as ek die botteltjies in lagies pak.

3. Ek wissel die warm sjokolade af deur die bestanddele te varieer. Soms gebruik ek karamel sjokolade saam met 2 pakkie kits poeding op ‘n mengsel. Of wit drink sjokolade deur die kakao uit te haal en dan 2 pakkies vanilla kits poeding in te sit.

4. As ek die alles in 1 klaar gemengde bottel opmaak doen ek 2 goed, 1ste kan jy so 2 koppies malva lekkers in die poeier in meng en dan in die bottels skep of 2de kan jy die malva lekkers sommer so bo op in die flessie sit of as los pakkie aan die botteltjie heg.

5. Hierdie is my beste geskenk saam met my biscotti wat ek vir die mense gee. Ek daag nooit met leë hande by mense op nie!

6. Die mengsel kan vir 3 maande buite gestoor word, of vir 6 maande in die yskas of vir 12 maande in die vrieskas.

Geskenk pakkie
RESEP
6 k Melkpoeier - afgeroom of vetvry is ook geskik - die kleur van die drankie gaan net donkerder word.
4 k Strooisuiker
3 k Kakao
3 k Sjokolade splinters - gewone sjokolade is lekkerder veral as jy Belgiese sjokolade gegruik
½ t sout

METODE
1. Kap die sjokolade in ‘n voedsel verwerker baie fyn.

2. Voeg die res van die bestanddele by die sjokolade in die voedselverwerker en meng goed. Die mengsel moet goed gemeng wees voordat jy dit in die botteltjie skep.

3. As die lagies gepak word druk maar alles mooi vas sodat dit nie kan skuif nie, sien die foto van hoe ek die lagies uitgewerk het sodat dat die bestanddele nie meng nie.

GEBRUIKSAANWYSINGS
1. 3 t mengsel in 1 koppie kookwater opgelos. Voeg suiker na smaak by.

English Version

Klaar gemaakte mengsel
Hot Chocolate surprise
6 cups Milkpowder - you can also use low fat or fat free - the colour of the drink will just be darker 4 cups Castor sugar
3 cups Cacao
3 cups Chocolate chips - plain chocolate is nicer if you use Belgain chocolate
½ tsp Salt

Method:
1. Chop the chocolate in a food processor.
2. Add the rest of the ingredients to the chocolate in the food processor and mix well. The mixture must be well mixed before you spoon it into bottles.
3. When you pack the layers make sure to press it so that it doesn't move and mix.

Directions for use:
1.    Dissolve 3 tsp mixture in 1 cup boiling water.
2.    Add sugar to taste. MAKES: ± 2 litre mixture.

Source: Annelien Bezuidenhout Pienaar, 2015, Cooking classes: boerekostwist@gmail.com

Amount: 5 liters