Donderdag, 30 April 2015

ARTIKEL: LATANA CHEESE

Dean en Petra Lategan van Latana Cheese
Die tweede stalletjie wat my aandag getrek het was die bordjie agter teen die muur met al die gesegdes oor kaas.
Ek besef toe, ek moet bietjie hier vertoef en gesels.
Ek was baie bevoorreg om voor die publiek deur die tente kom, eers in stilte deur te loop en alles af te neem en te besigtig.
Hier het ek ‘n man met die naam Dean Lategan en sy pragtige vrou Petra ontmoet.
Hul besigheid se naam is Latana Cheese en is in die Oudshoorn distrik geleë.
Ek het soos oudergewoonte gou met die mense aan die gesels geraak en die storie agter die storie gesoek.

Die bord wat my oog gevang het....
Dean hulle het na aftrede besluit om ‘n kaasmaak kursus by te woon en het toe begin om self kaas te maak op die familie plaas waar daar met Jersey melkbeeste geboer word.
Gou moes Dean ‘n kaasmaakaanleg inrig en besef dit is nogal hardewerk, hy het Boeren kaas begin maak soos die mense van ouds dit doen.

Hy het ‘n kostelike staaltjie vertel hoe Ashley-Ann May (hul kaasmaker) eendag vanuit die lande na hom gekom het en kom vra of hy haar sal leer kaasmaak.
So het sy toe saam begin werk (eers as skoonmaker) en sonder dat Dean besef hoe geinspireer sy is, nie besef die juweel wat hy het nie.
Tot hy eendag vinnig moes lande toe om na ‘n probleem te gaan kyk en hy het toe reeds die rennet proses aan die gang gesit, hy het hom misreken en toe hy inderhaas terug jaag met die gedagte: “die hele pot kaas gaan weg gegooi word” was hy aangenaam verras.
Ashley-Ann het toe sowaar op eie houtjie die proses suksesvol voltooi.
Na 4 weke het hulle die kaas getoets en dit was heerlik.
Dean hulle het toe investeer in haar opleiding en sy is nou saam met Dean besig met die kaasmaak proses.
Kyk wie hou ook van Latana...
Nog ‘n staaltjie wat my hart sommer week gemaak het was die verlies 2 jaar gelede waar hul ‘n derde van die trop Jerseys verloor het.
Hul meisies het “snot siekte” gekry en baie is dood.
Elke meisie het ‘n naam gehad, Dean het vertel hoe hulle sy broer se alles was, want hy was die melkboer.
Hy het vertel die inskrywing in die stamboek toe hy die koeie se name dood getrek het, het gelui: ”Here, mag dit NOOIT weer gebeur!”
Kyk die oom Dean en ek was beide dik van die trane, ja vir die man sal ek my hoed afhaal.
Sy diere word goed versorg, sy kaas met sorg gemaak, hierdie Kaasplaas kry ook my volpunte!
Oom Dean en Tannie Petra, julle Boeren kaas is tops en julle gasvryheid ongeken!

In September 2014, word Lantana Cheese uitgenooi om deel te neem aan die Wêreld Jersey Kaas kampioenskappe, ’n internasionale kompetisie wat elke jaar in ’n ander land gehou word .
Hulle het sewe kase ingeskryf en wen vyf medaljes, silwer vir die Boerenkaas en Jogurtballe en brons vir Halloumi, Feta en Boerenkaas met Groen peper.

Julle kan Latana Cheese op FB soek en kontak by 082 375 7884 of epos stuur aan petra@lategan.co.za

ARTIKEL: LABNEH .. BULGAARSE STYL

Funky Chunky Labneh
Hoekom die reeks van resensies oor stalletjies? Wel ek het maar ‘n sagte plekkie vir mense wat op ‘n eenvoudige wyse ‘n bestaan wil maak en op eie stoom die mas opkom.
Graag wil ek Zhana Yordanova van Funky Chunky aan julle bekendstel.

Hierdie stalletjie, Funky Chunky, het my aandag aanvanklik nie getrek nie maar toe ek die Labneh proe het ek behoorlik die vroutjie met vrae gepeper.
Zhana Yordanova is van Bulgarye en is nou so 2 jaar in SA.
Sy het in Bulgarye op die platteland groot geword en baie by haar oupa geleer kaasmaak en kleinvee boer.
Sy vertel dat hulle Labneh met bokmelk en ook skaap melk gemaak het.
Sy het so ‘n pragtige statige houding en so trots op haar produk.


Labneh balletjies in verskeie krue gerol
‘n Oulike wenk wat ek by haar gekry het rakende hanslammers, as jy ‘n ooi het wat genoeg melk het om ‘n hanslammer te voed moet jy die twee se sterte teen mekaar vryf.
Die ooi sal haarself aan die lammer ruik en dan nie die lam weg stoot.
Ons kom dit baie oor, veral as die kudde groot is.
En as ek nou daaraan dink, maak haar opmerking sin, ’n ooi ruik altyd aan haar lam se boud en begaan hom om te drink, dus minder tietie bottels vir my!!!

Maar wat ek eintlik by wil uitkom is die Labneh, dit is soos yoghurt kaas met ‘n groot verskil in die lengte van die tyd wat dit gemaak word, die bokmelk wat sy gebruik en die speserye wat sy om die bolletjies sit.
Ek het ‘n botteltjie van die Medeterainian Labneh gekoop, dit het geroosterde sesamsaad, knoffel, gerookte paprika en mosterdsaad as buite lagie en dan in olyfolie gestoor.
Om julle ‘n idee van die sterkte van die smaak te gee, sy het ‘n ⅛ ste van ‘n teelepeltjie op ‘n stokkie bedien en dit was genoeg om my smaak kliere aan die dans te sit!!!
Sy wou nie die resep gee nie maar ek het wel haar proses uit haar gekry, sodra ek alles ontsyfer het, gaan ek my weergawe vir julle stuur, ek moet nou net ‘n bok gaan soek vir melk!
Maar ek gaan met beesmelk probeer sodat almal dit kan maak met die yoghurt wat in die winkels beskikbaar is...

Nou dink julle seker hoe eet mens die bolletjies, wel sy het voorgestel jy kan dit gebruik om jou taaier vleis snitte met dit in te vryf en te marineer oor nag.
Gebruik dit saam met vis, bak die vis of braai en bedien halwe bolletjies, soos dit smelt besprinkel met fyn dill tippies.
Ek het persoonlik ‘n groot sampioen met olyfolie uit die Labneh botteltjie bedruip en ‘n volle bolletjie bo op gesit en gebak, mense dit was verby hemels!!!
Dan kan jy dit ook met gemengde groentes bedien.
Of as ‘n dip of smeer by ‘n groente bord of saam biltong en koekies.
Die lys is nimmer eindigend.

Dus kry Zhana Yordanova  by my volpunte vir ‘n kwaliteit produk en ook omdat sy so sprankelend was!

Vir diegene wat in Kaapstad omgewing woon en graag haar produkte wil proe, kan Zhana gekontak word op 072 016 0116 of www.funkychunky.co.za 

BRON: Annelien Pienaar, Kaasfees, Stellenbosch, 2015.

Woensdag, 29 April 2015

VLEISROLLE



 LES

 1. Oondbraai is die gekose gaarmaak metode.

2. Hoe word interne temp gemeet? Met 'n vleis termometer. Die termometer mag nie aan been raak as dit in die vleis gesteek word nie, been gelei hitte baie vinniger as die vleis self en dus sal jy nie 'n akkurate lesing kry nie.

3. Laat die vleisrol eers rus voor en ook na die bakproses.

SPINASIE GEVULDE VLEISROL
 1.5 kg Vleis rol of ontbeende rib
 10 ml Sout
 Vars gemaalde swart peper
 20 ml Koemeel


SPINASIE VULSEL
 4 Repe spek - op gekap
 ¼ Ui - fyn gekap
 1 Knoffel toontjie - fyn gedruk
 125 g Spinasie - afgespoel en fyn gekap
 100 ml Cous-cous - opsioneel
 10 ml Tiemie
 80 ml Vars broodkrummels
 30 ml Parmesaan of blou kaas

METODE
 1. Braai die spekvleis liggies en voeg die uie en knoffel by en soteer tot sag en deurskynend.

2. Voeg spinasie by en roerbraai vir 'n minuut.

3. Laat afkoel en voeg broodkrummels, kaas en geurmiddels by en meng goed.

4. Skep vulsel oor die binnekant van die oopgevlekte vleis. Moenie oor die randte gaan nie.

5. Rol versigtig op en bind vas met tou.

6. Meng sout, peper en meel en strooi oor die vleis.

7. Plaas vleis in skottel met deksel en bak vir 2½  - 3 ure by 140 ˚ C.

8. Haal deksel af en bak bruin.

Bedien saam met vleis sous.

BRON: Verweking deur Annelien Pienaar van Vleiskookboek van SA se resep vir VK3.

Vrydag, 24 April 2015

LEPEL SKONS

Ek meng ‘n koppie kaas met ‘n halwe koppie gaar spek of gerasperde ham by die beslag. Bedien met room, maaskaas, konfyt of my gunsteling Bovril. 
RESEP
560 g (4 k) koekmeel
5 ml (1 t) sout
15 ml (1 e) bakpoeier
5 ml (1 t) koeksoda
2 groot eiers
125 ml (½ k) sonneblomolie
15 ml (1 e) witsuiker
500 ml (2 k) karringmelk
250 ml (1 k) melk


Voorverhit die oond tot 200 ˚ C. Berei 2 muffin panne voor met kleef werende kos sproei of Koekepanne smeer op blog. 

Meng die melk, eiers en olie tot glad. 
Meng en sif alle droë bestanddele saam. Meng die vloeistof by die droë bestanddele, moet nie te veel meng nie.

5. Die deeg moet klonterig wees.


6. Skep in gesmeerde muffin pannetjies en bak vir 15 - 20 minute.



English version
560 g (4 cups) cakeflour
5 ml (1 tsp) salt
15 ml (1 tbsp) bakingpowder
5 ml (1 tsp) bicarbonate of soda
2 large eggs, beaten
125 ml (1/2 cup) sunflower oil
15 ml (1 tbsp) white sugar (optional)
500 ml (2 cups) buttermilk
250 ml (1 cup) milk

Pre heat oven to 200 ˚C. Prepare 2 muffin tins with butter or oil. Set aside.

Sift together all dry ingredients. Mix all liquids and eggs together. Combine the two and mix until lumpy. Don't over mix. Must be lumpy. Scoop into tins and devide into 24 portions. 

Bake for 15 - 20 minutes.

BRON: Annelien Pienaar.

Dinsdag, 21 April 2015

UIE ATJAR - NACEEMA SE RESEP

Ek vervang gereeld die gewone wit uie met rooi uie en die wit druiwe asyn met bruinasyn om 'n rooier uie atjar te kry, speel!

RESEP
3,5 kg uie - in ringe gesny
1,125 liter witdruiweasyn
50 ml gouestroop
1 kg suiker
50 ml mosterd saad
15 ml garam masala
7 ml sout
100 ml mielieblom (maizena)

METODE
1. Plaas die uie in 'n kastrol en bedek met warm water.

2. Blansjeer vir 5 - 10 minute.
Dit moenie pap kook nie, dreineer goed.

3. Meng res van bestanddele, behalwe maizena in 'n kastrol en verhit.

4. Roer tot al die suiker opgelos is.

5. Maak die maizena aan met net genoeg koue water om 'n gladde pasta te maak.

6. Verwyder die kerrie mengsel van die hitte en roer die maizena by.
Plaas terug op die stoof en kook tot verdik en gaar.

7. Gooi die uie by die kerrie mengsel en kook goed deur.
Skep in gesteriliseerde bottels terwyl warm.

Lewer ongeveer 4.5 liter Atchaar.

BRON: Naceema Patel, Skeerpoort.

Maandag, 20 April 2015

SPESERY GEMMER EN APPELKOOS KLUITJIES

Aangesien die winter sy jassie nou sommer so vroeg in April om ons trek is dit tyd vir een van my persoonlike gunstelinge, gemmerkluitjies. Dit is my onthou kos, my tannie het dit altyd gemaak, sy het ‘n koper kastrolletjie spesiaal vir dit gehad. Dit was oorlog as my oom dit durf waag gebruik vir iets anders. Ek het altyd die kastrolletjie uit gelek met my vinger.
Mens mis daardie tye so as mens ouer word en na jou eie kindertjies kyk, jy wonder watter herinneringe hulle eendag van jou kos sal koester.

LES
1. Al wat hier kan fout gaan is die deeg mag dalk kluitjierig uitkom maar ek het met jare se loer oor my tannie se skouer geleer, ”MOENIE DIE DEKSEL OPTEL VOOR 15 minute verby is nie anders slaan hy toe soos ‘n klei os se agterent!”, liewe tannie Ina.

2. Verder het ek ook ondervind as jy winkel appelkoos konfyt gebruik is die suur nie genoeg om die koeksoda goed te aktiveer nie.
Dus as jy nie ‘n ander opsie as winkel appelkoos konfyt het nie, voeg 1 tl asyn by die botter en appelkoos konfyt soos dit smelt.

3. Kry eers al jou bestanddele gereed voor jy begin, tydsberekening is belangrik.

4. Meet die koeksoda perfek af anders gaan te veel koeksoda ‘n  seperige nasmaak tot gevolg hê en te min die kluitjie nie veerlig laat uitkom nie.

5. Lees mooi en ek belowe jy kan NIE die ding laat flop nie!
Sukses is gewaarborg.

STROOP
1 liter Water
1 k Wit suiker
1 t fyn Gemmer
½ t fyn Kaneel
knippie Sout

METODE
1. Voeg al die bestanddele saam in ‘n diep genoeg kastrol wat jy weet nie aanbrand nie en waarvan die deksel dig seel. Roer om die suiker te laat oplos.

2. Kook vir 8 - 10 minute terwyl jy met die deeg begin.

DEEG
½ k Appelkoos konfyt (165 g)
125 g Botter - Rama of Stork bake
10 ml Koeksoda
200 g Koekmeel
knippie Sout

METODE
1. Smelt die botter en appelkooskonfyt saam in ‘n kastrol, dit moenie kook nie.

2. Voeg die koeksoda by, ’n mooi skuimerigheid sal vorm, dit beteken die koeksoda is geaktiveer en gaan begin koolstof dioksied vrystel.

3. Roer die koekmeel met ‘n  houtlepel in die appelkooskonfyt mengsel in. Werk vinnig en moenie dit laat staan nie. Die gedoente is besig om te werk en as jy te lank wag gaan die aktiwiteit afneem.

4. Skep eetlepels vol deeg in die kokende stroop, sit die deksel op en verlaag die hitte na medium en kook vir 15 - 20 minute. Toets, as jy ‘n mes in die middel van die kluitjie insteek en weg trek en dit lyk koekerig en droog dan is dit gereed. Die kleur van die gereg is ‘n ryk diep karamel kleur...

5. Bedien met room of roomys.

Porsies: 6.

Bron: Ina Venter Lombard.

Foto: Golden Cloud koekmeel.

Sondag, 19 April 2015

MERINGUES EN PAVLOVA


LES
1. Wanneer meringues gemaak word moet jy so vetvry as moontlik werk.
Dit beteken dus dat die toerusting wat jy gebruik skoon moet wees en met skoon vadoeke afgedroog word.
Die klitser moet ook deeglik skoon wees, olierigheid veroorsaak dat die eierwitte NIE gaan styf klop nie.
Moenie in plastiek bakke meringues maak nie. Plastiek is porieus en stel self ook olie vry wanneer dit verhit word soos bv met die was proses. Dus bly asb weg van plastiek. Ja, ek het al redenasies gehoor as jy die bak met asyn uitvee is die probleem opgelos...Ja, ek stem saam....maar wat as jy vergeet soos ek?
Dus kan jy alle toerusting met 'n asyn lappie afvee om ekstra olie te verwyder.

2. Wanneer eiers geskei word moet daar versigtig geskei word om te voorkom dat daar eiergele in die witte ingaan, die eiergele het ‘n vet in en veroorsaak dan dat die eierwit nie wil styf klits nie, gooi weg en begin oor, glo my.

WENK
Eiergele kan in yshouertjies met 1 tl water by elke gevoeg gevries word, ek gebruik dit in my pastei korse!

3. Gebruik eiers wat by kamertemperatuur gelos is vir ten minste 30 minute of plaas in lou water as dit direk uit die yskas kom vir 10 minute.
Eiers by kamertemperatuur klits tot ‘n hoër volume as koue eiers.

4. Wanneer die suiker by die stywe meringue gevoeg word moet dit lepels gewys gedoen word en goed geklits word die heeltyd sodat die suiker korrels goed kan oplos en die mengsel ‘n amper silwerglans verkry.
Jy toets ook die mengsel of dit gereed is deur die meringue tussen die vingers te vryf en voel of die korrels opgelos is.

5. Hierdie is ‘n stadige proses so wees maar geduldig.

6. Ek bevries my oortollige klaar gebakte meringues (kleiner, goed gedroogdes) vir tot 6 maande tussen waspapier lae in lugdigte houer.

7. Geur middels en kleur middels word eers aan die einde van die proses bygevoeg.

8. Die asyn en kremetart wat bygevoeg word is beide ‘n suur en dit help die eierproteine makliker koaguleer (stol) en meer wolkerig word.
Die mielieblom gee weer aan die groot pavlova ‘n marshmallow binnekant, sponsig en sag.

9. MOENIE as die humiditeit hoog is die meringues maak nie, dit gaan taai word as dit afkoel.
So moenie goed op die plate kook dat die stoom staan en dan die meringues bak nie, eintlik word meringues gedroog nie gebak…

10. VARIASIES OP GEURE
Kaneel en pekans, rooswater, swart bitter kakao ingevou sodat dit ‘n marmer effek gee, koffie en fyn amandels vir ‘n cuppacino smaak, speel!!!
Onthou dit word altyd laaste bygevoeg!

11. Vir die bogenoemde pavlova het ek aan die einde van die klits proses die meringue oop gesprei op 'n bakplaat en die kakao oor gesif (4 el), toe het ek dit van die kante na die middel toe gevou.
Toe weer oor geskep in gesmeerde bakplaat...

RESEP
1 kop strooisuiker
3 eiers - by kamer temperatuur - geskei
5 ml asyn
15 ml mielieblom (maizena)
2 ml kremetart
5 ml vanielje geursel

METODE
1. Klits die eier tot stywe punt stadium, NIE droog en vlokkerig nie!

2. Klits die asyn, mielieblom en kremetart by.

3. Voeg die strooisuiker 2 eetlepels op ‘n slag by, klits 5 minute en voeg weer 2 eetlepels by, hou so aan totdat al die suiker ingewerk is.
Toets die meringue of dit reg is, kyk na die glans, dit moet ‘n lint vorm as jy die klitser oplig en die suiker moet opgelos wees.

4. Vou nou die geursels en kleursels by.

5. Om die pavlova te vorm word die meringue mengsel met ‘n groot opskep lepel, hoop vir hoop op mekaar gestapel en effens afgeplat en dan gebak vir 2 ure by 110 ° C.
Vir die kleiner skuimpies of nessies word dit gebak vir 1½  uur by 110 ° C of toets of dit droog is, ek hou van hulle so effens taai.

VULSELS VIR PAVLOVA
500 ml gewone yoghurt - ek verkies die dikker Greekstyle
½ k versiersuiker of
½ blikkie kondensmelk
5ml vanielje of karamel geursel

METODE
1. Meng al die bestanddele saam en net voor opdiening word die souse oor gesit en die vars vrugte gerangskik.

2. Onthou die meringue gaan begin oplos sodra die sous op gaan, dus moenie dit langer as 30minute voor bediening maak nie.

Maak 'n aarbei of bessie stropie wat saam met die sous bedien word. Sien Aarbei stroop resep in files

RESEP SAAMGESTEL DEUR: Mrs A Pienaar for Hospitality Studies, Tshwane North FET campus, 2003. www.bosenbergguestfarm.co.za

SUIKERMIELIE EN JALAPENO GROWWE DOOPSOUS


LES
1. Het jy ‘n slowcooker wat net in die kas staan?
Nou is die tyd om dit afte stof en deel van jou elke dag toerusting te maak.

2. Hierdie dip neem 2½ uur om te maak, dus gooi alles in die pot, maak solank die ander goed klaar en voila.

3. Neem ‘n handdoek en sit dit oor die slowcooker om dit vinniger te laat werk en ook hitte te hou sodat die kos sappig en sag uitkom.
Gedink my vriendin maak ‘n grap, maar dit werk.

4  repies spek - fyn gekap
2 blikkies suikermielie pitte - gedreineer
2 Jalapeno’s - ontpit en opgekap - die in die botteltjies - soetrissie kan ook ingesit word
½ kop suurroom
1 kop verouderde cheddar kaas
½ kop parmesaan kaas
250 g roomkaas
2 el sprietuie
sout en peper na smaak - vars gemaal

METODE
1. Braai spek stukkies tot bruin oor medium hitte en dreineer vet.

2. Plaas mielies, jalapeno’s, suur room, cheddar en parmesaan kaas in slow cooker en meng goed. Laat vir 2 ure kook op Low heat.
Moenie die deksel oplig nie.

3. Voeg na 2 ure die roomkaas en spriet uie by en bedien dadelik.

Lewer 8 porsies.

OPGESTEL DEUR: Annelien Pienaar vir Meerhof skool.

Saterdag, 18 April 2015

WENKE VIR DIE DROOG VAN KRUIE

Hier is 'n lessie oor die droog van kruie.
Elke foto wat ek post het ook 'n verduideliking by.
Ek kon ongelukkig nie afrikaanse prente kry nie maar deesdae soek jy jou dood in die winkel na kruie as jy nie die engelse naam ken nie.
Ek het in die begin van die groep in Januarie vir julle 'n les gepost oor die engelse, afrikaanse en indiese name, ek gaan dit soek en weer post.
Geniet en print die kruie kaarte vir julle uit.

KRUIE
Omdat die geur van kruie delikaat is en maklik deur son en hitte vernietig word, word kruie verkieslik op ‘n natuurlike manier in koelte in ‘n goed geventileerde vertrek gedroog.
Baie soos jy biltong op die boere manier sou droog.
Onthou die geur van die spesifieke plant word deur die vlugtige olies teenwoordig in die blaar veroorsaak, dus as dit gekneus word, word dit vrygestel en oksideer dan en verslaan.

DROOG VAN JONG KRUIEBLARE 
Pluk takkie en al af en spoel deeglik onder water.
Plaas in gaasdoek en dan op koerantpapier.
Moenie droog druk nie, dit sal die blaar kneus en die olie vrystel.
Laat dit vir 2 weke om te droog.
Stroop die blare van die takkie af en bêre in lugdigte houers weg van direkte hitte en sonlig.

DROOG VAN EETBARE KRUIE BLOMME
Maak bondeltjies van 10 stingels aan mekaar vas en hang onderste bo op.
Ek het nie baie plek om op te hang nie en gebruik my opvoubare wasgoed rakkie vir die werkie.
Na ‘n week stroop die blomme af en droog soos vir jong kruie blare tot droog vir 2 weke.
Stoor soos jong kruie blare.

DROOG VAN KRUIE WORTELS
Sny die wortels in dun skyfies of stukke.
Plaas op afkoel rakkie vir goeie ventilasie op gaasdoek om nie deur te val nie.
My ma het dit met garing geryg en dan so in stringetjies opgehang.
Volg die droog stappe soos vir jong kruie blare.

Jy kan die kruie teen 60 ˚ C vir 6 - 12 ure droog, afhangende van die krui se vog inhoud maar onthou van die vlugtige olies mag oksideer...

Hier is ons Faceboek bladsy ... Boerekos met 'n Twist ... like hom as jy wil.

BRON: Annelien Pienaar.