Donderdag, 31 Desember 2015

KRAKERIGE KOOLSLAAI

Vandag was ‘n dag vol verrassings. Ek het hierdie slaai die eerste keer by my Duitse skoonsus geëet jare gelede. So het ek die resep by haar gekry en soos die jare verby gegaan het, het ek nie dit in ‘n harde kopie aangeteken nie en die papiertjie het verlore geraak. Ek het maar so op gevoel die slaai gemaak maar daar was altyd ietsie kort. Vandag toe ek my rekenaar aansit kry ek ‘n FB inbus van Charmaine Louw met die presiese resep soos wat Christa dit vir my gegee het! Tot op die woord en letter presies net so! Baie dankie Charmaine vir die resep.

Ek kan julle verseker dat hierdie slaai voorwaar ‘n treffer is. Hierdie is ‘n slaai wat niks van oorbly nie, dit word vinnig opgeraap! Die slaai word net voor opdiening aan mekaar gesit en die slaaisous op die laaste minuut oor gegooi. Hierdie is ‘n resep wat regtig bewaar moet word. Soms sit ek bietjie feta by vir variasie of bokmelk kaas...lekker speel en geniet!


RESEP
Mangetout .... Snowpeas
VARS SLAAI
2 Klein groen kooltjies - fyn gekap
1 Ui of sprietui - fyn gekap
1 Bakkie mangetout - fyn gekap  (sien foto)
1 Seldery stingel - opsioneel
½ k Koljanderblare of pietersielie na smaak - gekap

METODE

1. Meng al die bestaddele saam.

KRAKERIGE LAAG

100g Amandelvlokkies of neute van keuse
1 Pakkie 2 min noedels (hoendergeur)
125 ml Sonneblomsaad
100 ml Sesamsaad

METODE

1. Plaas al die bestanddele in ‘n kleef vrye pan en rooster die amandels, noedels wat jy grof breek met die hand, sesamsaad en sonneblomsaad saam totdat die amandels begin verkleur. 

2. Gooi die bestanddele dadelik uit in ‘n aparte bakkie, anders gaan die amandels brand.


SOUS

125 ml Olie
65 ml Sagte bruinsuiker
65 ml Wit asyn (ek gebruik wit balsamiese asyn as dit invoorraad is)
15 ml Sojasous
5 ml Hoendergeursel (wat in pakkie was) - opgelos in 15 ml kookwater

METODE

1. Meng die olie, bruin suiker, asyn, soja sous en hoender aftreksel saam.

2. Net voor opdiening word die slaai netjies op ‘n plat slaai bak oopgestrooi. Daarna volg die krakerige neute en dan die sous. Onthou hierdie is nie ‘n slaai wat kan oorstaan tot die volgende dag nie. Die pasta gaan pap word. 


HOEVEELHEID: 6 - 8 persone.


BRON: Charmaine Louw, 2015, verwerk, getoets en fotografie deur Annelien Pienaar.




YSKOFFIE

Rista Greyvenstein het vir my haar dogter se yskoffie resep gestuur. Ek het dit gemaak en dit is ongelooflik lekker. Veral in die versengende hitte van hierdie somer seisoen is dit regtig ‘n welkome lafenis! Baie dankie vir die deel van die resep!

RESEP
25 ml Espresso of
30 ml Sterk swart koffie
200 ml Melk
3 scoops Vanielje roomys (1 k)
4 - 5 Ysblokkies - kap fyn in voedsel verwerker
room vir versiering

METODE

1. Voeg al die bestanddele in ‘n voedsel verwerker en meng tot ‘n gladde konsistensie.

2. Gooi in verkoelde glase en versier met room en sjokolade splinters.


NOTA: Vries oorskiet koffie van die perkuleerder in ysbakkies om in die mengsel te gebruik ipv gewone ysblokkies. Hang af van hoe sterk jy van jou koffie geur hou.


HOEVEELHEID: 1 porsie.


BRON: Rista Greyvenstein en Juney Greyvenstein, 2015.


Woensdag, 30 Desember 2015

KETELGEBRAAIDE UIE

Ek het al male sonder tal gesit en droom oor geregte waar in ek hierdie uie kan gebruik. So sit ek en dink aan sout groente as bykosse met hierdie krakerige uie bo-op gesprinkel. Of as ‘n bros bolaag vir slaaie of deel van ‘n vulsel vir ‘n heerlike kouevleis toebie, vervang crutons met die bros uie, risotto, viskoekies, poffertjies! Die lys hou net aan. Wat is jou gunsteling gebruik?

Wat vir my wonderlik is van hierdie uie, jy kan dit vir ongeveer 3 maande in jou yskas hou en dit bly heerlik. In my huis verdwyn dit soos die lekkergoed en koekies in die spens, spoorloos!


RESEP
2 Uie, groot - in eweredige dikte gesny (2 mm)
1 k Karringmelk
1 k Koekmeel (kan met maizena of chickpea meel vervang word vir gluten allergie)
1 k Mielieblom (maizena / cornstarch)
1 t Gerookte paprika of gewoon
1 t Sout
¼ t Neut muskaat (nutmeg)
½ t Bakpoeier
Olie vir braai

METODE

1. Plaas die gesnyde uie ringe in die karringmelk vir ten minste 4 - 12 ure.

2. Meng die res van die bestanddele saam en sif goed deur sodat alle bestanddele goed deur gemeng is. 


3. 
Verwyder klein hoeveelhede uie uit die karringmelk, skud eksta vog af en plaas in die meel mengsel, bedek goed met die meel. Alternatiewelik, plaas meel in sakkie en skud die uie in die meel. Baie belangrik laat die uie eers vir 'n uur staan voordat dit gebraai word sodat die meel nie af gaan nie. Oornag is nog beter.

4.
Voorverhit olie. Plaas genoeg olie in die kastrol sodat die uie goed bedek word. 

5. Braai klein hoeveelhede op ‘n slag sodat dit nie aan mekaar vas sit nie. Plaas op dreineringspapier en laat afkoel. Plaas in lugdigte houer en hou in die yskas.


6. Die meel kan gesif word en gestoor word vir latere gebruik vir nog ‘n baksel oor ‘n week of wat.


HOEVEELHEID: 2 - 4 porsies.


BRON: Annelien Pienaar, 2015, www.bosenbergguestfarm.co.za


Dinsdag, 29 Desember 2015

GROENBONE EN SAMPIOEN GEREG

Sandra Saayman jy is net die beste. Ek het hierdie ongelooflike reseppie by haar gekry so ‘n rukkie gelede en toe getoets. Die dis is uiters veelsydig. Daarom kan jy dit saam met braaivleis, potjie, of as bykos by jou gewone kookkos bedien. Dit is heerlik...dankie Sandra!

RESEP
350 g Groenbone - franse styl gesny - skuins in lang repies
200 g Sampioene - afgevee en in skyfies gesny
100 g Uie
5 ml Sout
1 ml Peper
50 g Margarien - bak soort
15 ml Suurlemoensap
3 ml Aromat
¾ Pakkie sampioenroomsop poeier
125 ml Melk of room

METODE

1. Kook die bone in soutwater tot net sag, ongeveer 5 minute. Dreineer baie goed.

2. Verhit die margarien in ‘n pan en braai die sampioene tot sag.


3. Verwyder die sampioene eers van hitte. Voeg die suurlemoensap by en geur met aromat. 


4. Voeg die soppoeier by die melk en roer baie goed sodat die mengsel nie klonte maak nie. Gooi die mengsel by die sampioen mengsel en sit terug oor hitte. 


5. Voeg die bone en uie by, kook vir ongeveer 10 minute by matige hitte. 


6. Bedien warm.


HOEVEELHEID: 4 - 6 porsies.


BRON: Sandra Saayman, 2015, getoets en verwerk deur Annelien Pienaar.


ROMERIGE BOTTERVERSIERSEL

Het jy al ooit gesoek na ‘n dood gewone botterversiersel resep wat proe soos ‘n droom, soek nie verder nie. Hierdie resep kan aangepas word vir vanielje of sjokolade versiersel. Ek gebruik net Rama of Storkbake vir hierdie resep. Botter is net so duur dat ek deesdae maar by laas genoemde hou.

Indien jy 'n perfekte wit versiersel wil verkry word Holsum voorgestel om as smeer te gebruik. Een woord van waarskuwing as dit by die gebruik van kleursels en geursels kom. Deesdae word daar verskeie soorte middels ingevoer. Maak seker indien jy 'n nuwe soort (nie die wat in die kettingwinkels is) gebruik dat jy proe soos jy werk. Die gel kleure is baie sterk en dus moet jy letterlik druppel vir druppel byvoeg totdat die regte kleur verkry is. Die geursels is ook so gekonsentreerd dat jy ook liefs moet proe soos jy werk. Meeste is nou in olie vorm en baie baie sterk in smaak. 


RESEP
200 g Margarien, “bake” soort - kamer temperatuur
500 g Versiersuiker plus 50 ml kakao (indien jy sjokolade kleur wil maak)
50 ml Melk
20 ml Vanielje geursel of geursel van keuse
Kleursel van keuse - voeg by soos verlang

METODE

1. Room die botter tot lig en donsig, voeg die versiersuiker en melk by en  klits baie goed deur totdat dit lig en romerig voorkom. Indien jy sjokolade versiersuiker wil maak voeg dan by lg stap die kakao saam met die versiersuiker gesif by.

2. Voeg nou die geursel en kleursel by.


HOEVEELHEID: Genoeg vir 2 laag koek om bo en kante asook tussen die lae te versier.


BRON: Annelien Pienaar, www.bosenbergguestfarm.co.za, 2015


Maandag, 28 Desember 2015

STOKVIS EN AARTAPPEL POFFERTJIES

Hierdie veelsydige reseppie kan met enige vis vervang word. Ek het onlangs Pilchards gebruik in die plek van die gewone vis. Dreineer net die stukke baie goed en hou die sousie om later oor die gaar poffertjies te bedien. Ek sit die poffers vir die kinders in hul kosblikke, bedien dit as ‘n ligte middagete of as ‘n vingerhappie vir die manne as hulle maters kom kuier. Vries ook  baie goed en kan reeds vooraf berei word. 

RESEP
450 g Vis filette - gaar gestoom of in melk geposjeer
500 g Gaar aartappels - geskil en fyn gedruk
1t Dill tippies of tiemie, gedroog
Sout en peper na smaak
Brood krummels
2 Eiers geklits
Koekmeel
Olie vir diepvet braai

METODE

1. Posjeer die filette in bietjie melk tot gaar. Posjeer beteken net liggies gaar maak by matige hitte sodat die vis nie taai word en uit droog. Dit neem ongeveer 10 minute op die langste om gaar te word. Dreineer die vloeistof en maak die vis fyn.

2. Kook dan die aartappels in lig gesoute water met skil tot sag. Trek skilletjie af en druk fyn sonder enige botter of melk. Meng met die vis en sout en peper na smaak. Dill is nogal ‘n heerlike krui om saam met kappok aartappels en vis te gebruik asook bietjie neutmuskaat.


3. Laat die effens koel en maak ongeveer 50 g balletjies. Plaas die balletjies op ‘n bakplaat en verkoel vir 1 uur. Sodra die balletjies ferm is kan jy dit in koekmeel rol en dan bak in vooraf verhitte diep olie. Jy kan ook die balletjies nadat dit in die meel gerol is vries en dan later soos nodig is gebruik.


of vir viskoekies:

4. Maak 100g hopies wat jy netjies in 'n pattie vorm. Plaas op bakplaat en sit in vrieskas om styf te word. Net voordat jy dit bak, haal uit, plaas in eier, en dan krummels. Druk die krummels lekker vas en bak in vlak vet of in die oond vir 25minute.

4. Dreineer en bedien warm.


BEDIEN MET: Aioli sous (sterk knoffel mayonnaise), knoffel room, mosterdsous


English Version
RECIPE
450 g Fish fillets - steamed or milk poached
500 g Cooked potatoes - peeled and crushed
1 tsp Dill tippies or thyme, dried
Salt and pepper to taste
Bread crumbs
2 Eggs beaten
Cake flour
Oil for frying

METHOD
1. Poach the fillets in a little milk until cooked. Poach means to gently cook at medium heat so that the fish are not tough and dry. It takes about 10 minutes on the longest to cook. Drain the liquid and finely flake the fish.

2. Boil the potatoes with their skins in lightly salted water until soft. Peel and mash without adding any butter or milk.
Mix the fish with salt and pepper to taste. Dill is quite a wonderful herb to use with mash potatoes and fish and also a little nutmeg.

3. Let it cool slightly and make balls of about 50 g. Place the balls on a baking sheet and refrigerate for 1 hour.
Once the balls is firm you can roll it in flour and bake in preheated deep oil.
You can also freeze the balls after being rolled in flour and then use as needed.

OR FOR FISH CAKES

4. Make 100 g piles that you form in a neat pattie. Place on a baking sheet and put in the freezer to firm. Just before baking, take out, dip in egg, then roll in breadcrumbs. Press crumbs firmly and bake in shallow fat or in the oven for 25 minute.

4. Drain and serve hot.

SERVED WITH: Aioli sauce (strong garlic mayonnaise), garlic cream, mustard sauce

QUANTITY: Approximately 20 - 40 depending on the size.

SOURCE: Annelien Pienaar www.bosenbergguestfarm.co.za, 2015

Donderdag, 24 Desember 2015

ALGEMENE OMSKAKELINGS TABELLE

250 ml of 1 koppie = hoeveel gram

A
All Branflakes: 50 g
Appelkose - gedroog: 150 g
Appelkoos konfyt: 330 g
Amandels - gevlok: 150 g
Aartappels - rou - gerasper: 125 g
Asyn: 250 g

B

Bruismeel: 140 g
Bruinbroodmeel: 140 g
Botter of Margarien: 230 g
Bruismeel: 140 g
Brood krummels: 125 g

C

Cheddar - gerasper: 100 g

D

Dadels: 150 g

G

Gemengde skil: 150 g
Gerolde koring: 200 g
Grondboontjies - gedop: 150 g
Geel wortels - gerasper: 125 g
Geel en bruin suiker: 200 g

H

Ham - gekap: 125 g
Hawermout: 80 g

K

Koekmeel: 140 g
Karringmelk: 240g
Klapper: 80 g
Koekie krummels - droog: 120 g
Koekie krummels - vars: 125 g
Kersies - gesny: 150 g
Kersies - heel: 160 g
Koekvrugte: 150 g
Koringkiem: 80 g
Konfyt - appelkoos: 330 g

M

Maaskaas - roomkaas: 250 g
Mozzarella - gerasper: 125 g
Mielieblom (maizena): 120 g
Margarien: 230 g
Mieliemeel - fyn: 160 g
Melk: 250 g
Melkpoeier: 250 g

N

Nuttywheat: 150 g 
Neute - algemeen - ongesout: 100 g

O

Okkerneute: 100 g
Olie: 250 ml

P

Pruimedante - ontpit: 150 g
Pekanneute: 100 g
Papawersaad: 150 g
Pampoen - gaar - fyn: 225 g
Piesang - fyn gemaak: 225 g
Kellogs cornflakes: 50 g

R

Rosyntjies - korente en sultana’s: 150 g
Rys meel: 160 g
Rys - wit - bruin: 200 g
Rice Krispies: 35 g

S

Semolina: 160 g
Sjokolade splinters: 200 g
Semels: 30 g
Sprinkel neute: 150 g
Sesame saad: 150 g
Sonneblom saad: 150 g
Strooisuiker: 210 g
Sampioene: 70 g
Spinasie - rou: 200 g
Sap: 250 g
Stroop: 350 g
Suiker - wit - bruin - geel: 200 g

V

Versiersuiker: 130 g
Vla poeier: 120 g

W

Witbroodmeel: 140 g
Water: 250 g
Wheatbix: 50 g

Y

Yoghurt: 240g

OOND TEMPERATURE 

100 ˚ C = 200 ˚ F
110 ˚ C = 225 ˚ F
120 ˚ C = 250 ˚ F
140 ˚ C = 275 ˚ F
150  ˚ C = 300 ˚ F
160 ˚ C = 325 ˚ F
180 ˚ C = 350 ˚ F
190 ˚ C = 375 ˚ F
200 ˚ C = 400 ˚ F
220 ˚ C = 425 ˚ F
230 ˚ C = 450 ˚ F
240 ˚ C = 475 ˚ F

HOOGTE BO SEESPIEËL VIR INTERNASIONALE RESEPTE SE AANPASSINGS

Moenie kommer as jy in Suid Afrika woon nie. Hierdie inligting is van toepassing op ons internasionale lede wat ons resepte wil gebruik. Dus poog ek om hulle te help om ons resesepte met suskes daardie kant te bak. Indien jy graag internasionale resepte wil gebruik dink ek jy sal wel baat vind by die onderstaande inligting om dan dienooreenkomstig aanpassings te maak. 

KOM ONS DOEN 'N LEKKER TOETS!

Ek woon in die binneland en ons water kook teen 96 ˚ C hier by ons. Dus is my oond temperature vir my bakwerk soos in die resepte teen hierdie omstandighede aangepas. Kook bietjie jou water en meet of jy ‘n verskil kry? Indien jy by die kus woon sal jou water langer neem om te kook en teen 
100 ˚ C eers kook. Wanneer jy die som doen is daar dus ‘n 4 grade verskil. So wat nou? Jy moet dus ‘n 4 grade aanpassing maak, of optel of aftrek.
Lekker toets!

OOND TEMPERATURE VOLGENS HOOGTE BO SEESPIEËL

900 m: verhoog oond temperatuur met 5 ˚ C / 25 ˚ F
1500 m: verhoog oond temperatuur met 10 ˚ C / 50 ˚ F
2100 m: verhoog oond temperatuur met 10 ˚ C / 50 ˚ F
3000 m: verhoog oond temperatuur met 10 ˚ C / 50 ˚ F

MEEL AANPASSINGS PER 250 ML / 140 G / 1 KOPPIE VOLGENS HOOGTE BO SEESPIEËL

900 m: bly net so
1500 m: bly net so
2100 m: vermeerder met 15 ml
3000 m: vermeerder met 15 ml

SUIKER AANPASSINGS PER 250 ML / 200 G / 1 KOPPIE VOLGENS HOOGTE BO SEESPIEËL

900 m: verminder met 0 - 15 ml
1500 m: verminder met 15 - 30 ml
2100 m: verminder met 30 - 45 ml
3000 m: verminder met 30 - 45 ml

BAKPOEIER AANPASSINGS PER 5 ML VOLGENS HOOGTE BO SEESPIEËL

900 m: verminder met 0 - 0.5 ml
1500 m: verminder met 1 ml
2100 m: verminder met 1 ml
3000 m: verminder met 1 ml

VLOEISTOF AANPASSINGS PER 250 ML / 250 G / 1 KOPPIE VOLGENS HOOGTE BO SEESPIEËL

900 m: vermeerder met 0 - 30 ml
1500 m: vermeerder met 30 - 45 ml
2100 m: vermeerder met 45 - 60 ml
3000 m: vermeerder met 45 - 60 ml

METRIEKE MATES

Teelepels (t) 
Eetlepels (e)
Koppies (k)
knippie = 1 ml 
¼ t = 2 ml 
½ t = 3 ml  
1 t = 5 ml 
1 e = 15 ml 
⅓ k = 80 ml 
⅔ k = 170 ml 
1 k = 250 ml 
1¼ k = 315 ml
1½ k = 375 ml
1¾ k = 440 ml
2 k = 500 ml
3 k = 750 ml
4 k = 1 kg

ONSE (OUNCES) EN PONDE (POUNDS)

½ ons = 15 g
1 ons = 30 g
2 onse = 60 g
3 onse = 90 g
4 onse = 125 g
5 onse = 150 g
6 onse = 180 g
7 onse = 210 g
8 onse = 250 g
1 pond = 500 g
2 pond = 1 kg

PINTE EN ML

30 ml = 2 e
60 ml = 4 e
150 ml = ¼ pint
300 ml = ½ pint
450 ml = ¾ pint
600 ml = 1 pint
900 ml = 1½ pint
1.25 liter = 2 pinte
1.8 liter = 3 pinte
2.5 liter = 4 pinte

LINKS VIR EKSTRA HULP 

https://www.spar.co.za/Tips/View/Food-Tips/Converting-Grams-to-Mililitres

Woensdag, 23 Desember 2015

DADEL BLOKKIES MET 'N TWIST!

As kind het ek niks van dadels in die algemeen gehou nie. Ek dink ek het dit iewers geëet en dit was nie mooi sag gemaak voordat dit gebruik is nie. Maar toe trou ek met ‘n man wie se Ma die heerlikste blokkies maak! Nooit ‘n resep van haar gevra nie, want sy het ons altyd met dit oorlaai. Na haar dood het die skoon sussies haar boeke weg en ek het nooit die geleentheid gekry of die vrymoedigheid om vir die resep te vra nie. So sit ek eendag en blaai deur ‘n ou handgeskrewe boekie van my Ma en sien ‘n soortgelyke resep wat vir my sin maak. So begin ek mos ook die dadel vingers maak. Ek het geskaaf en skuur aan die tekstuur totdat ek dit soos ouma Ria se resep kon kry. 

Onlangs besluit ek mos om gou weer blokkies vir die seuns te maak want dit is vakansie tyd en dit is ‘n geswem en speel, as hulle uit die swembad kom is hulle rasend lus vir ‘n soetigheidjie. MMMhhh een probleem ek het net 1 pakkie Marie koekies en weet as ek die resep halveer dit nie lank genoeg gaan hou nie. Die waaghals in my steek nek uit en gooi to Rice krispies in.Wel, die kinders was so vol lof dat ek self ook eers moes proe. Jip, ek sal dit nooit weer die resep sonder die Rice krispies maak nie. Dit is voorwaar ‘n wenresep! 


RESEP
500 g Rama of Stork bake
1 kg Versiersuiker
500 g Dadels - gekap
60 ml Kakao (opsioneel)
2 ml Kaneel
160 g Klapper
4 Eiers
10 ml Vanielje geursel
¼ t Sout
250 g Marie koekies - grof gekap
150 g Rice krispies

*Indien jy nie die Rice krispie weergawe wil maak nie, gebruik 400 g Marie koekies. 


METODE

1. Smelt die botter en versiersuiker oor lae hitte, dit moenie kook nie.

2. Voeg die dadels, kakao, kaneel, klapper by die mengsel en kook vir 3 - 5 minute saam oor medium hitte.


3. Klits die eiers, vanielje en sout saam en voeg by die gekookte mengsel. Moenie bang wees dat die eiers sal skif nie, dit klits perfek deur sonder om te skei.


4. Voeg die koekies en rice krispies by en meng goed deur. Plaas in ‘n gesmeerde pan wat goed gesprinkel is met ekstra klapper sodat die koekies maklik kan uitkom. Die mates van my groot beskuit pan is 30 cm x 45 cm pan en druk plat in pan en laat eers buite afkoel. Daarna sny in vingers binne in die pan. Plaas in yskas om verder te set voordat jy die blokkies skei en dan in ‘n bak met lae waspapier pak. Hou in die yskas of vrieskas. 


5. In die vrieskas hou die blokkies maande!


HOEVEELHEID: 100 blokkies.


BRON: Annelien Pienaar se verwerking van my ma Hantie Bezuidenhout se resep, 2015, www.bosenbergguestfarm.co.za




Maandag, 21 Desember 2015

BEESTONG MET SOETSUURSOUS

Beestong kan op ‘n verskeidenheid maniere voorberei word. Eerstens kan dit gekook word, tweedens kan dit gepekel word  of as ‘n gepekeld en gekook aangebied word. Verder kan dit ook in die oond gebak word en dan my gunsteling, die stoompot! Bedien met my ma se soet rosyntjie mosterdsousie dan is die Kaap Hollands!

Om die tong se velletjie makliker te verwyder help die pekeling ook nogal baie. Die suur in die vorm van koeksoda en kremetart maak die velletjie bros en dit trek met die hulp van sout aan jou vingerpunte dan makliker af. Die sout op jou nat vingerpunte gee net beter greep op die klein stukkies wat so glibberig is. Ek ontvel vis ook op hierdie wyse. Vir die tong begin van agter na voor met die aftrek. Ek trek ook ligte snytjies deur die vel oor die lengte van die tong en dan trek ek die velle in repe af. Dit is belangrik dat die velletjie dadelik terwyl die tong nog warm is afgetrek word. As dit eers koud geword het gaan jy regtig sukkel en die helfte van die tong weg sny.


GEPEKELDE BEESTONG
500 g Growwe sout
30 g Koeksoda 
15 g Kremetart
1 liter Water
Peperkorrels na smaak
500 g Sagte bruinsuiker
5 Knoffel toontjies - grof gekap
1 Beestong - kliere en are verwyder

METODE

1. Kook die water en gooi dit oor al die bestanddele en laat dit dan afkoel. Syg deur sif of kaasdoek.

2. Vryf die tong met ekstra sout goed in en sit dit dan in die koue soutoplossing vir 3 dae. Onthou om die tong in ‘n houer te sit wat nie met die suur en die sout sal reageer nie. Dus plastiek, enamel of glas. Sit ‘n bord op die tong met ‘n gewig soos ‘n 750 ml tot 1 kg bottel met water om die tong onder die sout oplossing te hou. Onthou: Die sout gaan deur die tong geabsorbeer word en vog gaan uit die tong getrek word, dus word die waterige sout oplossing flouer elke dag. Roer asb ten minste een keer per dag die sout water sodat die sout eweredig versprei kan word. Dit is nie nodig om die sout oplossing aan te vul nie. Maar roer asb goed. Draai die tong elke dag.


GEKOOKTE OF GEPEKELDE BEESTONG

5 Knoffel toontjies - heel
1 Groot ui - grof gekap

METODE

1. Spoel die tong eers baie goed af. Week die tong dan vir 1 uur lank in vars koue water.

2. Kook die tong in koue water met die knoffel en ui vir 3 - 4 ure totdat dit sag is. Of jy kan die tong in die drukkoker vir 45 minut stoom totdat dit sag is.


3. Trek die tong se velletjie af terwyl dit nog warm is. Sodra die velletjie verwyder is laat die tong mooi reguit koud word en stut dit indien nodig met koekrollers weerskante of enige iets wat dit sal reguit hou. Sny in skyfies en bedien met sousie.


ROSYNTJIE SOUS VIR TONG

200 g Sagter bruinsuiker
2 t Mosterd poeier
2 e Mielieblom
4 e Suurlemoensap
1 t Suurlemoenskil (opsioneel as jy nie vars suurlemoen het nie)
3 k Water
4 e Asyn
1 k Rosyntjies

METODE

1. Meng die suiker, mosterd en mielieblom saam en voeg die res van die bestanddele by en meng goed deur sodat die mielieblom goed opgelos het en nie klonte sal maak nie.

2. Plaas die bestanddele in ‘n vlekvrye staal kastrol en verhit oor medium hitte en roer aanhoudend met draad klitser totdat die mengsel verdik het. Kook dan vir 3-5 minute deeglik deur.


3. Bedien die sous koud of warm.


BRON: Annelien Pienaar, www.bosenbergguestfarm.co.za, 2015.

Donderdag, 17 Desember 2015

GEMARINEERDE BROCCOLI EN BLOMKOOL SLAAI


Ek was swanger met my laatlam dogtertjie en onthou dit was moedersdag toe ek hierdie ongelooflike slaai geëet het by ‘n naburige restaurant. Ek en my skoonma kon nie genoeg van die slaai geskep kry nie, so erg dat my man met ons geraas het ons mors sy geld, hoekom eet ons nie vleis nie? Die chef het die resep vir my gegee en soos dit my natuur is, het ek geskaaf en skuur totdat die smaak vir my reg was. Die oorspronklike resep het nie feta en neute ingehad nie. Die slaai kan net met broccoli of met blomkool gemaak word. Wel, die slaai is ongelooflik!

Spek, ham, kekerertjies, grondbone, heerlike garnering idees!

RESEP
500 g Broccoli
500 g Blomkool
2 Wortels in wieletjies of repies
1 Soetrissie - in repies gesny
½ k Rosyne of pruimedante
1 ui - Ringetjies gesny - nie te dun
125 ml Neute van keuse - opsioneel (ek hou van gevlokte amandels)
250 g Feta kaas blokkies of cheddar

METODE

1. Kook water met sout in om die broccoli en blomkool te blansjeer.
Blansjeer is wanneer jy groente in vinnig kokende water dompel en dan vir 2 minute los, uithaal en in koue water dompel om die kook proses te stop. Haal dadelik uit.

2. Meng al die slaai bestanddele saam en maak die sous wat moet oor kom.


MARINADE SOUS

1 k Wit suiker
1 k Slaai olie (slaai olie kan wees sonneblom, canola, extra virgin olive oil)
1 k Asyn
½ k Gewone yoghurt
1 t Sout

METODE

1. Klits die asyn en suiker saam en verhit oor medium hitte sodat suiker opgelos is. Laat afkoel tot lou warm en voeg die olie en yoghurt by, giet oor slaai en laat vir 5 ure marineer voor opdiening.

BRON: Die Ou Pastorie en verwerk deur Annelien Pienaar, 2010, www.bosenbergguestfarm.co.za

RYS SLAAI

Ek is baie lief vir enige vorm van slaai, koud of warm. Ek geniet my slaaie as ‘n bykos, hoofmaal of kosblik bykos maar slaai is daar tenminste een keer per dag op ons borde. Hierdie slaai kan verder op getower word met die byvoeging  van 1 k bestanddele ekstra of deel die koppie op soos bv: ½ k blokkies kaas met ½ k ham, spek of wat ook al. ‘n Rukkie gelede was ek weg met werk en my man het die slaai gemaak en die vorige aand se braaivleis wors in wieletjies in gesny. My kinders het gedink dit is koningskos. Geniet 

RESEP
2 k Rou rys - Tastic se wit rys of Bruin rys
2 Soetrissies - fyn gekap
2 Knoffeltoontjies - fyn gedruk
1 Medium ui - grof gekap
20 ml Olie
½ Blikkie mielie pitte
20 ml Kerrie poeier
2 x 410 g Blikkies perskes - gedreineer en grof gekap
Sout en peper na smaak

METODE

1. Ek vind dat Tastic rys nie pap kook nie en beter werk vir hierdie slaai. Kook die rys in soutwater totdat dit gaar is en laat goed afkoel. 

2. Braai die ui en  soetrissie totdat dit gaar is. Voeg die knoffel en kierrie by en braai weer vir 1 minuut om die geure te laat ontwikkel.


3. Meng die res van die bestanddele met die rys en verkoel tot en met opdiening.


SOUS
300ml Mayonnaise
200ml Room
1 e Heuning

METODE 

Meng alles goed deur en gooi oor net voor opdiening. Indien haastig kan alles saam gemeng word en so in die yskas geplaas word.

GARNERING - OPSIONEEL  

Vars spriet uie
2 e Vars rooi ui - gekap
2 e Neute van keuse

BRON: Annelien Pienaar, www.bosenbergguestfarm.co.za


Woensdag, 16 Desember 2015

JY HET 'N WENRESEP ERVARING

Ek mag nie uitpraat oor die dinge wat binne die ateljee gebeur het nie, maar ek kan vir julle ‘n ongelooflike storie van vriendskap vertel...Daleen Lotter van Schalkwyk is ook 'n Boerekos met 'n Twist lid!

Ek klim die vliegtuig op Lanseria net voor 05:00 die maandag oggend en vlieg Kaapstad toe. Ek het nog nooit alleen met ‘n gehuurde kar rond gerits in die Kaap nie, maar het in die jaar deur werk wat ek moes gaan doen het, wel myself georiënteer en my pad gevind. Met die verfilming van my dis moes ons self al die bestanddele verskaf en is toe fort na al wat ‘n winkel om my kruideniers te kry. Die dag om gekry deur vriende te sien, op die strand te stap (roomys en vis en chips geëet) en toe by my skoon familie in Stellenbosch net agter Spier gaan afpak vir die volgende dag. My skoonsus is ‘n mediese dokter en sy het die vorige aand gespoed en was moeg, dus is ons almal vroeg bed toe. 


Die volgende oggend pak ek my goedjies, bakkies, lepels, borde, bestanddele en ry vroeg oggend na Spier. Daar gekom was dit ‘n hele pakkaas wat ek moet dra, die ateljee is ver. Kom by die plekkie aan en twee dames sit op die stoep. Ek vra of ek op die regte plek is en hulle beaam dit is reg. Loop die derde keer en uitasem sit ek op die stoep se muurtjie. Ek vra toe of hulle deel is van die kamera span en hulle lag, nee ons is hier vir Wenresepte. Ohhh okey, ons gesêls te heerlik oor ons disse, min weet ek en Daleen (een van die deelnemers) dat dit ‘n kompetisie is. Ons word by mekaar geroep en sit op die stoep om papiere in te vul wat sê ons mag nie uitpraat, as ek dit so kan stel. Maar daar op die papier staan dit, deelnemers,  kompetisie...??? Ek en Daleen kyk na mekaar en beide se oë wys groot vraag tekens? 


Die knapie wat die papiere gebring het: ”Oooo, weet julle nie dat dit ‘n kompetisie is nie?” Goed, my gedagtes was nie vriendelik. Ek aanvaar my lot, ek het ver gevlieg en baie moeite gedoen. Ons drie dames besluit toe om kleedkamer toe te gaan. Terwyl ons hande was vra Daleen vir my: “Maar ek ken jou mos?” Ek sê wie ek is en sy vra of ek van BKT is. Mense wag, dit word nog beter! Hierdie einste Daleen is die vrou wie se kuiertjie ek by my gastehuis gemis het. Ons het toe sy in my area was met vakansie, ‘n paar keer by mekaar probeer uitkom vir kuier. Elke keer was ek of in die dorp met die kinders se aktiwiteite of sy was iewers aan die kuier met haar sussies. Ons het al soos twee ou vriendinne op FB gêsels en gedroom oor ons ontmoeting eendag. Daleen is wraggies ‘n baas bakster en as ek luister en ook sien die fenominale hoeveelheid koeke wat sy per week bak, dan weet ek nie hoe sy staande bly. Ons twee omhels mekaar toe ons besef wie voor mekaar staan! Arme Tamara se wind skoon uit haar seile! Daleen het nog baie talente soos om grimering te doen. Dit is nou die een deparement wat ek NIE mee goed is nie. Ek het skoon vergeet om grimering aan te sit en sy het gou-gou my gehelp dat ek nie soos ‘n indiaan lyk nie! Nee, daar was geen slegte vibes op die stel van kompetrendheid nie, ek en Daleen was oopkop en het te lekker gegiggel die heeltyd!


So het ons die dag om gekuier en laat ek vir julle vertel, ek is nie TV materiaal nie. Die goed wat ek moes sê of die reëltjies wat ek moes oor sê, wel, ek dink die produser wou my aanrand, want ek kon niks onthou nie. Ek het op ‘n stadium seker een rëeltjie 10 keer oor moes doen en dit was net flippen 6 woorde! Nee, dit was ‘n lang en moeilike dag. Ons het 20:30 klaar gemaak en almal was vodde moeg. Al die mense op die stel wat dit vir ‘n lewe doen en Carmen wat die heeltyd moet smile, wel ek het nuwe respek vir elke storie wat op TV kom. Dit is nie grappies nie! Was lekker gewees om die binne werke van dinge te sien, hoe georden die span is, elkeen weet presies wat om te doen, waar om te staan. Die klankman was die beste! Hy kom ook van Harties af dus het ons lekker geklets oor ons geweste. Daarom gee ek nie 5 sterre vir die span nie maar 10 uit 10 vir ‘n goed geoliede masjien!


Ek het met ‘n prys weg gestap, ’n pakkie met Huisgenoot se puik boeke en wel, my vrees oorwin om alleen te reis, en Daleen ontmoet! Die tog was toe die moeite werd!


Dankie Huisgenoot vir die geleentheid!

CHIFFON KOEK

Hierdie is my gunsteling resep oor twee redes: Nommer 1 dit is nie te veel beslag nie en twee dit bak die mooiste cupcakes. Oor die jare heen het hierdie ons gesin se verjaardag koek en ook cupcake basis resep geword. Ek hoop elkeen wat hierdie resep aanpak sal ook die genoegdoening soos ek ervaar elke keer as jy die koekies uit die oond haal.

Mense verwar die Chiffon koek en die Angelfood koek omrede beide se tekstuur baie lig en sponsagtig is en omdat beide in 'n tuitpan, ongesmeer gebak word. Maar die verskil kom in by Chiffon dat dit ryker is. Dit bevat eiergeel en sommige resepte bevat botter. Die kleur van die koek is ook geler. 


In die Amerika's waar die resep sy ontstaan gehad het, het hulle oorspronklik die koek gebak met meel wat baie laag was in gluten en dus 'n ligter tekstuur tot gevolg het. In SA het ons nie daardie voorreg en maak ons aanpassings deur mielieblom by koekmeel te voeg om die gluten inhoud te verlaag om die eindproduk 'n uiters sagte en veerligte tekstuur te gee.


RESEP
120 g Koekmeel
45 g Mielieblom (maizena)
¼ t Kremetart
5 ml Bakpoeier
1 ml Sout
5 Ekstra groot eiers - geskei
210 g Strooisuiker
100 ml Yswater

METODE

1. Voorverhit oond op 180 ˚ C.

2. Sif koekmeel, mielieblom, bakpoeier en sout saam. 


3. Klits eiergele en suiker saam tot lig en romerig, neem ongeveer 5 minute om dit so donsig te kry. Klits yswater geleidelik by. 


4. Vou droë bestanddele met ‘n kokslepel in die eiermengsel in.


6. Klits eierwitte tot sagtepunt stadium en voeg die kremetart by en klits verder tot stywepunt stadium. Vou die eierwitte in by die eiergeel mengsel weereens met die hulp van die kokslepel. Die rede vir die gebruik van die spesefieke lepel, die kante van die lepel is dun en sny sagkens deur die eierwitte en breek nie die lug wat ingewerk is wat bydra tot die rysaksie. Geen geklop of klits net invou. Meng in ‘n figuur 8 en draai die bak in die rondte na elke figuur voltooi is.


7. Skep die beslag in ‘n ONGESMEERDE ringkoek pan of enige ander vorm pan. Moenie bunt panne gebruik wat riffels en vormpies op het nie, jy gaan nooit die koek uit die pan kry nie. Bak die koek by 180 ˚ C vir 40 - 45 minute in die middel van die oond.


8. Sodra die koek klaar gebak het, haal uit die oond en draai die pan om sodat die koek na onder toe hang. Nee, die koek sal nie uitval nie. Die koek klouvas aan die kante van die pan en behou sy vorm terwyl dit koud word. Indien jy nie ‘n Chiffon pan het met voetjies nie, kan jy die pan se kante op glase steun totdat die koek heeltemal afgekoel het. Maak die koek se kante versigtig los. Ek verkies om hierdie tipe koek soos Chiffon en Angelfood met losboom panne te bak sodat die onvorming makliker kan weers. 


BRON: Annelien Pienaar, 2015, www.bosenbergguestfarm.co.za


ANGELFOOD KOEK

Met die maak van hierdie koek word die eierwitte eers styf geklits en dan word die suiker by die witte geklop om 'n sagte meringue te maak. Daarna word die droeë bestanddele liggies ingevou.Die koek is baie lig in kleur, sponsagtig, maar nie so ryk in smaak soos die chiffonkoek met sy botter en eiergeel nie.
• bevat geen eiergeel
• bevat geen vet
• geen rysmiddels behalwe eierwitte
• baie hoër persentasie suiker
• kremetart word by die eierwitte ingeklits sodoende die eierwitte fermer te maak sodat dit die struktuur saam met die hoë persentasie suiker, kan ondersteun tydens die bakproses

Hierdie koek se pan word NIE gesmeer nie. Die koek is veerlig en moet opklim teen die kante van die pan. Nadat die koek gebak is moet dit omgekeer word sodat die koek kan hang en so afkoel en stol. Ja, ek weet dit klink nie lekker nie, maar die tegniek verseker dat die koek sy hoogte behou.


Wanneer die koek gesny word moet dit met mes met tandjies gesny word. ‘n Gladde lem mes is geneig om die koek in mekaar te druk en kluitjie rig te maak. In die ou dae het die dames die koek met twee vurke gesny deur die vurke weerskante van mekaar te hou en die koek dan van mekaar weg te trek. Dus is hierdie ‘n uiters delikate koek om te sny.


RESEP
90 g Koekmeel
30 g Mielieblom
320 g Strooisuiker
375 ml Eierwitte (12 eiers ongeveer)
7 ml Kremetart
Knippie sout
5 ml Vanielje geursel

METODE

1. Voorverhit die oond na 175 ˚ C.

2. Sif die koekmeel en mielieblom twee keer saam. Voeg dan een-derde van die strooisuiker by en sif weer goed.


3. Klop die eierwitte tot sagtepunt stadium. Voeg dan die kremetart en sout by die eierwitte en klits tot stywe punt stadium.


4. Klop nou die suiker by die eierwitte (amper soos om meringue te maak) deur een eetlepel per keer by te voeg soos jy klits. Elke byvoeging moet ongeveer vir 1 minuut geklop word. Hou so aan totdat al die suiker in gewerk is. Klop die vanielje geursel in.


5. Vou die koekmeel nou in drie byvoegings by die eierwitte. Vou in ‘n figuur 8 die mengsel in en draai die bak soos jy werk, wees geduldig en werk stadig en saggies. Voeg dan weer ‘n deel van die meel by en dan die laaste deel. Skep in ongesmeerde pan. Onthou as jy nie 'n tuipan het nie, kan jy 'n gewone pan ook gebruik. 


6. Bak die koek vir 40 - 45 minute totdat die koek gaar is. Laat die koek onderste bo afkoel. Indien jy ‘n tuitpan gebruik het wat nie voetjies het nie plaas ‘n glas in die middel op die tuit en balanseer die omgekeerde koek in die pan op die glas. Laat die koek tot yskoud afkoel voordat jy die koek versigtig met ‘n groente messe teen die kante begin los maak.


MOONTLIKE FOUTE WAT MAG INSLUIP

Die eierwitte kan dalk te droog geklits word en dan gaan die droë bestanddele moeilik ingevou word. Wees dus baie versigtig vir oorklits.

BRON: Annelien Pienaar, 2015, www.bosenbergguestfarm.co.za

ANGELFOOD KOEK VS CHIFFON KOEK?

Angelfood: Kyk die ligte kleur en fyn tekstuur.
WAT IS DIE VERSKIL TUSSEN ANGELFOOD KOEK EN CHIFFON KOEK?
Mense verwar die twee koeke omdat beide in dieselfde tuitpan met voetjies gebak word en dink dan dat dit dieselfde ding is.

ANGELFOOD KOEK

Die koek word gemaak deur styfgeklopte eierwitte as rysmiddel. Die eierwitte word eers styf geklits, suiker by die witte gevoeg (soos 'n meringue) en dan baie versigtig in die res van die bestanddele met ‘n kokslepel ingevou om die lug te behou. Die koek is baie lig in kleur, sponsagtig, maar nie so ryk in smaak soos die chiffonkoek met sy botter en geel nie.

• bevat geen eiergeel 

• bevat geen vet
• geen rysmiddels behalwe eierwitte
• baie hoër persentasie suiker
• kremetart word by die eierwitte ingeklits sodoende die eierwitte fermer te maak sodat dit die struktuur saam met die hoë persentasie suiker, kan ondersteun tydens die bakproses.


Chiffon: Kyk die geler kleur.
CHIFFON KOEK
Kom voor soos ‘n sponskoek maar is baie fyner in tekstuur en ryker in smaak. Die gele word geskei en saam met water gemeng en later net soos die Angelfood koek met die eierwitte ingevou.

• bevat ‘n rysmiddel in die vorm van bakpoeier

• water
• botter of olie
• minder suiker
• eiergeel



Gewone botterkoek: Groot verskil in tekstuur
BRON: Annelien Pienaar, 2015, www.bosenbergguestfarm.co.za

Dinsdag, 15 Desember 2015

JAMTERTJIES MET 'N TWIST!

Ek dink elke Suid Afrikaner kan saam stem dat 'n jamtertjie so deel is van ons koskultuur soos krummelpap en botter. Ons tertjies is legendaries. My Ma se degie is sag en bros.
Soms vir die ekstra lekker kraak rol ek die tertjies in strooisuiker terwyl dit so warm uit die oond kom vir variasie. Soms maak ek dit rond, soms maak ek dit sterrre. Soos die gier my pas, so maak ek my tertjies. Geniet die anderste idee's vir hierdie lekkerny! Wat van 'n tertjie gevul met makataan en pynappel stukkies, perske snipper konfyt, rooi pruim stukkies met pruimedant en sjerrie, mense dit word mos net lekkerder!

RESEP
Appelkooskonfyt - fyn en styf (loperige konfyt gaan ‘n gemors maak)
1 k Mielieblom (cornstarch of maizena)
8 k Koekmeel
500 g Rama of Stork bake
3 e Kookolie
4 t Bakpoeier
250 ml Yswater
2 e Brandewyn
10 ml Sout

VULSEL BESTANDDELE

1 Eier
50 ml Melk

METODE

1. Begin eers deur die konfyt in 5 ml skeppies te meet en dan in ‘n bakkie gevul met mielieblom te plaas en bedek die bolletjies deur dit te skud in die bakkie. Haal uit die meel en plaas dan op ‘n bord in die yskas.

2. Sif al die koekmeel, sout, bakpoeier saam en vryf die margarien en olie in die meel in. 


3. Voeg nou die water en brandewyn by die mengsel en druk die deeg aan mekaar. Knie die deeg liggies, maar wees versigtig om dit nie te oorwerk nie. Laat die deeg 10 minute rus voordat jy begin rol.


4. Rol die deeg op ‘n meel bestrooide oppervlakte ongeveer 5mm dik uit, of so dik soos ‘n sosatie stokkie. Druk dan met ‘n ronde drukker sirkel en plaas dan ‘n konfyt hopie in die middel.


5. Smeer net die een helfte van die sirkel met geklitste eier en melk en druk dan die sirkeltjie toe in die helfte. Verkoel dan die tertjies vir 1 uur voordat dit gebak word.


6. Voor baktyd, smeer die tertjies met die oorblywende melk en eiermengsel en bak vir 15 minute by 180 ˚ C .


7. Vries goed gebak en ongebak.


LEWER: 6 dosyn.


BRON: Annelien Pienaar, 2015, www.bosenbergguestfarm.co.za


WIT EN DONKER SJOKOLADE TRUFFELS

Gladste tekstuur wat ek in 'n lang tyd laas geproe het, smelt in die mond lekker!
Indien jy iemand lekker wil bederf met hierdie dekadente en sysagte sjokolade bederfies, dan is jy by die regte resep!

RESEP
125 g Donker of wit sjokolade van keuse - grof gekap
50 g wit Malvalekkers - klein op gesnipper
110 g Ideal melk
125 g Wit suiker
15 ml Rum - enige alkhol sal werk soos Amarula ens
60 g Glans kersies vir die middel
125 g Sjokolade vir die doop van die truffels OF jy kan die balletjies rol in kakao en ook versiersuiker

METODE
1. Plaas die Ideal melk in ‘n kastrolletjie met die suiker en laat die suiker oor lae hitte smelt voordat dit gekook word. Kook dan die mengsel totdat dit net wil kleur verander.

2. Voeg dan die sjokolade en malvalekkers by en laat dit oor die lae hitte smelt. Sodra die mengsel glad is voeg die alkhol by. Laat die mengsel tot kamer temperatuur afkoel voordat jy bolletjies rol.


3. As dit ‘n baie warm dag is plaas eers die mengsel in die yskas om effens te set, maar nie heeltemal nie.


4. Rol 15 ml balletjies en plaas op koue bord en bedek en plaas in die yskas en laat goed hard word. Hier kan jy dan besluit of jy ‘n kersie in die middel wil sit. Ek het onlangs gemarineerde pruimedant halwes in die kerne gesit en ook heerlik gewees. Gekristaliseerde gemmer stukke is ook heerlik. Speel lekker met jou kombinasies.


5. Smelt die sjokolade sodra die balletjies deur koud is. Druk ‘n sosatie stokkie diep in die balletjie in en doop in die sjokolade. Neem jou staan rasper en druk elke stokkie in die gaatjies van die growwe kant in om die balletjies te laat set voordat jy dit afhaal. Jy kan ook jou kolander vir dieselfde doel gebruik. As jy die balletjie afhaal bedek dan die gaatjies met ‘n teen oorgestelde kleur van die sjokolade deur die agter kant van die sostatie stokkie in die sjokolade te sit en dan net ‘n kolletjie oor die gaagtjie te druk. Sommer mooi op getooi.


HOEVEELHEID: Ongeveer 30.


BRON: Annelien Pienaar, 2015, www.bosenbergguestfarm.co.za